PITOPINTOK

Ang Pitopintok Poetry usa ka bag-ong eksperimental nga dagway sa Balak 
Binisayâ nga gisulayan og mugna ni Eric S.B. Libre sugod sa 
Pebrero 2024 uban sa tinguha nga makapabarog og bag-ong matang
sa balak nga magsilbing usa sa mga talagsaong timailhan sa panitik
o literaturang Bisaya. Pitopintok poetry consist of seven with seven 
syllables per line.

Aniay pipila ka pitopintok nga balak nga akong nasulat:

AMBOT SA ONGGOY
Ang tawo gikan daw sa
Onggoy nga dakong lalis
Sa pundok creationist
Ug sa evolutionist.
Kinsay sakto kanila?
Maayo tingali sa
Onggoy ta mangutana

PAGWAGTANG SA KALAAY
Huyuhoy tayhupa ang 
kalaay nga mosanta 
sa kasadya. Sayang ang 
oras. Gawas, lakaw ug 
lantaw sa ubos ug sa
ibabaw. May bulak sa 
yuta, bangaw sa langit

PAG-AMPO
Kon buot kang mag-ampo
Tan-aw sa simba-simba 
Kon mangamuyo, ug sa 
Pakiluoy sa iro
Kon dunay gipangayo
Sa kahilom sa tuko
Nga sa suok nagtago.

TINGHULAW
Ang tigsoyng mga humay 
Sa nangliking basakan
Gitilaptilapan sa
Dayong mga huyuhoy
Samtang ang mga baki 
Pilapil nagsuksok, sa
Lapok halwan naghagok

BABOYNG GIKALIBANGA
Baboy lang ko nga 
Gilubong sa ‘kong amo
Apan ayawg tamaya
Kay kapahimuslan pa
Pamati sa kasadya
Sa estambay sa kanto
Nagsumsom sa adobo.