“Congratulations, Sir! Maayo ang resulta sa imong hormone therapy ug injection sa bukog,” nagkanayon ang akong urologist human makita ang resulta sa akong subling bone scan. “Wala nay nakitang cancer lessions sa imong gusok.”
Sa akong unang bone scan nga gihimo kapin sa duha ka tuig ang minglabay, nadayagnos kog stage 4 prostate cancer kay mikaylap na ang kanser sa akong gusok. Matod pas akong doktor, ang bukog maoy unang matakdan sa kanser sa prostata.
“But I’ll recommend radiation therapy,” sugyot ni Dr. John Mark Arkayera.
“Gikinahanglan gyod na, dok?”
“Makatabang ang radiation therapy sa survival sa may prostate cancer. Patyon ang cancer cells sa prostate aron wala nay mokaylap.”
Iya kong gihimoag referral ngadtos radiation oncologist sa Polymedic Medical Plaza sa Dakbayan sa Cagayan de Oro.
Sa walay paglangan, akong gitoman ang sugyot sa doktor. Sa Septiyembre 16, 2020, nagpakonsulta ko ni Dr. Frederick R. Monsalud sa Cancer Center sa Polymedic Medical Plaza. Nianang adlawa nahuman ang mga laboratory test nga giresita ni Dr. Monsalud – complete blood count, chest X-ray, liver ultrasound ug hip CT scan.
Human sa CT planning (simulation) ug RT planning pagka sunod adlaw, giresita sa radiation oncologist ang 42 ka mga radyisyon sesyon sa akong tibuok balat-ang ug sa prostata. Ang radyisyon pagahimoon gikan sa Lunes ngadtos Biyernes. Ang radyisyon may dautang epekto sa maigo nga maayong mga selyula ug ang duha ka adlawng pahuway (Sabado ug Dominggo) makatabang sa pagkaalim sa nadaot nga mga selyula.
Gisugdan sa radiation therapy sa Septiyembre 18 ug nahuman sa Nobiyembre 19. Ang panambal, himoon sulod sa radiation room. Ipahigda ang pasyente sa treatment table ug human ipahiangay sa mga radiology technician ang linear accelerator, himoon ang pagdirekta sa igong dosis sa x-rays ngadtos gitumong nga kanser o tumor.
Tungod sa pagkuto sa panlihok sa tawo ning panahon sa corona virus pandemic, ang unta sayon nga radiation therapy nahimong hasol ug lisod.
Dili sayon ang pagsulod sa hospital. Daghang kuskos balungos. Mopil-ap kag selp-assessment form diin imong tubagon ang pangutanan kon duna kay hilanat?, duna kay sip-on, ubo, arat sa tilaok?, nagkalibanga ka o nagsakit ang tiyan?, nakapanaw ka ba gawas sa dakbayan sa miaging 30 ka adlaw?, naekspos ka ba sa mga tawong may sakit sa COVID-19 sulod sa 14 ka adlaw?, duna bay sakop sa imong pamilya nga nagtakdan sa COVID-19 o nakasinati og simtuma sa maong sakit?
Pusilon imong agtang sa temperature scanner. Kon duna kay hilanat o simtuma sa COVID-19, moagi kag swab test. Suwerte kay wa ko hilanti ug wa ko gisip-on o giubo sulod sa duha ka bulan nakong balik-balik sa hospital.
Dili sayon ang pag-adto sa hospital kay gidid-an kos akong mga bata sa pagsakay sa taxi o publikong sakyanan. Gibinlan kos among kamagulangang anak og sakyanan apan problema kay dili ko makadrayb. Maayo na lang kay dunay pag-umangkon ang akong asawa sa dakbayan nga mibulontaryo sa pagmaneho sa sakyanan sulod sa 42 ka adlaw nga balik-balik sa hospital.
Dili sayon ang bationg kalaay sa kapin sa duha ka bulang pagpuyo namo ni misis sa apartment. Walay nagpuyo sa 3-bedroom nga apartment nga magamit lang ko dunay makalaag sa Cagayan de Oro City. Wala ang naandang kalingawan sa among pinuy-anan sa Valencia City. Naay TV apan di magamit kay way cable connection o wifi. Ang among palibot mga kalsada ug kabalayan nga managsamag hitsura. Way gikaang nga mga bulak nga atimanon. Way luna nga matamnan. Way lagwerta nga kasilhigan. Way apo nga sabaan. Way iro nga makighagwa. Pastilan, nanglurat ang among mga mata pagtinutok sa selpon ug tablet.
Dili mi kasuroy-suroy. Ang among gipuy-an nga apartment sa Upper Carmen duol sa SM Mall apan kay dili man pasudlon ang mga senior citizen, dili mi ka window shopping. Dili mi ka palit sa among pagkaon ug ubang panginahanglan sa balay. Masudlan lang ang ref kon makabisita ang mga bata. Gahatdan mis among mga bata og karne, isda, utanon, lamas ug prutas. Gisuplayan sad mi nilag alkohol, face mask ug skin lotion para sa paso ug katol sa panit.
Dunay mga side effect o dautang epekto sa radyisyon. Sa akong kabahin, nakasinati kog kalibanga ug rectal bleeding. Naapektohan ang akong pantog ug sige kog ihi-ihi. Milagom ang akong panit dapit sa balat-ang kay napaso sa radyisyon.
Sa laktod nga pagkukasulti, nakasinati kog kahasol ug kalisod sa akong radiation therapy. Apan akong gidasig ang akong kaugalingon. Sa panalangin sa Ginoo, hugot ang akong pagtuo nga maulian kos akong prostate cancer sa mga tambal ug sa lig-on nga immune system pinaagi sa pagbaton og positive attitude, hustong pagkaon, ehersiyo, igong pagkatulog ug pagpahulay, pagbulad sa adlaw ug paglikay sa sigarilyo ug sobrang pag-inom sa makahubog.
“Congratulations, Sir! You are cancer free,” matod sa akong radiation oncologist. “Apan ayaw palabig kaon og letson ug mantekaong mga pagkaon, tungod sa posibilidad nga mobalik ang kanser kon abusahan ang lawas.”
