Gikan sa Maha Vihara Duta Maitreya Temple, mibisita mi sa Batik Factory Outlet diin namalit mig hanbag, panyolon ug ubang mga butang nga ginama sa batik nga panapton. Gisunod namog bisita ang Batam Chocolate Factory. May inandam nga klase-klaseng tsokolate nga tilawan. Kaming tanan makaangay sa mga tsokolate nga ginama sa Batam, mao nga namalit mi sa ilang tsokolate bisan og nakapalit na mi didto sa Singapore.
Gikan sa Chocolate Factory, gidala mis among tigtultol sa panaderya sa layer cake (taman ra mis tilaw) ug sa tindahan sa mga ready–to-eat nga seafoods delicasies nga gisulod sa plastik (tanan mitilaw apan dili tanan mipalit). Gisunod namog bisita ang Pondok Wisata Cultural Show ug mitan-aw sa mubong pasundayag nga naglakip sa usa ka lumadnong sayaw, sa pagbunot og lubi gamit ang ngipon, ug sa pagkaon og bildo ug baga. Way bayad ang pagtan-aw, apan dawaton ang donasyon basta dili lang sensilyo. Gipahimangoan mi Ms. Tini mahitungod sa sensilyo.
Gikan sa Wisata Cultural Show, misulod mis Golden Prawn 555 Seafood Restaurant sa libreng paniudto. Tiyan-tiyanan mi sa paggawas sa restawran tungod sa isda, kasag, kinhason ug utan nga gidalit kanamo.
Sayo ming mibalik sa Singapore kay nasaboton nga mobisita sa Singapore Flower Dome (SFD), busa nakabayad mig SND3 kada usa isip multa sa kausaban sa among lakaw. Human gibilin sa hotel ang among mga pinalit sa Batam, miadto mis “Gardens by the Bay” ug misulod sa flower dome sa among kaugalingon gasto. Dili maihap ang kadaghan sa klase sa mga bulak nga gitapok-tapok pagtanom ug nindot ang pagkahan-ay. Matud pa, milyones ang gasto matag bulan sa pag-atiman sa mga bulak ug tanom sulod sa dakong simboryo. Apan tungod kay gabii, dili klaro ang mga hulagway nga among nakuha. Hinuon, nakatan-aw mi sa pasundayag sa dancing lights sa “tulo ka tore sa mga bulak” gawas sa simboryo.
May Mc’Donalds duol sa flower dome, diin among nahinabi ang duha ka Pinoy nga nagtrabaho sa kan-anan. Nanihapon mig hamburger, sa wala pa mobalik sa among hotel sakay sa tourist bus nga mitagbo kanamo sa Harbour Front gikan sa among biyahi sa Batam. Gitabangan mi ni James sa paghangyo sa drayber nga ihatod mis SFD ug ibalik sa among hotel. Nalipay ming misugot ang drayber kay mahiusa mi pag-adto sa “Gardens by the Bay” inay tag-upat og sakay sa taksi. Mibayad mis drayber og SND50 nga among giamotan.
Nianang pagkagabii, akong gibalik-lantaw ang mga panghitabo sa among pagsuroy sa Singapore ug Batam. Nalipay miy nga nakadayon gyud pag-uban ang magtiayong Toto ug Linda Caiña. Duha ang katarungan nga nagduha-duha silang mopadayon. Una, tungod sa kaapiki sa kuwarta. Ikaduha, tungod sa duha nila ka apo (ang usa siyam pa ka bulan) nga ilang giatiman. Sa kaulahian, nakahukom ra gayud sila nga mokuyog. Apan sa oras nga gikasabutan, wala sila moabot. Amo silang giagian sa ilang balay ug nalipay mi nga amdam na diay sila. Nalangan lang kay nag-atiman pa sa ilang puyang apo nga nahitabo sad nga may hilanat. Gisabot nila ang ginikanan sa asawa sa ilang anak nga adto una magpuyo sa ilang balay aron dunay magtan-aw sa mga bata.
Kanhi empleyado si Toto Caiña sa Municipal Trial Court sa Valencia City. Si Linda wala magtrabaho ug maoy nag-atiman sa ilang panimalay. Hilomon si Toto apan maayo siyang mangulo sa pag-ampo ug sa pagpaambit. Usa siya sa mga lector sa among ginahimong mga seminar. Siya sad ang daling makuhit nga mag-emse kay morag brodkaster sa radio ang iyang tingog.
