PAMAGDOY SA SINGAPORE, BATAM UG KUALA LUMPUR (b8)
Mibiya mis Singapore sa ikaupat ka adlaw sa among group tour (June 17). Alas onse pa sa buntag ang among biyahe paingon sa Kuala Lumpur, busa among gipahimuslan ang higayon sa pagkuhag hulagway sa hotel ug silingang mga edipisyo ug sa pag-kukabildo sa among estoryador nga tigtultol.
Gihatod mi ni James Sing didto sa terminal sa StarMart Express sulod sa Golden Mile Complex. Didto mi nagpaabot sa oras nga ihatod mis tourist coach paingon sa Kuala Lumpur.
Nakapaniudto ang tanan gawas kanako nga naapsan sa oras sa kalinga sa pagsuroy sa mga tindahan sulod sa Golden Mile Complex. Nag-order kog take-out nga pagkaon (rice, fried chicken ug fried lumpia) apan wala matandog kay gidili ang pagkaon sulod sa sakyanan.
Nanaog mi sa Woodlands Checkpoints bilin ang among mga bagahe sa sakyanan ug mipila aron human matatakan ang among mga pasaporte ug makagawas sa Singapore.
Ang Singapore nga kanhi kabahin sa Malaysia mora lag apendiks sa dakong yuta. Mitabok mis Malaysia agi sa Johor-Singapore Causeway. (Ang Singapore nagkuhag tubig sa Malaysia ug dinhi sa 1056 metros nga tulay nag-abay ang tubo sa tubig).
Nanog mis Johor Bahru Railway Station ug mipila sa immigration/customs counters aron matatakan ang among pasaporte ug makasulod sa Malaysia.
Unom ka oras ang dagan sa sakyanan paingon sa Kuala Lumpur gikan sa utlanan sa Malaysia ug Singapore. Ug sulod sa maong panahon walay hunong ang telebabad sa iyang selpon ang drayber nga usa ka Bombay. (Grabi ang unli sa Malaysia, maoy diha sa akong hunahuna). Bisag nagbunok ang ulan, makita nako ang walay bugto nga plantasyon sa palm oil. Nahinangop sad kong naglantaw sa walay bugto nga kutay sa kahoy sa masigka-daplin sa luag ug sementadong dalan. Walay konstraksyon ug reper sa kadalanan, sahi sa Bukidnon nga ang dalan gipangguba aron ilisan og bag-o. Kausa ra mi gihunong sa drayber ug ang tanan dali-daling nanaog aron kahatagag kahupayan ang among nag-alburotong pantog.
Gitagbo mi og laing sakyanan pag-abot sa KL. Kusog gihapon ang ulan nga matud pa sa among tourist guide epekto sa climate change kay dili man ting-ulan niadtong panahona. Hapit na alas otso sa gabii sa among pag-abot sa Arenaa Star Hotel.
Mi-check-in mi didto sa lobby ug misaka sa ikapitong andana diin didto ang among mga kwarto. Mas luag ug mas nindot ang among kuwarto sa Arenaa Star Hotel kon itandi sa Fragrance Hotel-Pearl. May duha ka single bed nga gitapad. Bildo ang bongbong sa comport room ug shower.
Nagdali mig kanaog ug nanihapon sa usa sa kan-anan atbang sa hotel. Nakaunag tangka sa lamesa silang Fr. Arnold ug Fr. Nonoy. Hapit tanan miawat sa ilang gi-order nga rice topping. Hilig kog sweet-n-sour fish apan nakurat ko sa pag-abot sa among order kay may sagol kining kalabasa ug basaon ang pagkaluto. Ako lang giagwanta ang morag “lawog sa baboy” nga pagkaon. Medyo mahal ang pagkaon ug sama sa Singapore walay senior citizen’s discount.
May libreng wi-fi sulod sa kuwarto ug nag-dawonlod kog mga hulagway sa “Facebook”. Ug pinaagi sa “Facetime”, nakighanabi ko sa akong ka-tokayo nga anak nga atua nagpuyo sa Australia uban sa iyang pamilya.
