Naniudto mis Chinatown sa wala pa mi magsugod sa among tunga sa adlaw nga Sentosa Tour. Gidala mi sa among tigtultol didto sa Faber Peak agi sa Vibo City ug Harbor Front Centre ug misakay sa Sentosa Cable Car (SCC) paingon sa Merlion Plaza. Luag ang Merlion Plaza ug daghang lugar nga kasuroyan, busa nagbulag-bulag mis among pagsuroy-suroy.
Kadaghanan sa among kauban misulod sa Madame Taussauds Museum aron motan-aw ug mag-selpe sa mga talo nga imahe o estatuwa sa inilang mga artista, atleta, musikero ug lider sa kalibutan. Ang uban didto ras mga parke sa gawas nagsuroy-suroy.
Samtang nag-paabot sa among mga kauban nga didto sa Wax Museum, ako, si Pat, Rudy, Lory, Bernie ug Dodong nagkalingawg inom og kape sa Starbucks. Kay wala pa mahiusa kanamo ang among gibaabot, nananghid ang magtiayong Rudy ug Lory nga mosuroy sa parke sa Merlion Plaza. Nalingaw ang magtiayon sa pagkuhag hulagway sa ilang naagian ug nalimot sa oras. Ang among panaw maoy unang higayon nga sila nakasuroy og laing nasod.
Wala pa gihapon makabalik sa Starbucks si Rudy ug Lory pag-abot sa oras nga mohawa na mis Merlion Plaza ug moadto sa Underwater World. Tungod sa pag-apora ni James, mibaktas mi paingon sa estasyonan sa cable car nga mohatod namo ngadto sa Siloso Point nga wala si Rudy ug Lory. Mibalik kos Starbucks pagpangita kanila. Miapas si Bryan nga nabalaka nga hasta ko mabiyaan ug mahimulag sa pundok. Mao say pagbutho sa among gipangita sa pag-abot ni Bryan ug nagdali ming miapas sa among mga kauban nga didto nagpaabot sa sakaanan sa kebol kar.
Ang kakulba nga gibati ni Rudy ug Lory sa ilang pagkahimulag sa pundok, naulian sa didto na sila sa itaas sakay sa kebol kar. Makita kini sa ilang mga selpe samtang nagsakay sa kebol kar.
Ang magtiayong Rudy ug Lory Asparo nangaahente og yuta, motor ug aplayanses, busa dili katingalahan nga kanunay sila nag-ubag sakay sa motorsiklo sa ilang paglibot-libot lungsod ug sa kabaryohan. Si Rudy usa sa pinakaaktibo ug masaligan nga sakop sa among kapunongang laygo. Isip chapter servant, siya ang tuong kamot sa chapter head. Ang magtiayon membro sa BSD Choir ug aktibo sa tanang kalihokan sa Banay sa Dios. Aktibo sad sila sa mga kalihokan among kapunongan sa senior citizens, diin si Rody usa ka director ug awditor ug ako ang bise presidente. Si Rudy dayag nga magdadayeg sa akong mga sinulat. Nabasa niya ang akong duha ka libro ug ang tanan kong sugilanon, gumalaysay ug artikulo nga napatik sa Bisaya Magasin.
