Gikan sa Merlion Plaza, misakay mis Sentosa Cable Car ug nanaug sa Siloso Point. Nagbulag-bulag mig suroy sa Siloso.
Human sa among suroy sa Siloso Point, misakay mig Sentosa Beach Tram padulong sa Underwater World. Sulod sa 83 metros nga tanel, nalingaw mig tan-aw ug kuhag hulagway sa mga isda nga nagsaoysaoy sulod sa aquarium. Taman ra ning bulana ang operasyon sa Underwater World kay wa mabag-o ang ilang prankisa. Busa walay Dolphin Show kay gibalhin ang mga dolphin didto sa Hongkong.
Gikan sa tanel sa Underwater World, namahuway mis gawas ug nagbanding-banding sa wala pa manakayg balik sa beach tram sa among pag-adto sa Siloso Beach aron pagtan-aw sa “Wings of Time”.
Ang “Wings of Time” usa ka multi-sensory extravaganza nga nag-asoy sa hinanduraw nga panaw sa duha ka nagkahigugmaay latas sa katuigan ug kawanangan. Talagsaon ug nindot ang pasundayag bisan pag nagkurog ang akong kamot sa pagkuha sa kapin sa napulo ka minuto nga bidyo sa akong Sony kamera. Nalingaw ning tanan, lakip na si Sony nga naghigda sa bleacher samtang nagtan-aw sa salida.
Si Sony Garcia ang pinakabatan-ong membro sa Governance Team apan sa among mga ginahimong “Covenant Orientation” ug “Marriage Enrichment Retreat”, siya ang kanunay matugahan sa pagpaambit mahitungod sa kaminyoon ug sa pamilya. Makadasig ug kapanaminan ang maayong relasyon sa magtiayong Sony ug Albeth ug sa ilang mga anak. Amo siyang pangulo sa BSD sa Valencia City sa wala pa mopuli ang among kasamtanganng chapter head nga si Joel Jumawid. Ang mag-asawa pulos dentista ug dunay kaugalingong klinika sa Valencia City.
Nanihapon mi daan sa wala pa mosulod sa Siloso Beach, busa diretso ming gihatod sa sakyanan sa among hotel human sa pasundayag. Migawas mi sa Sentosa labang sa lapad nga Sentosa Boardwalk nga nabantog sa lanubong dayan-dayang mga tanom sa duha ka daplin niini.
Sulod sa sakyanan nahisgutan namo ang Universal Studio theme park nga usa sa gihugopan sa mga turista apan wala maapil sa among itineraryo. Wala say igong panahon sa pagsulod sa Universal Studios sa among kaugalingong gasto, busa igo ra miy sa pagpangandoy nga unta makabalik sa Singapore ug makasulod sa Universal Studios.
