ORKESTRA SA KALIKOPAN

Samtang naglingkod sa dakong
Bato nga gilandongan sa kahoyng
Nag-akbo sa linawng sapa
Nagtan-aw sa mga ulang nagkitkit
Sa gisabwag nga lubing kinagod
Akong gidimdim ang melodiya
Sa orkestra sa kalikopan
Ang haruhayng agos sa tubig
Ang makapadukang hunghung sa huyuhoy
Ang matam-is nga kasa sa kadahonan
Ang madamgohong awit sa kalanggaman.