Naaghat kog balik-sulat mahitungod sa online buying tungod sa akong nabasa sa Facebook account sa akong amiga.
Mao ni ang iyang post o gisulat :
“I WAS DUPED! Ang FB online order ay 3 gowns for P1000, ang dumating ngayon lang ay t-shirts. Huwag gumaya sa akin. If the price is too good to be true, it is definitely fake.”
Ang post nakaaghat og daghang mga komentaryo. Niay pipila:
“Tinuod jud na Maam.”
“I can relate.”
“Maraming scammer ngayon, victim po ako. Ingat po tayong lahat.”
“Na-scam sad mi. Nag-order barong P1300. Unya ang nag-abot t-shirt nga baratohon.”
Sa akong kasinatian, makalingaw ang online buying o pagpalit agi sa internet. Apan may panahon nga bation kag kalagot.
Nakat-on kog online buying niadtong mitunga ang coronavirus pandemic. Nahingag kog order og mga epektos nga gihanyag sa daghang mga online seller ug online store. Sulod sa upat ka bulan daghan ug klase-klase ang akong gipalit. Para sa kosina, mipalit kog 7L pressure cooker, butcher knife, boning knife, honeycomb stainless steel wok, uncoated non-stick iron wok, BBQ Grill, multifunctional scissor, kitchen rack, edge knife sharpener, kitchen sink shelf ug fish scale scraper. Sa personal nga gamitonon, mipalit kog egg sitter cushion pad, particle sleeping pillow, orthopedic memory foam pillow, electric neck massager, facial steamer (tuob), X7 smart watch, professional steel reading glasses ug multi-groom hair trimmer. Mipalit kog Chinese herbal products: toothache relief spray, eczema & psoriasis cream ug herbal hair dye. Aron masayon ang pagpamul-ong sa mga bungahoy, mipalit kog high altitude pruning saw. Ang tanan cash on delivery o COD.
Hangtod karon, tigpalitan gihapon ko agis internet.
Kontento kos kadagahan sa akong napalit apan dunay pipila ka higayon nga gibati kog kadismaya ug kalagot. Kalagot sa kaugalingong sayop ug kaligotgot sa online seller nga nanikas o nanglipat.
Ang labing dako nakong pagkailad mao ang pagpalit sa gatas nga kuno makaayo sa diabetis. Nadani ko pagpalit sa maong produkto kay gi-endorse kini ni Dr. Willie Ong. Aron masiguro nga epektibo ang maong gatas, kasamtangan akong giundangan ang tambal nga giresita sa akong endocrinologist. Dakong disgrasya kay pag-abot sa tulo ka bulan ang akong fasting blood glucose misaka gikas normal (110) ngadtos 336. Naaghat ko pagpa-blood laboratory sa dihang di na ko kasabot sa akong gibati. Luya akong lawas, nag-uga akong tutonlan ug sigi kong giuhaw. Subsob sad akong pagpangihi.
Hangtod kahatagag ngipon ang atong balaod sa false o misleading advertisement, naa gyoy mabiktima sa mga pangilad.
Niay akong pahimatngon mahitungod sa online buying pamasin nga makatabang sa uban:
Ayaw pahaylo sa mga dagkong discount sa presyo. Bitik ra na aron mahalin ang ilang baligya. Kon kontento kas presyo, palit. Kon gimahalan ka, ayawg palit. Mas maayo nga imong i-goggle aron duna kay ideya sa hustong balor sa maong butang. Pangitaa ang mga presyo sa ubang mga online seller o online store.
Ang package dili puwede ablihan kon wala pa mabayri. Puwede iuli kon dili ka kontento sa gideliber sa imo. Ikansel ang order. Gani, dunay mga panahon nga ang akong suki nga tighatod mao na mismo ang mosugyot nga ipakansel ang order kay siya diduso ang produkto.
Isulat o i-screen shot ang description/specification sa produkto aron matandi sa produkto nga gibaligya sa iladong mga online store sama sa Amazon Philippines, Lazada ug Shopee. Susiha ang epektos nga imong nadawat kon sibo bas imong giorder.
Isulat o i–screen shot ang ngalan, address, email ug telephone number sa online seller aron imong matawgan kon dunay kay reklamo.
Kon mahimo cash on delivery ang pagbayad. Kon maggamit og credit card sa pagpalit, siguroa nga ilado ug kasaligan ang kompaniya nga nagbaligya aron makakuha kag refund kon gikinahanglan. Basaha ang return policy.
Pagmabinantayon sa mga online seller nga nagbandilyo sa ilang mga produkto diha sa Facebook. Kon mahimo adto palit sa mga iladong online store o sa mga seller nga nagbaligya ang ilang produkto agi sa mga online store.
Maayo ang akong akong kasinatian sa mga online store. Niay usa ka eksampol. Ganahan kog flagship cellphones apan dili maabot sa akong bulsa. Busa, mangita kog secondhand o old model kay barato o discounted ang presyo. Sa Lazada nakapalit kog second hand nga iphone 10 ug old model nga Galaxy Pixel 6. Kontento ug nalipay kos miabot nga mga produkto.
Usbon ko, makalingaw ang online buying apan kon malipat ka, makalagot.
