IKALIMANG ADLAW (Marso 9)
Walay ulan sa kataposan namong suroy sa HongKong. Sa buntag, nagpabilin ming Pat hotel. Si Yong ug Emem miadto sa Central Disgtrict kay nangita og mga dulaan sa bata sa Pop Mart.
Pagkahapon, human sa paniudto, misakay mig tren paingon sa Central Station ug nagsyaping sa Don Don Donki. Sa dugay namong tuyok-tuyok sa Donki, usa ka 30 ml nga Sekkisei moisturizer ug usa ka botelya nga makeup setting spray ra ang napalit ni Pat kay mahal ang mga skin care ug make-up nga iyang nagustohan. Usa ka garapon nga coin chocolate ang akong napalit.
Gikan sa Central, nagbaklay mi paingon sa Ladies’ Market aron mamalit og mga sobiner ug pasalabong. Si Pat mipalit og mga key chain para sa among apo nga si Cyd ug Arya, si Emem para sa iyang mga anak nga si Carl, Clyde ug Chad ug si Yong para sa iyang mga anak nga si Casey ug Caleb. Mipalit sad kog dugang nga mga Hong Kong ug Macao stiker nga akong pasalubong sa mga sakop sa Ang Buhing Pulong Men’s and Women’s Group (ABP MWG) nga ako ang pastoral leader. Nagpalit si Yong og daffle bag para sa among excess baggage sa eroplano.
Nangita kog mapalit nga sapatos kay duna pay nabilin sa HK$1000 nga gihatag ni Yong. Misuroy mis mga tindahan sa sapatos sa kasilinganan sa Ladies’ Market. May nagustohan kong New Balance sneaker nga nagbili og HK$750 (P5,520). Gidugangan ni Yong og HK$350 ang akong HK$300.
Gikan sa Ladies’ Market misakay mig tren paingon Tsim Sha Tsui ug nanihapon sa usa ka mall didto. Human panihapon midalikyat mis Ikea diin mipalit si Pat og gamayng unlan nga magamit sulod sa bus ug eroplano. Nagbaklay ra mi pauli sa hotel.
Nanghipos mis among mga butang pangandam sa beyahi pauli sa Pilipinas. Ang mga bulingon namo ni Pat ug Emem gisulod sa daffle bag. Gisulod sad sa bag ang mga pasalubong nga among napalit. Giputos ni Yong og plastic wrapper ang bag aron dili mabasa ug aron dili sayon mabuksan. Puli sa gihaw-as nga mga bulingon sa akong bakpak, akong gisulod ang nabiling adult underwear ug ang akong napalit nga sapatos. Ang sapatos ni Faith ug Pat didto sa bakpak ni Emem. Didto ra taman si Yong sa NAIA, busa gisulod ang tanan niyang dad-onon sulod sa iyang duha ka bakpak.
Human sa pagpanghipos, migawas si Yong ug Emem aron makigkita sa classmate Yong sa high school. Didto sila mag-abot sa Starbuck duol Regal Kowloon Hotel.
Hulagway 1. Si Yong, Emem, Eme ug Pat sa pasiyohan duol sa Regal Kowloon Hotel
Hulagway 2. Si Eme ug Pat sa luyo sa Regal Kowloon Hotel
Hulagway 3. Si Eme ug Pat sa gawas sa Don Don Donki
Hulagway 4. Panihapon sa usa ka mall sa Tsim Sha Tsui
Hulagway 5. Si Yong ug Emem sa Central District
Hulagway 6. Si Pat ug Eme sa Central District
Hulagway 7. Si Eme ug Pat sa ikaduhang pag balik Ladies'Market
Hulagway 8. Si Yong namalit og pasalubong sa Ladies' Market
Hulagway 9, Si Yong, Pat ug Emem Sa Mong Kok district
Hulagway 10. Si Emem, Pat ug Eme sa Tsim Sha Tsui promenade sa luyo sa Regal Kowloon Hotel
