PAGPAULI (Marso 10)

Sa 9:25 s.b. ang among flight paingon sa Manila. Nagsakay mig bus paingon sa HIA Terminal 1. Didto mi namahaw sa erport. Pag-abot namos NAIA (11:50 s.b.), nagpaabot na si Ryedgee (Jai) ug ang duha ka anak nilang Yong nga si Casey ug Caleb. Gikan sila sa Cebu City diin gipahimuslan ni Jai ang ilang biyahe sa Pilipinas sa pag-adto sa iyang suki nga dentista kay mahal ang dental implants sa Australia.

Nagdagan si Caleb paingon sa among nahimutangan ug mahinangpong mihalog sa iyang daddy. Miamen sad ang bata sa iyang lolo, lola ug tito Emem. Duha pa ka tuig ang edad ni Caleb niadtong Marso 2020 dihang mibisita ang pamilya ni Yong sa Valencia City aron pagtambong golden wedding anniversary namo ni Pat. Wala mahinayon ang kasaulogan kay mitungha ang COVID 19. Usa ka bulan nga natanggong ang pamilya ni Yong sa Valencia City kay April 18 pa ang ilang repatriation flight pauli sa Australia.

Bibo ang among tsikatsika samtang naniudto sulod sa erport. Ang pamilya ni Yong mohapit sa South Korea ug moestar didto og lima ka adlaw sa dili pa mopadayon sa Australia. Ulahi ang flight nila ni Yong (6:00 s.h.) kaysa amoa (5:05 s.h.) busa giubanan mi ni Yong sa check-in area pagpasulod sa among extra baggage.

Hilabihan ang kamingaw ang akong gibati sa among panagkabulag sa erport. Mao sad si Yong ug Jai. Nagkawaykaway si Yong, Jai ug Casey sa among pagpadulong sa departure area. Milingiw ko kay miaksiyon og tulo ang akong mga luha. Diha sa akong hunahuna kon kanus-a na usab mi magkita sa akong sangay nga anak ug sa iyang pamilya. Tungod sa kalayo sa Australia, dili sa tanang tuig makatambong silang Yong sa panagtapok sa among pamilya sa panahon sa Pasko.

Miabot ang among gisakyang Cebu Pacific sa alas 5:15 s.h. sa Laguindingan Airport. Midiretso mis baggage claim area apan wala moabot ang among bagahe. Among gireklamo sa Cebu Pacific ug mipasalig ang among giduolan nga ilang tawgan ang Cebu Pacific sa NAIA aron makarga ang bagahe sa mosunod nga eroplano ug ihatod sa adres nga nasulat sa complaint form nianang pagkagabii o sa sunod adlaw. Ang reklamo gipirmahan ni Emem. Among gitawgan si Yong sa nahitabo. Miingon siya nga dili mabalaka kay marekober ra ang daffle bag.

Sa unsang hitaboa nga wala madungan sa amo ang bagahe? Nahinumdom ko nga sa wala pa molupad ang among gisakyang eroplano may miduol sa gilingkoran namo ni Pat. Nangutana kon kinsa si Emeterio Jr kay wala man sa manifest sa eroplano. Among gisultihan nga wa nahinayon ang iyang pagsakay uban kanamo kay naa siya laing flight. Sa akong suma-suma, wala makarga ang bagahe kay nakapangalan ni Yong. Maayo gani kay ang ngalan ni Emem ang nasulat sa label nga gidikit sa bagahe.

Misakay mig taksi paingon sa Courtyard Subdivision. Nagpaabot si Faith nga eksayted sa among pag-abot. Human manihapon, milarga mi paingon sa Camp Phillips, Manolo Fortich sakay sa Montero Sport nga gibilin ni Emem. Pasado nas 9:00 s.h. sa among pag-abot sa company house nga libreng gipapuy-an sa pamilya ni Emem. Si Emem superbisor sa planta sa not-from-concentrate (NFC) pineapple juice sa Del Monte Philippines sa Camp Phillips, Manolo Fortich.

Walay pay tingpaniudto pagkasunod adlaw ang pag-abot ang among daffle bag nga gihatod sa forwarder sa Cebu Pacific. Taudtaod, miabot si Ernest (among ikaduhang anak) nga mikuha kanamo pauli sa Valencia City.

Samtang nagdagan ang sakyanan akong napamalandongan ang akong beyahe sa Hong Kong ug sa ubang mga nasod. Ang Hong Kong ug Macao mao ang ikapito ug ikawalo ka nasod nga akong nataak: Japan (April 11-July 2, 1985), Singapore ug Malaysia (Mayo 30-Hunyo 4, 2008) Singapore, Indonesia, Malaysia (Hunyo 14-20, 2016), Australia (Marso 19 – Abril 27, 2017) ug South Korea (Mayo 20-26, 2019). Dakong tabang nga may kakuyog sa akong mga beyahe, ilabi na karon nga luya na ang lawas ug limtanon.

Ning among pagbeyahe sa Hong Kong ug Macao, di matukib ang akong pasalamat ngadto ni Yong ug Jai nga migahin og ubay-ubay nga kantidad (P150,000) nga magasto. Wa ko mabalaka sa ilang gigasto kay ang magtiayon may sarang nga kinitaan – si Yong programmer sa dakong advertising firm sa Sydney ug si Jai usa ka nars sa publikong hospital. Gawas sa gasto, naninguha si Yong na mahimong malalim, luwas ug hayahay ang among pamagdoy. Ug sa bulig ni Emem, giseguro nga dili mi ni Pat madagma sa among paglakaw-lakaw. Mapasalamaton pod ko kang Titit sa gipadala nga mabitbit nga lingkoranan ug kang Faith nga mitunol og tag P5000 pocket money kanamo ni Pat. Ug labaw sa tanan, sa panalangin sa Labawng Makagagahom nga walay dautang mahitabo sa among beyahe.