LIMA KA ADLAW SA HONG KONG UG MACAO (2)

Thu, Mar 27, 2025

LIMA KA ADLAW SA HONGKONG UG MACAO

IKADUHANG ADLAW (Marso 6)

Ang Hong Kong usa ka special administrative region sa China. Adunay kiniy 7.4 milyones nga populasyon sulod sa 1,104 km² nga teritoryo nga nakahimo niini nga ika-upat nga densely populated nga dapit sa kalibotan. Pareho ra ang adlaw ug oras sa Hong Kong ug Pilipinas. Mas bugnaw ang Hong Kong itandi sa Pilipinas.

Ilado ang Hong Kong sa ilang arang ug lainlaing mga pampublikong transportasyon (mass transit railway, buses, ferries, trams, taxis ug light rail). Ang Octopus Card ang kasagarang gigamit isip electronic payment kon mosakay og pampublikong sakyanan.

Nagamit si Yong og Wase nga motultol sa mga dapit nga among adtoaan ug kon asa mosakay ug manaog sa taksi, bus ug train. Pinaagi sa Messenger chat, nangayo siyag sugyot ni Charity (Titit) sa mga dapit nga angayan suroyan. Si Titit nga magulang ni Yong, bag-ohay lang nakasuroy sa Hong Kong.

Namahaw mi sulod sa among kuwarto sa hotel sa pagkaon nga gipalit ni Yong sa kan-ana sa gawas. Ang libreng 3-in-1 Nescafe sa hotel ang among gaimnon ni Pat. Si Emem, ang daladala ni Yong nga paboritong bottled ground coffee. Pangandam sa kabugnaw sa gawas, doble ang akong gisuot, sweater ug jacket nga gipagamit ni Yong. Siya ang nagsuot sa akong nipis nga dyaket.

Nag-taksi mi paingon sa Ladies’ Market sa Mongkok District diin gibaligya sa mga stall ug gamayng mga boutique ang baratohon nga mga palaliton sama sa sinina, kasangkapan, alahas, subiner, gadget. Sama sa Quiapo, hinangyoay ang palit dinhi. May nagustohan kong sling bag nga may price tag nga HK$150. Akong gihangyo og HK$100. Gipahangyo sa tindera og HK$ 120, apan sa dihang mobiya na ko, iyang gihatag og HK$100 (P736). Sa laing tindahan, ang unom ka souvenir sticker nga gibaligya og HK$60 akong nahangyo nga dugangan og usa ka sticker. Pahimangno kon mohangyo ka. Sa usa ka stall, nasuko ang babayeng tindera ug namugos nga akong paliton ang sling bag nga akong gisulayan paghangyo. Nga nakapahinumdom kanako sa akong kasinatian sa Palitan Market sa Marawi City niadtong nagtungha pa kos Mindanao State University.

Nag-ulan sa dapit busa mipalit si Yong duha ka payong nga among magamit sa pagsuroysuroy.

Misuroy mis mga tindahan sa Sneaker St. kay nagtugon si Faith nga magpapalit og sapatos. May napilian si Yong apan sa wala pa niya palita iya kining gipakita ni Faith sa Messenger. Nauyonan ni Faith ang O Cloud sneaker nga nagkantidad og HK$1500 (P11,040). Nagpalit sad si Pat og New Balance sneaker (HK$ 399 (P2,936) nga iyang gipulig suot sa nabasa niyang sapatos.

Mipauli mi ug naniudto sa Amazing Thai duol sa hotel. Human sa kadyot nga pahulay sa hotel, gibaktas namo ang Victoria Harhour nga mga duha ka kilometro ang gilay-on. Dag-om ang langit ug ulan-ulan, busa nagamit ang payong nga napalit sa Ladies’ Market. Bisan sa tuhak-tuhak nga ulan, nalingaw mig pasiyo sa Tsim Sha Tsui Promenade. Sa pasiyohan, malantaw ang matalan-awon nga Victoria Harvour, usa ka lawon ug kinaiyanhong protektado nga tubig, nga nag-ulang sa Hong Kong Island ug Kowloon Peninsula. Ang dunggoanan, naila sa panoramik nga talan-awon sa gabii ug kapunawpunawan, ilabi sa direksyon tumong sa Hong Kong Island diin nagpaluyo sa habog nga mga edipisyo ang talay sa mga tagaytay. Dili nako malimtan ang Victoria Harbour kay daghan ang among mga hulagway sa dapit.

Nagbaktas gihapon mi pauli sa hotel, sulod-agi sa mga edipisyo ug subay sa mga dalan. Human sa panihapon sa usa ka eatery sa kasilinganan sa Tsim Sha Tsui Promenade, mipahulay mis hotel samtang nagpaabot sa among yacht night cruise sa alas-9 sa gabii nga gi-online booking ni Yong. HK$492 (P3,624) ang iyang nabayad sa 45 minutos nga paglawig.

Nagpasiyo ug nagkuha mig mga hulagway sa dunggoanan sa Victoria Harbour samtang nagpaabot sa among Dreamer night cruise. Sa yate may libreng sitsiriya ug soft drink. Nagpahulagway mi sulod sa yate ug nalingaw sa paglantaw sa naggidlak nga mga edepisyo didto sa tabok nga bahiya sa Victoria Harbour.