LIMA KA ADLAW SA HONGKONG UG MACAO

Isip birthday gift sa akong ika-80 ka tuig nga natawhan, gisuroy kos akong sangay nga anak didtos Hong Kong ug Macao. Uban sa biyahe ang iyang mama ug manghod nga si Emmanuel (Emem). Ang pamilya ni Emeterio Jr (Yong) didto nagpuyo sa Sydney, Australja sukad pas 2016. Mibisita ang tibuok pamilya sa Pilipinas aron pagtambong sa birthday party nga gipasugdahan sa akong mga anak niadtong Marso 1 didtos club house sa Courtyard Subdivision sa Cagayan de Oro City, diin ang akong kamagulangang anak nga si Faith dunay condo unit. Marso 3 pa ang adlaw sa akong pagkatawo apan gipahigayon ang kasaulogan sa Marso 1 (Sabado) aron makatambong ang akong duha ka apo nga nagtungha sa Manila – si Carl, sa UP Diliman ug si Franxine, sa Ateneo de Manila University. Nalipay kaayo mi ni Pat (akong misis) kay kompleto ang among mga bata ug mga apo sa gihimong panagtapok.

UNANG ADLAW (Marso 5, 2025)

Human sa sayo nga pamahaw sa condo ni Faith, misakay mig taksi paingon sa Laguindingan Airport nga may gilay-on nga 31 kilometro. P800 ang pakyaw sa taksi.

Ang Cebu Pacific nga among gisakyan milupad sa Laguindingan Airport sa alas 9:45 s.b. ug mitugpa sa Ninoy Aquino International Airport (NAIA) sa 11:15 s.b. Human sa paniudto, midiritso mis immigration counter aron matatakan ang among mga pasaporte. (Wa magkihanglag travel visa sa Hong Kong). Ug human moagi sa X-ray scanner, misulod mis departure area sa pagpaabot sa among connecting flight paingon sa Hong Kong. Ang among mga tiket sa ayroplano gilukat ni Yong pinaagi sa online booking (P54,666.00 ang total apil ang travel tax, terminal fee, baggage fee ug travel insurance). Sayon ang among pasikotsikot sa erport kay puro hand carry ang among mga bagahe.

Naghangyo si Yong og wheelchair assistance aron sayon ang akong paglihok sa airport terminal ug sa pagluwan ug pagkawas sa eroplano, apan sa pag-abot sa Ninoy Aquino International Airport ug sa Hong Kong International Airport wala ko mosakay sa wheelchair nga giandam para kanako. Kay kaluoy sa Dios, maayo pa ko molakaw.

Ang ayroplano nga among gisakyan mibiya sa NAIA sa alas 4:12 s. h. ug mitugpa sa Hong Kong International Airport sa alas 6:14 sa gabii. Mi-taxi o mipadagan ang eroplano paingon sa airport terminal 1. Ang HIA nahimutang sa isla sa Chek Lap Kok sa kasadpan nga bahin sa Hong Kong. Sa akong pagsulod sa HIA mibutho ang akong pangindahay nga unta ang NAIA mihisama sa kadako, kanindot, kahapsay ug kahayahay sa HIA nga sa una pang higayon ako nakataak.

Mipila mis immigration counter para sa mga visita. Dali ug way hasol ang pagsuta sa immigration officer sa among pasaporte ilabi na kanako ug sa akong asawa kay unahon pagtagad ang mga senior citizen. Sa tiketa nga gihatag sa immigration officer, mahimo kong magpabiin sa Hong Kong hangtod sa Marso 19.

Gikan sa erport, misakay mig taxi paingon sa Regal Kowloon Hotel diin naka-online booking si Yong. P46,922 ang bayad sulod sa lima ka adlaw. Edaran na ang drayber sa taksi apan kusog kining mipadagan sa one-way- two-lane nga mga dalan. HK$ 300 (P2,210.00) ang nabayad ni Yong sa taksi. Mga 32 kilometros ang distansiya sa erport ug sa Regal Kowloon Hotel nga nahimutang sa 71 Mody Road, Tsim Sha Tsui East, Kowloon.

Mi-check-in mis hotel. Nanimahong sigarilyo ang lawak nga gireserba kanamo sa ikaupat nga andana, busa mibalik si Yong sa reception/front desk aron moreklamo. Gibalhin mis Room 509. Sama sa nahaunang lawak, aduna kiniy duha ka lapad nga mga katre. Ang usa salohan nila ni Yong ug Emem, ang ikaduha, kanako ug ni Pat. Human mapahiluna ang among mga bagahe, nanaog mi ug mipaingon sa Tsim Sha Tsui Promenade nga pipila lang ka lakang gikan sa hotel. Gabonon sa gawas ug gikuray kos 14°C nga temperatora bisag baga ang dyaket nga akong gisuot. Mao sab si Pat. Ok ra si Emem kay batan-on pa ug si Yong kay naanad sa kabugnaw sa Sydney. Misaka mig balik sa hotel human manihapon sa usa sa daghang mga kan-anan duol sa promenade.