We are each our own devil, and we make this world our hell.
6:00 sb. Natulog pa ang iyang asawa sa iyang pagsugod sa naandang buluhaton sa kosina. Una, nag-defrost og isda nga un-onan. Gisunod ang paglung-ag gamit ang rice cooker.
Samtang nagpaabot nga mahumok ang isda, naghiwa siyag luy-a, ahos ug sibuyas bombay nga ipanakot sa inun-onan. Naglain siyag ahos ug sibuyas alang sa scrambled egg nga kaulahian niyang lutoon. Ang panakot alang sa itlog iyang gipino paghiwa apil na ang kamatis.
Diha niya giluto ang inun-onan sa induction cooker kay may timer ug malikayang matiti ang sabaw o mapagod ang isda. Iyang gitak-ang sa gasul ang takuri nga may nilagang luy-a. Sa dili pa mamahaw, iyang inmon ang nilagang luy-a nga sagolan og pulbos nga turmeric kun dulaw. Tambal kini sa iyang artritis.
Gamit ang peeler, nagpanit siyag usa ka buok pipino nga iyang himoong salad. Sapoton ang iyang asawa kon dunay hugaw sa kosina busa gihipos niya ang panit sa pipino, sibuyas ug ahos ug gisulod sa basurahan didto sa gawas.
Sa natad duol sa kosina dunay labong nga dragon fruit. Kini ang unang punoan sa dragon fruit nga iyang gitanom. Nihit na kini mamunga kay kulang sa init sa adlaw kay nahawngan sa katapad nga abana, Dunay kusog manungang mga punoan sa dragon fruit sa ubang dapit sa residential lot apan wala niya kini puoha kay maoy iyang kuhaag lindog kon may mangayo og itanom.
Ang tag-as nga mga lindog o balagon sa dragon fruit makasagabal na sa agianan. Mikuha siyag sundang ug gipul-ongan ang dragon fruit. Mipasad ang pinutol nga mga lindog sa kaktus sa sementong agianan kilid sa balay. Iya na untang hiposon ang mga pinutol apan misitsit ang takuri sa pagbukal sa linaga. Misulod siyas kosina ug gipalong sa gasul.
Nag-ipis siya sa linagang luy-a sa pagbutho sa iyang asawa sa kosina. Mideritso kinig gawas. Sa dili pa mamahaw, manilhig ang iyang asawa sa natad ug mamubo sa iyang gikaang nga pang-adornong mga tanom.
“Nganong gibiyaan ning sagbot diris gawas?” masuk-anong tingog sa iyang asawa.
Gibiyaan niya ang linagang luy-a ug migawas.
“Ako man nang hiposon.”
“Unya nganong nagkatag man ni dinhi?”
“Akong nabiyaan sa pagsitsit sa takuri.”
“Naanad gyod ka nga biyaan ang imong gibuhat. Hala, hiposa nang imong sagbot.”
Tagsa-tagsa niyang gipamunit ang pinutol nga mga lindog sa dragon fruit ug gilabay sa bakanteng lote gawas sa koral.
Nagpadayon pagyawyaw ang iyang asawa samtang ninilhig sa nangatagak nga mga dahon sa rambutan ug mga gihay sa bulak sa abana. Naghilom lang siya aron dili modako ang lalis. Apan wala moundang og yawyaw ang iyang asawa ug bisan unsa na lang ang gipanulti nga walay kalabotan sa dragon fruit. Naanad na siyas kinaiya sa iyang asawa sa pagbalik-balik og ugkat sa karaang mga panghitabo ug reklamo. Apan miapaw ang gantangan sa iyang pailob. Misurok iyang dugo. Naglagot siya.
“Hilom na,” midako ang iyang tingog.
“Uy! ayaw kog singkahi. Gusto kag gubot?”
Dili siya gustog gubot busa wala na siya motubag. Naglikay siya nga mosaka ang iyang blood pressure kay miagi na siyag mild stroke. Nagpadayon ang alingogngog nga yawit sa iyang asawa samtang hilom siyang namunit sa pinutol nga mga lindog sa dragon fruit. Unya, nahaigking siya sa dihang natusok ang iyang kumagko sa hait nga tunok sa kaktus. Apan daklit ra ang kahapdos nga iyang gibati kay kalit nga napalong ang iyang panan-aw. Sa iyang pagyanghag ngadto sa gigikanan sa masuk-anong tingog, dili tawo kon dili usa ka dragon ang iyang nakita.
