IKATULONG ADLAW (Marso 7)

Walay ulan sa ikatulo namo ka adlaw sa Hongkong. Si Yong ug si Emem ra ang nagsuroy sa buntag kay gipapahulay ang mga senior sa hotel. Apan sa wala pa sila mobiya nagpauban ko ni Yong sa pagpalit og wireless charger-power bank sa usa ka electronic store duol sa hotel. Ang power bank nga nagkantidad og HK$200 (P1,470) akong gipalit gikan sa gihatag ni Yong nga HK$1000. (Sa wala pa mi mobiyahe, Si Pat, Emem ug ako gihatagan ni Yong og tag-HK$1000).

Human sa paniudto, misakay mig taksi paingon sa The Peak. Gikulbaan si Pat sa kakusog nga dagan sa taksi paingon sa taluktok agi sa two-lane-two-way nga dalan. HK$150 (P1,100) ang nabayad ni Yong sa taksi. Ang The Peak kapin sa 11 kilometro ang gilay-on gikan sa Regal Kowloon Hotel.

Ang taksi maoy sagad ug hamugaway nga sakyanan sa Hong Kong. Kay naa mis sa dakbayan, ang red taxi (urban taxi) ang among masakyan. HK$29 (P214) ang flag-down rate ug HK$2.1 (P15) ang dugang nga plete matag 200 ka metro o usa ka minuto nga hunong. Hapit tanang taksi sa Hong Kong XS10 Toyota Comforts nga naggamit og liquefied petroleum gas (LPG). Hamugaway sakyan ang sedan kay nipis ang mga pultahan ug yano ang desinyo sa sulod.

Ang Victoria Peak (The Peak) usa ka makasaysayong dapit ibabaw sa Victoria. May mga luho nga mga condo ug estaylis nga mga kan-anan sulod sa dapit. Isip pungkay sa Hong Kong Island, ang The Peak kasamtangang naila nga labing eksklusibo nga kasilinganan ug puloy-anan sa mga dato ug iladong mga tawo. Didto mi mipasiyo Sky Terrace 428 ug misulod sa Peak Galleria.

Ang Sky Terrace 428, nga nagtindog 428 metro gikan sa lebel sa dagat mao ang pinakahabog nga lantawanan sa Hong Kong. Una ming miadto sa terasa aron paglantaw sa mga maanindot nga mga talan-awon sa palibot nga gihimong bakgrawon sa among pagpahulagway. Giliminan og nipis nga gabon ang taluktok nga nakadugang sa katugnaw sa dapit. Sa akboanan sa terasa, among madung-aw ang tag-as nga mga bilding sa ubos ug malantaw ang Victoria Harbour sa unahan. Wala mi mosaka sa Peak Tower nga kasikbit sa terasa kay sawanon si Pat sa kahabog. Hinuon, dali ming misulod sa Peak Galleria kay gikuray ming Pat sa katugnaw sa gawas.

Ang Peak Galleria nga nahimutang duol sa taluktok sa Victoria Peak sa Hong Kong Island, usa ka lulinghayawan ug talagsaong palitanan ug dugokanan sa mga turista. Nagkape mis Starback sa wala pa mi magsuroysuroy sulod sa galeriya. Nagpahulagway mi sa makaagni nga mga dapit sulod sa galeriya aron dunay handoman sa among pagbisita dinhi.

Doble-deck bus ang among gisakyan sa among pagkanaog paingon sa Central Station nga nahimutang sa kinauyokan sa Central Business District (CBD). Ang Central Station sa Hong Kong usa ka medyor mass transit railway ug transport hub diin didto mobiyahe sa ubang mga dapit sa dakbayan. Kinahanglan ang octopus card aron nakaagi kas turnstile o automated gate ug makasakay sa tren.

Migawas mis Central Station ug misuroy sa dagkong mga tindahan duol niini. Nakalabay mig tindahan nga namaligyag sitsaron. Nahimuot sa Pat sa iyang pagpalit og usa ka putos kay bisag way pakapin nga suka, Pinay ang tag-iya.

Gikan sa Central Station misakay mig bus paingon sa Tsim Sha Tsui (TST). Ang TST distrito sa mga palitanan ug nightlife sa Kowloon. Gihugopan sa mga taga-Hong Kong ug mga bisita ang kaswal o dinalian nga mga kan-anan ug mga siot nga tindahan nga nagtapok sa neon-lit Nathan Road ug ang mga luhong tindahan nga naglinya haduol sa Canton Road. Giila usab ang TST nga usa sa pinaka mauswagon mga dapit sa dakbayan, sa mahalong mga hotel ug sa mga opisina sa habog nga mga edipisyo.

Nakatabang ang salonpas para sa lapalapa nga gipabalon ni Ryedgee (asawa ni Yong) kontra pamaol sa among pagbaktas ug suroy sa train station ug sa Tsim Sha Tsui. Nakatabang sad ang mabitbit nga lingkoran nga gipadala ni Titit kon kinahanglan ko mopahuway. Nga ako sad gigamit nga sungkod aron dili malimbuwad o madagma.

Sulod sa kapin sa oras namong suroy-suroy sa Tsim Sha Tsui, usa ra ka sweater ang napalit ni Pat. Hinuon, sinalindot ang kakapoy, nalingaw si Pat sa syaping.

Ang among hotel nahimutang sa sidlakang bahin sa Tsim Sha Tsui. Nagbaklay mi pagpauli ug nanihapon sa kan-anan sa kasilinganan sa Regal Kowloon Hotel. Sa wala pa matulog, kaming upat dukiros mig browsing sa among mga selpon (subay, basa ug post sa Facebook ug tawag sa Messenger). Kusog ang wi-fi signal sa Regal Kowloon Hotel. Si Yong ug Emem nag-inom og serbesa nga pampatulog.