Nag-ambahan ang kilat ug liti
naggakos ang bagyo ug baha
sa usa ka mabangis nga sayaw
sa masuk-anong kinaiyahang way gipili.
Naglubaylubay ang mapailobong kawayan
nunot sa haguros sa mabangis nga unos
samtang sulod sa iyang palda nag-ambitay
sa kainit sa lawas ang usa ka banay.
Nag-ampo ang nag-inusarang kahoyng maas
nga siya dili biyaan sa kaisog ug kusog
samtang ang mga langgam nagkurog
nagpasilong sa gitamparos nga kadahonan.
Sa basakan nga sa baha gilunopan
ang yukog ug lusbog nga mga uhay
sa buros nga humay nangandoy
sa lab-as nga hangin.
