Hunyo 16. Adlawng natawhan ni Rene. Alas kuwatro sa kaadlawon amo siyang gi-manyanitahan. Nagbukot pa si Rene sa among pagsulod sa lawak apan si Pepang nga daan nang giabisohan sa among buhaton, taudtaod nang naghulat kanamo. Pinugngan ang among kanta, apan kita sa panagway ni Rene ang kahimuot sa among pagtimbaya kaniya sa ika-55 nga kasaulogan sa iyang natawhan. Human sa pag-ampo ug pray over, namalik mis among tagsa-tagsa ka lawak ug nangandam sa among lakaw didto sa isla sa Batam, Indonesia.
Nagpasidaan si James nga estriktong sundon ang among itineraryo, busa naghilom lang mi sulod sa sakyanan paingon sa Harbour Front nga wala si Sony ug Albeth. Apan ang among gibating kaguol gipulihan sa kalipay kay nakaapas sila sakay og taksi. Naglinya na mi sa immigration checkpoints (pagpakita sa among pasaporte ug disembarkment card) sa ilang pag-abot.
Sugilon ni Sony wala sila malimot sa oras sa pagbiya sa hotel. Nagpaabot lang sila sa paglarga ang among bus. Ang sipyat kay dili mao ang bus nga gilantaw ni Albeth.
Ang Batam usa ka gamayng isla sa Indonesia. Usa kini ka free trade zone nga daghag bisi nga dunggoanan, ilado sa iyang mga baybay ug duty free shopping sa mga mols. Ang Batam mga usa ka oras tabokon sa ferry boat gikan sa Singapore, latas sa Singapore Strait. Sa Batam Port, gitagbo mi ni Ms Tini, ang among tourist guide nga usa ka Muslim. Human mipailaila sa iyang kaugalingon, iyang gipaambit kanamo ang mga kasayoran nga angayang mahibal-an sa mga turista sa Batam. Tibuok adlaw ang among itineraryo sa Batam.
Nanaog mi sa Maha Vihara Maitreya Temple, ang pinakadakong templo sa Southeast Asia. Ang Vihara Duta Maitreya natukod naidtong 1991 ug gawas sa mga ampoanan dunay kompletong tunghaan sa kindergarten, elementarya ug hayskol.
Human sa pagtan-aw ug pagkuhag hulagway sa estatuwa sa Buddha Maitreya ug ubang estatuwa sa buddha (Buddha Gautama, the Goddess Kwan Im, Satya Kalama, Amitabha, Baisajyaguru) mibalik mis among sakyanan ug mipadayon sa among suroy.
Niadtong 2008, ako ug si Pat misuroy sa Singapore ug Kuala Lumpur sa pagdapit sa among anak nga maoy nag-abaga sa gasto ug nagsilbing tourist guide. Apan karon pa mi makataak sa Batam. Bisan ug morag lag ordinaryong lugar sa Pilipinas ang Batam, nalingaw ang akong asawa nga hilig sa bakasyon.
