Gikan sa among suroy sa Civic District sa islang nasod sa Singapore, nanaog mis Merlion Park aron sa paglantaw sa Marina Bay ug pagkuhag among hulagway atubangan sa dakong estatuwa sa Merlion.
Ang Singapore walay kaugalingong kamugnaan kultural busa gimugna sa kadagkoan sa turismo sa nasod ang hinanduraw nga lalang nga ang ulo liyon ug ang lawas isda. Ang karakter sa Merlion kombinasyon sa tradisyonal nga ngalan sa dapit (Temasek) nga kanhi usa ka balangay sa mangingisda ug sa bag-o niining ngalan (Singapura) o siyudad sa liyon.
Ang dakong estatuwa nga gipatindog niadtong 1972 ug gama sa semento, plato ug tasa sa tsa, nahimong dakong atraksyon sa Singapore.
Gawas sa estatuwa sa Merlion, sa among mga litrato makita ang Espalnade Bridge ug Marina Bay Sands, usa ka integrated resort sa Marina Bay ug giila nga pinaka-mahalong casino sa tibuok kalibutan.
Gikan sa Merlion Park, mibisita mis Thian Hock King Temple (usa sa labing karaang Buddhist-Taoist nga templo) sa wala pa mi mopadayon ngadtos Chinatown.
Sa Chinatown namalit mig imported nga tsokolate didto sa Chocolate Gallery. May sale nga tsokolate nga SND20 ang tulo ka pakete ug mao ang among gipamalit. Namalit sad mig tisirt nga SND10 ang tulo ka buok. Nalingaw ang among mga asawa nga grupo-grupong naglantawg mga tinda sa Bugis Junction.
Sa tibuok buntag, nalingaw si Tessie pagkuhag hulagway sa iyang kauban sa panaw. Maalaan si Tessie nga estrikta tungod sa iyang pagka- stickler o pagka-kutihan sa mga lagda o pamalaod ug tungod sab tingali kay seryoso sa iyang pagka-maestra. Apan sa tinuod lang, dako ang tabang ni Tessie sa among biyahe. Sa among mga kauban nga mao pa makabiyahi gawas sa nasod, nakatabang ang iyang mga tips o giya sa mga angayng buhaton. Siya ang kanunayng nag-una sa check-in counters sa pagpasulod sa among bagahe nga dili bibiton ug sa paglukat sa boarding pass. Pipila ka adlaw sa wa pa mi molarga, iya ming giaporan og sudlanan sa tambal (para hay blad, dayabitis, hilanat, kalibanga, butod, kabuhi, ubp.) ug sudlanan sa personal nga galamiton (toothbrush, toothpaste, razor, lotion, moisturizer, cologne, hair gel, facial cleaner, deodorant, mouthwash, wet tissue paper, cotton balls, cotton buds, Salonpas patch, ubp.).
Daghan nang nasod ang nasuyoran sa magtiayong Pet ug Tesie Taganahan, lakip ang ilang “Trip to Holy Land” kauban sa magtiayong Rene ug Pepang.
Si Pet Taganahan kanhi namong chapter head. Siya ang misunod kang Fil de los Reyes nga maoy unang pangulo sa among kapunongang laygo. Iyang gipaambit ang iyang panahon ug talento sa iyang pagpangulo sa singing ministry ug sa pagtudlo sa BSD Choir sa mga kalantahon sa among binulang sponsored mass ug asembleya. Si Pet nga gikan sa siminaryo, naminyo kang Tessie. Retirado siyang propesor sa Central Mindanao University, samtang si Tessie kasamtangang nagtudlo sa CMU sa sabdyek nga physics.
