PAMAGDOY SA SINGAPORE, BATAM UG KUALA LUMPUR (b10)

Gikan sa King’s Palace, miadto mis Independence Square labay sa National Monument, diin nalingaw mig hangad-hangad ug pagpa litrato sa mga dagkong edipisyo. 

Mipadayon mi sa KL City Galery ug misulod sa galeriya ug museyo sa Merdeka Square. Ang Kuala Lumpur City Gallery usa ka makaikag nga lugar diin makita ang koleksiyon sa mga pinintal ug litrato nga nagbatbat sa kasaysayan sa Kuala Lumpur. Sa agianan sa galeriya gi-displi ang kasaysayan sa Malaya (ang daang ngalan sa Malaysia) nga kanhi kolonya sa Britanya ug sa Kuala Lumpur nga kanhi usa ka tin-mining settlement. Midayeg mis ilang “city model show”, nga nagpakita sa pisikal nga kalamboan sa Kuala Lumpur. 

Sa sulod sa Arch Kuala Lumpur gihimo ug gibaligya ang mga way katumbas nga kinulit nga kahoy nga nakapahimong bantogan sa Arch. Usa na ang kinadak-ang Kuala Lumpur Skyscrapers mural nga kinulit sa kapin 20 ka klaseng kahoy. Akong gikuhaag hulagway ang usa ka artesano nga nagkulit og pinong mga gama sama sa gamayng hulad sa Petronas Twin Towers.  Sa City Gallery Gift Shop daghang mga hinimo nga panggasa ug pang-subenir. Didto namalit mig mga subiner sama sa key chain, pulseras ug kulintas nga ginama sa kahoy. 

Ang katapusang rota sa among tunga sa adlaw nga guided tour mao ang Cocoa House (Chocolate Kingdom), diin dihay gihimong hamubong pagpasabot giunsa paghimo sa tsokolate. Sama sa Batam Chocolate House, libre ang pagtilaw sa mga ilang lokal nga tsokolate.  Didto ko katilaw og chili chocolate. Tungod kay nagustohan namo ang tsokolate, napugos mig palit bisag nakapalit na mig tsokolate didto sa Singapore ug Batam. (Ambot kon tinuod, apan may nasikop kong estorya nga ang mga tourist guide dunay porseyento sa halin sa mga tindahan nga masudlan sa mga turista, busa permanente ang tindahan sa tsokolate kay halinon kining produkto). 

Hinuon duha ra ka pakete ang akong gipalit kay naglikay ko nga molabaw sa limitasyon sa timbang sa among bagahe nga walay extra baggage nga mabayran.