Way guided tour sa tibuok hapon sa Sabado. Kini among gigamit sa pagsuroy-suroy didto Bukit Bintang. Libre ang bus paingon sa shopping district ug sa pagbalik. May bus stop luyo sa hotel ug didto mi nagpaabot. Kada diyes minutos moabot a bus ug mga kinse minutos lang daganon ang Bukit Bintang. (Mas dugay kon piot ang trapik).
Nagpundok-pundok mi sa among pagsuroy-suroy. Ang among pundok didto nanan-awg mga baligya sa mga tindahan sulod sa Pavilion. Sa Padini Concept Store nakapalit si Pat og Vincci handbag. Namalit sad mig pipila ka pasalubong nga RTW.
Ang grupo nga among nakuyogan ni Pat nakasinatig problema sa among pagpauli. Na-trapik ang among gisakyan ug miapil mis mga pasahero nga nanganaog ug mibalhin sa laing sakyanan. Apan sahi nga bus nga among gibalhinan ug nabalik mis Bukit Bintang. Maayo na lang kay ang lalakeng pasahero nga among gipangutana, mitambag nga adto mi manaog sa Petronas. Mitabang sad ang among “good Samaritan” sa pagkuhag duha ka taksi nga mohatod namo sa hotel. Si Pat, Albeth, Linda ug Gingging didto sa unang taxi ug ako, si Sony ug Toto sa ikaduha. Bayente singko ka Ringgit ang pakyaw sa matag taxi. Sahi sa Singapore nga estrikto ang metering system, mas dali makasakay og taxi sa KL kon pakyaw ang bayad.
Walay guided tour sa tibuok Dominggo. Human sa complimentary breakfast sa hotel, kaming tanan nanimba sa St John’s Cathedral nga among gibaktas gikan sa hotel. Gikuhaan kog hulagway si Pat atubangan sa simbahan.
Ang St. John’s Cathedral sa Bukit Nanas, mao ang pinakaraang simbahan sa Kuala Lumpur. Ang karaang simbahan gitukod niadtong tuig 1883 samtang ang kasamtangang simbahan gi-konsagrar niadtong 1962. Matud pas among tourist guide, ang St. John’s nag-inusarang katedral sulod sa Kuala Lumpur. Tungod kay walay lugar nga katukoran og dagkong simbahan, ang mga katoliko sa Kuala Lumpur nagsimba sa girentahang mga balay o lawak.
Mahilig pod diayg ukay-ukay ang mga tawo sa KL kay nagpasad ang segonda manong bisti, sapatos ug hanbag sa daplin sa dalan gawas sa simbahan. Nakigsagol sa mga ukay-ukay ang soman, ibos, biko, bulad, tanglad, kamonggay ug uban pang linuto ug dili linuto.
Wala mi mag-uban sa among lakaw anang Dominggo. Ang tibuok pamilya ni Rene, uban sa duha ka pare ug magtiayong Pet ug Tessie, didto nanuroy sa Nickelodeon Theme Park. Wa ko matingala nga napili ni Rene ug Pepang ang Nickolodeon nga may dakong swimming pool kay duna silay kaligoanan sa Bukidnon.
Sa iyang mga pakig-ambit panahon sa senemanang prayer meetings ug binuwang assembleya, hugtanong gipasalamtan sa matiayong Rene ug Pepang ang Dios sa kalamboan sa ilang negosyo ug sa pag-asenso sa ilang kahimtang. Sa akong pagpamalandong sa ilang rag-to-riches nga kaagi, mahinumdom ko niadtong panahon nga ang among homecell meeting didto himoa sa ilang pinuy-anan sulod sa abattoir o ihawan sa lungsod sa Valencia. Baho ug daghang langaw sa ilang dapit. Pangomprag isda ang ilang negosyo ug didto sa ihawan ang bagsakan sa isda gikan sa Zamboanga City ug General Santos City. Sulod sa duha ka dekada, milambo ang ilang negosyo sa isda ug nahimo silang pinakadakong fish dealer sa Bukidnon. Milambo ang ilang mga negosyo ug karon ang Regidor Family Resort nga nahimutang sa Lungsod sa Maramag. mao na ang pinakadako ug pinakanindot nga kaligoanan sa Bukidnon. Kusog ang booking sa mga kasal ug ubang kasaulogan sa Regidor Country Home sa Valencia City. Usa sa akong nakitang grasya nga ilang naangkon mao nga karong panahona mahimo sa nila ang pagbiyahe kay ang ilang mga anak kabinlan na sa ilang negosyo. Pobre nga nahimong bahandianon, nagpadayong nakadapat sa yuta ang mga tiil ni Rene ug Pepang. Wala mausab ng ilang batasan ug kinaiya. Nagpadayon ang ilang pagkayanong tawo ug sa pakigsandurot sa mga ordinaryong tawo.
Si Sony ug Albeth mibalik didto sa Bukit Bintang kay mopalit og selpon si Sony. Gikan didto misakay sila sa libreng bus paingon sa Petronas Twin Towers ug nagtan-awg mga tinda didto.
Kami ni Pat, Bernie, Dodong, Toto, Linda, Rudy, Lory ug Gingging, nagpabilin sa hotel ug nanghipos sa among mga bagahe. Dungan mi nag-check out pagka-alas dose. Among gideposito ang among mga bagahe didto sa lobby, tipon sa mga bagahe sa grupo ni Rene nga unang migawas sa hotel.
Misulay mig suroy-suroy sa silinganan sa Arenaa Star Hotel, apan wala mi magdugay kay sirado ang mga tindahan. Gawas nga Dominggo panahon usab sa Ramadan. Saysenta porsento (60%) sa mga molupyo sa Malaysia, diin kaulohan ang KL, mga Muslim. Pagpalabay sa oras ug kalaay, nanginom mig kape, nagtabi ug nag-selpe didto sa ground floor sa hotel.
