May libreng pamahaw sa Arenaa Star Hotel. Sama sa ubang hotel, datslan ang pagkaon. Giganahan kog inom sa ilang kape nga sa akong panimpla mas humot ug lami pas kape sa Starbucks.
Sa buntag sa unang adlaw namo sa KL (June 18), gisuroy mi sa among tourist guide nga si Ms. Siti nga usa usab ka Muslim didto sa King’s Palace, agi sa lugar nga malantaw ang Petronas Twin Towers. Matud pas among tigtultol maayo didto kay di maghangad kon magkuhag hulagway atubangan sa nabatog nga atraksyon sa Kuala Lumpur. Ang kaluhang torre gibuksan niadtong 1999 human sa unom ka tuig nga pagtukod niini. Sulod sa unom ka tuig, ang 88-ka-andana nga Petronas Twin Towers maoy kinatas-ang bilding hangtod nga ang Taipei 101 nahuman niadtong 2004.
Gikan sa lugar diin malantaw ang Petronas, miadto mis King’s Palace (Istana Negara). Ang palasyo natukod niadtong1928 ug maoy puy-anan sa hari sa Malyssia (Yang di Pertuan Agong). Ang King’s Palace dili abli sa publiko busa diha ra mis gawas naglantaw-lantaw ug nagpalitrato. Among gihugopan ang pagpalitrato uban sa guardiya nga nagtindog sa gamay arko. Sa gawas sa dagkong mga ganghaan may mga guwardiya nga nagsakayg kabayo sa ilang British-style nga uniporme.
Samtang nagpaniid sa mga magtiayong kanunayng nagkuyog, nakaamgo ko nga dakog kahimoan ang among pamagdoy sa pagpalig-on sa panagsuod ug pagbalik sa kainit sa gugma sa bana ug asawa. Mora sad mig nag-renewal of vows sa among labing-labing ug banding-banding. Kon ako ang pahukmon, sa mga “Lovers of Singapore, Batam ug Kuala Lumpur”, nag-una pagka-romantiko ang paresang Sony ug Abeth, ikaduha ang paresang Rudy ug Lory ug ikatulo ang paresang Bernie ug Dodong.
Si Bernie ang kinamagulangan sa among hut-ong (76 anyos). Siya ang may kinadaghanag anak (11) ug apo (21). Ako, 5 ang anak ug 8 ang apo; si Rudy, 7 ang anak ug 4 ang apo; si Sony, 5 ang anak ug walay apo; si Rene, 3 ang anak ug 6 ang apo; si Toto, 1 ang anak ug 2 ang apo; ug si Pet, 1 ang anak ug 1 ang apo.
Si Bernie ug ako kauban sa siyam ka magtiayon nga unang sakop sa Couples for Christ (CFC) nga gitukod Valencia City niadtong tuig 1990. Among kauban ang magtiayong Eddie ug Lily Azurin, Phil ug Deedee de los Reyes, Loloy ug Lita Garcia, Vic ug Tonya Labrador, Mon ug Yoly Lubos, Nonoy ug Inday Segovia ug Roger ug Aida Selecios.
Si Bernie ang kasamtanang sekretaryo sa governance team. Kanunayng magkuyog ang magtiayong Bernie ug Dodong sa mga kalihokan sa Banay ug sa kapunongan sa mga senior citizens sa Poblacion, Valencia City diin si Bernie kanhi presidente.
Basin malibog ang magbabasa, ang among pundok sa Couples for Christ (CFC) nag-usab sa among ngalan niadtong tuig 1993 dihang ang usa sa haligi sa CFC nga si Frank Padilla mibiya sa Ang Ligaya ng Panginoon Community (Ligaya). Miuban mis desisyon sa Ang Buhing Pulong (ABP) Community sa Malaybalay City nga magpabilion sa landong ug pag-amoma sa Ligaya. Ang ABP maoy nagtukod sa unang CFC sa Valencia City.
