Sumala sa gikasabutan sayo ming miadto sa tugpahanan. Pagka ala sayis sa gabii nag-atang na ang among sakyanan atubangan sa hotel. Gihatod mi ni Ms Siti didtos a Kuala Lampur International Airport (KLIA2). Nagbunok ang ulan apan wala kini makapakgang kanako sa paglantaw sa tag-as nga mga edipisyo, sa nindot nga kadalanan ug mga hut-ong sa kakahoyan nga among giagian. Matud pa ni Ms Siti walay linog ug bagyo sa Malaysia. Mao tingali ang hinungdan nga daghan silag kakahoyan ug plantasyon sa palm oil. Wala ko kakuhag hulagway sa among giagian kay gialisbohan sa ulan ang bildong bentana sa bus.
Hapit usa ka oras ang among dagan paingon sa KLIA2 gikan sa Arenaa Star Hotel. Ang KLIA2 nga bag-ong nabuksan, nahimutang sa Petaling, Jaya ug naila tungod kay kini ang may pinakataas nga air traffic tower (ATT) sa tibuok kalibutan (438 ft.).
Nanihapon mi sulod sa airport. Wa ko mabusog kay wa ko ganahig kaon sa among gi-order. Laig baho ang luto (humay) ug mas daghan pa ang sagol mani sa bulad bulinaw nga maoy nakadasig kanamo sa pagpili sa maong menu.
Human sa alang-alang nga timotimo, misuroy mi ni Pat sa mga tindahan sulod sa Level 2 (andana) sa KLIA2 Main Terminal Building. Tuyo namong makapalit og pasalubong sa among ikawalo ug kinamanghorang apo. Didto sa kid section sa H&M Retail Store, nakapalit mig duha sa tisirt ug usa ka purol. Mibalik mis pre-departure area sa ikatulong andana aron sa pagpahulay.
Ala-una ang among lupad sa Cebu Pacific paingon sa Manila. Nakatagpilaw ang kadaghanan sa akong kauban apan wa gyud ko ganoya sa katulogon. Naglurat lang gihapon ang akong mata bisan sum-ol nga hagunghong sa jet engine samtang didto mis kawanangan nga usahay duyan-duyanon sa panganod ang among gisakyan. Dakong tanghaga ug baligho ang edad sa tawo. Kaniadtong batan-on pa ko, dali kong makatulog kon mabilar, apan karon di ko katulog kon way tulog. Kaniadto, ako ang magbuot sa katulogon. Karon, ang katulogon ang magbuot kanako.
Upat ka oras ug tunga ang lupad gikan sa Kuala Lumpur. Miabot mis Manila sa ala singko sa buntag. Namahaw ug nagsuroy-suroy mis NAIA samtang nagpaabot sa among paglupad ngadto sa Laguindingan sa alas onse sa buntag.
Lapas nas tingpaniudto pag-abot namo sa Laguindingan Airport. Nagpaabot namo ang van ug minibus nga among sakyan pauli sa Valencia City. Ang pamilya ni Rene uban sa duha ka pare didto sakay sa van. Ang nabilin didto sa RFR tourist mini bus.
Napulog duha ang sakay sa mini bus. Si Pet, Tessie, Sony, Albeth, Toto, Linda, Rudy, Lory, Bernie, Dodong, Pat ug ako. Si Gingging gitagbo sa iyang bana sa ilang sakyanan. Wala makauban si Joel nga among kasamtangang chapter head kay dili kabiyaan ang ilang negosyo nga panaderya.
Pag-abot namos Lungsod sa Opol, nangaon mis usa ka kan-anan daplin sa haywey ug sa dagat. Daw mga irong gutom ming nangaon sa Titing Eatery. Lima ka adlaw nga among pagpuasa sa mga pagkaong Pinoy. Nahinangop mis tinulang isda, kinilaw, inun-unang mulmol ug adobong nukos. Nagpapura sad mig order og bottled water ug soft drinks kay nabag-ohan sa kabarato sa presyo. Gikompra sad namo ang tinambid nga suman nga among gihimong postre o hinam-is ug ang nabilin gibitbit nga hinagboan.
Nindot ug makalingaw ang pamagdoy sa laing nasod apan talagsaon ang bationg kahinangop ug kagaan sa lawas sa pagdapat sa imong mga tiil sa tugkaran sa imong panimalay. Tinuod, nindot ang hotel, apan dili ikapuli sa kasayon, kahayahay ug katagbawan nga matagamtam kon naa ka sulod sa kaugalingong puloy-anan. Ilabi na sa higdaanan nga nagpaabot aron ikaw makapahuway ug mobawi sa bilar sa unom ka adlaw nga pamagdoy.
Gawas sa kalipay ug katagbawan nga masinati sa pagsuroy sa ubang nasod, daghang mga hinungdanong kasayoran ug leksiyon nga maani sa usa ka biyahero nga igmat ang mga mata ug dunggan.
Sa akong kabahin, ang pamagdoy namo sa Singapore, Batam ug Kuala Lumpur nakadughit sa akong dughan og pangandoy nga unta mabatonan usab sa akong nasod ang kahapsay ug kalimpyo sa Singapore; ang paglambo sa turismo sa ordinaryong dapit sama sa Batam, Indonesia; ang way putol nga kutay sa kakahoyan abay sa sementadong dalan nga nagdugtong sa Singapore ug Kuala Lumpur. Walo na ka tuig ang milabay nga ako unang nakasuroy sa Singapore ug Kuala Lumpur apan ang susamang pangandoy nagpabiling pangindahay. Kahatagan kaha kinig katumanan sa administrasyon ni Duterte?
Subo hunahunaon nga ang atong mga dakbayan ug sentro sa kalungsoran nahimo nang sementadong disyerto tungod kay ang kanhi kakahoyan gipulihan na sa mga balay ug ubang estraktura. Makalagot hunahunaon nga ang mga developers, tungod sa kahakog sa dakong kinitaan wala magpahat og luna sa mga subdivisions alang sa mga greeneries ug mga kahoy. Baligho nga hunahunaon nga inay dugangan ang kahoy daplin sa dagkong dalan, gipamutol na hinuon tungod sa pagpalapad sa mga dalan. Kabanga bas atong mga tigplano nga wa man kini pangandami aron dili kinahang purilon ang kahoy kon dunay pagpalapad ug pag-semento sa dalan. Daw dili katuhoan nga sa kadaghan sa mga magbabalaod sa kongreso, walay nakahunahuna pagpasakag balaod nga magmando sa mga developers nga magtanom og kahoy sulod sa subdivisions ug mga dagkong malls. Sakit hunahunaon nga samtang nagka-dako ang atong panginahanglan sa pagkaon nagkagamay ang atong umahan kay ang mga agricultural areas sumala sa land use plans sa mga dakbayan ug kalungsoran, giusab o gikonbertir ngadto sa residential, commercial ug industrial areas.
Yati, nahimo na man kong kill joy ani. Balik tas nindot.
“Kanus-a na sad ta mag-group tour?” Pangutana nga gitugpo-tugpo namo. Kining maong pangutana bug-at nga ilhanan ug pasumbingay nga kami miangay ug nalipay sa among pamagdoy sa Singapore, Batam ug Kuala Lumpur. Kahimuot ug kasadya nga igo nang ibugti sa kaayo sa magtiayong Rene ug Pepang Regidor nga nag-paambit kanamo sa bahandi nga ilang naangkon tungod sa panalangin sa Dios nga ilang giila ug gipasalamatan.
