OFFLINE

Buotan kaayo akong uyab nga naglingkod sa sopa sa lounge sa hotel samtang diha ko sa reception counter. Ako siyang gilingi sa wala pa nako suwati ang guest registration card sa akong ngalan (alyas), sa iyang ngalan (alyas) ug sa petsa nga naa mis hotel. Ika-unom ni namong pag-uban sa hotel sulod sa tulo na ka bulan. Dili kawat-kawat ang among gibuhat kay ulitawo man ko ug dalaga siya apan naglikay ming makahimog eskandalo sa among panagtagbo kay pulos mi magtutudlo. Busa kanunay ming mabinantayon sa among iring-iring. 

“Room 303, Sir”, matod sa receptionist nga mapahiyomong mitunol sa yawe human nakog bayad og P1,200 sa dobol bed nga lawak. 

Dali rang nakaapas ang akong uyab sa elebetor. Dali sad siyang nakakapyot sa akong liog samtang nagpataas ang elebetor. Misteryosa ning akong uyab. Morag birhin kon daghang tawo apan kon kami rang duha sobra kabigatlon. Dili gwapa ang akong uyab apan mahulipan kini sa bigot niyang lawas ug puting kutis. 

 Akong gitapion ang electronic key card sa detektor, gibuksan ang pultahan ug gisuksok ang plastik sa iyang butanganan.  Mihayag ang lawak sa akong pagpindot sa swits.

“Labyu, Lang,” parayeg sa akong uyab nga mihalok kanako. 

“Labyu, tu,” nako pa nga naglisod pagpahiluna sa akong pak bag tungod sa mga bukton nga morag gaway sa kugita nga mibalikos sa akong hawak. 

Milingkod ang akong uyab sa ngilit sa katre tapad sa iyang shoulder bag nga gisudlan sa iyang myek-ap, blaws, tayts, panti, bra ug nayti. 

“Mingaw baya ko nimo, Lang.” 

“Sagdi lang kay akong hupayon ang imong kamingaw.”

“Basta, ha! Ayaw baya kog tulog-tulogi.”

“Kinsa goy makatulog kon ikaw ang kadulog?”

Daan ming nanihapon sa wa pa motsek-in, busa sa walay langan nangandam mis katuyoan sa among pagsulod ning abtanan. Unang misulod sa banyo ang akong uyab. 

“Panabon og ayo, Lang,” tiaw ko.

“Molang. Humot lagi.” 

Nagkatawa ang akong uyab nga mipakimbot sa igwad niyang sampot sa pagsulod banyo. Sa edad nga 30 anyos, hinog ang iyang pagka seksi.

Suwerte ko ning akong uyab kay hotpas pandesal. Makahingap-hingap ang kainit sa iyang karinyo. Hagkot pas sikwati kon makigromansa. Di mosugot nga mogamit kog kondom. Ok lang sa ako. Wa koy kabalak-an kon moburos siya kay nakahukom na ko nga ako siyang pangasaw-on. Siguro kong nagpaabot lang siya nga akong ibungat ang pulong kaminyoon.    

“Ikaw na sad, Lang,” matod sa akong uyab nga hubong nag-atubang sa samin diha sa tiilan sa katre. 

“Ug ayawg kalimot og pamarbas kay bisag asa masalaag nang imong simod. He-he-he!”

“Kon way mamadlong. Ha-ha-ha! Bitaw, no wori, Lang. Bag-o akong Gillette.” 

Misulod kos banyo ug naligo sa kasikbit nga shower room. May tubig init apan bugnaw ra ang akong gikaligo aron mahumpay ang kainit sa akong lawas.  Anad kos pinato nga kaligo, busa wala ko magdugay sa kaligoanan. Namarbas ko atubang sa samin duol sa inidoro. Nanipilyo.

Migawas kos banyo tapis ang tualya sa hotel.  Wala na ko mag-ilis kay naghulat na kanako ang akong uyab sa humok nga katre. Akong gipalong ang suga sa kisame. Sa anup-op nga kahayag gikan sa gamayng suga sa tokador, akong maaninaw ang makabibihag nga lawas sa akong uyab nga mihaom sa nipis ug sedahon nga kamisula. May bato-balani nga mibira kanako ngadto sa kama ug nasimhot ko ang alimyon sa Victoria’s Secret sa akong paghalok sa iyang liog. 

Unang mibangon ang akong uyab pagkabuntag. Human na siyag kaligo ug diha na sa tokador sa akong pagmata.

“Maayong buntag, Lang.”

“Morning na, Sir,” pasiaw niya.

Bisi ang akong uyab sa tulumanon nga makadugang sa gihatag sa Ginoo. Misulod kos banyo. Human nag siyag ilis sa akong paggawas.

“Kaguwapas akong langga.” 

Ako siyang gidayeg kay wa mausik ang oras sa iyang pagpahamis ug pagpaputi sa nawong ug sa pagpanindot sa kilay, mata ug pilok. 

“Aron di ka sigeg tan-aw sa uban.”

Mea kulpa. Dili ikalimod nga hilig kog “bird watching”. Apan dili nawong ang daling makadani sa akong panan-aw kondili ang dughan sa babaye. Gani, kini ang nakadani kanako sa una kong pagkakita ni Becbec. Nasangit ang akong panan-aw sa duha ka bungtod sa iyang dughan nga nagpangamay nga katkaton. Una ko siyang nabantayan sa flag ceremony sa among tunghaan. Maestra sad si Becbec sa publikong hayskol diin ako nagtudlo. Una kog tulo ka tuig sa iya. Mathematics ang akong sabyek; si Becbec, Pilipino.

Miatubang ang akong uyab sa samin ug gisud-ong sa iyang pamarog. Migakos kos iyang hawak ug gihagkan ang iyang liog.  Gigkanon si Becbec. 

“Labyu, Lang,” niya pa sa pinaluray nga tingog. 

Miatubang siya kanako ug ang iyang tambison nga mga ngabil (mao nga di siya maglipstik) miukob sa akoa. 

“Labyu, tu.” Morag bungi ang akong tingog kay padayong nagdikit ang among mga wait. 

“Lab ko nimo, Lang?” 

Gitutokan kos akong uyab.  Gibasa ang akong mga mata. 

“Lab na lab,” akong tubag dayong daklit og halok sa iyang aping.  

Nagtuo kong insekyur kining akong uyab, busa kinahanglan akong balik-balikon kining mantra o litanya sa pasalig. 

Way libreng pamahaw sa hotel. Serado pa ang Gaisano City apan sayong mangabri ang Chowking ug Jollibee sa sulod sa mall. Didto mi namahaw sa Jollibee kay ganahan mis ilang hot choco ug may libreng kopya sa Inquirer. 

Nagbasa kos balita sa Inquirer samtang nagpaabot sa pagbukas sa dakong tindahan. Nag-una sa balita ang kampanya sa gobyerno sa pagsumpo sa ilegal nga droga. Duha ka semana sa paglingkod ni Duterte pagka presidente, liboan nang tigpayuhot ug tiggamit sa ginadiling droga ang mingsurender ug daghan na ang napatay.  

Nagpakli-pakli si Becbec sa mga panid sa artista ug popular nga mga tawo. 

“Dinhi ka una, Lang. Magwidro kog kuwarta.”  

Kagahapon, sa among window shopping sa Ayala Centrio Mall may naangayang sapatos si Becbec. Ako tong paliton ug igasa sa akong uyab. 

May ATM sa ikaduhang andama sa Gaisano City. Nagwidro kog P5000 sa akong LBP savings account sa BPI ATM. Apan mibutho ang pahimangno: “Sorry your transaction can not be processed”. Disgasya! Off line ang LBP.

“Unsa, wa ka kawidro?”

“Off line ang LBP.”

“Adto widro sa Centrio. Naay LBP ATM didto.”

“Off line, lagi. Bisag asa way mogawas nga kuwarta.”

“Siguro ka?”

“Adto tas Centrio kay akong ipakita nimo,” nako pa nga nagpugong sa akong kalagot. Way pulong “Lang” sa among tubag-tubag. 

Atbang ra ang Centrio sa Gaisano. Akong gipakita si Becbec sa akong pag-sulayg widro sa LBP ATM. Way migawas nga kuwarta. Misulay siyag widro gamit ang iyang ATM card ug mao gihapon ang nahitabo. Medyo hilaw ang iyang nawong sa pagbasa sa “Sorry your transaction cannot be processed.”

“Karon, motuo ka na nako?”  

Nagpaabot ko nga iyang ibungat ang pulong “sorry” apan iya hinuon kong gibasol.

“Nagwidro unta ka gahapon.”  

“Duna pa man koy cash gahapon. Kinsay magtuo nga off line karon.” 

Medyo kusog ang akong tingog.

“Ayawg paningka!”

“Di man to singka. Balik una tas hotel. Basin on line na unyang hapon.”

“Ikaw ra. Pabilin ko dinhi.”

“Sigi, mo-check out ko.” 

Walay tubag. Milakaw ko nga nag-alburoto ang dughan. 

Akong gibalikan ang ATM sa LBP human sa way timik namong paniudto sa Centrio.

“Off line gihapon, Lang,” nako pa nga misulay og puyok sa nagmug-ot kong uyab. Sapoton ug daling manluod si Becbec apan gibali wala ko kining ngitngit nga hilit sa iyang pagkatawo kay dasig ug karinyosa man siya kon maayog buot. 

“Manguli na ta,” niya pa, dayong tindog.

Kagahapon, mapalipayon ming nanaog sa Cagayan de Oro City, karon mingaw pas Biyernes Santo ang among pagtungas sa Malaybalay City.

Sa Bukidnon Quarantine Stop, mipalit kog mani ug banana fritter. Akong gitanyagan si Becbec apan wala mokubit sa akong paon ug nagpabiling amang ug bungol.

Nagdumili si Becbec nga akong ihatod sa ilang balay busa nag-iyahay mig sakay og motorela sa pag-abot namo sa hunonganan sa bus. 

Nag-inusara kog inom sa Emperador Light sa balkon. Ako ray nagtikawtikaw sa balay kay sayong nangatulog ang akong mga ginikanan. Ako ang kauban sa akong mga ginikanan nga pulos retiradong magtutudlo. Ang akong magulang babaye didto na nanimuyo sa lugar sa iyang bana sa Cebu. 

Namalandong kos akong kahimtang ug sa among relasyon ni Becbec. 

Tulo nay akong nauyab. Ang una akong gibulagan kay sobra kaselosa. Ang ikaduha akoy gibulagan kay gusto nang magpakasal apan akong giunya-unya kay dili pa ko andam mabilanggo sa kaminyoon. 

May hinungdan nganong ulitawo pa kos akong edad nga milapas nas kalendaryo (35 anyos na ko). Sa tinuod lang, tamili kog babaye. Kay gusto kong haybrid ug dili askal ang akong liwat. Sa pinulongan pas kompyuter, kon mahimo upgraded version ang akong liwat. 

Himantayon kos pamanit. Sa nagtungha pas kos Bukidnon State College, naibog kos akong klasmeyt tungod sa iyang pagka-gwapag hitsura. Apan sa kaulahian nadiskareds ko kay parehas mig kolor.  Nahadlok ko nga kon siyay akong maasawa, puti-puti las agta ang among mga bata.

Bitaw, ambot nganong nakit-an sa akong inahan ang akong amahan nga maklaro lang ang hulagway sa litrato kon naka-flash ang kamera. Pution ug mestisa Insik ang akong nanay apan bisag magsul-ob og sapatos nga taas og takon, ang iyang alimpulo igo rang motupong sa abaga sa akong tatay nga 5’8” ang hayt. Apan kon ayohog hunahuna, pulos sila korek sa ilang pagpili og kapikas sa kinabuhi.  Ang itom mangitag puti, ang putot mangitag taas.

Himantayon kos porma sa lawas. Naa koy naamiga nga ang kutis sanag sa kaputi ug kahamis. Apan nakahukom kong taman sa mis prends dihang akong nahimamat ang iyang inahan. Sobra ka tambok ang iyang mama ug sa latagaw kong utok akong mahanduraw nga maoy iyang lawas kon mag-edad nag kuwarenta.

Ikapamista sab ning akong dagway apan dehado kos akong hayt nga 5’4”, busa ang akong maasawa kinahanglan dili momenos sa 5’3” aron dili putot ang amo unyang mga liwat. Kining akong uyab karon tupong mi kon mag flat shoes siya.

Himantayon kos batasan sa babaye. Maong nagsaoy-saoy sa akong hunahuna ang gipakitang batasan ni Becbec kaganiha. Kulang siyag pagtuo kanako. Makiglalis bisag siya ang sayop. Tungod sa garbo, lisod mangayog pasaylo. 

Hubog na ko dihang akong nahinumdoman ang singsing nga akong gidata-datahan sulod sa upat ka bulan.  Akong ihatag ni Becbec ang singsing karong sunod semana, atol sa kasaulogan sa unang anibersaryo sa among panagtrato. Misulod kos akong lawak og gikuha ang singsing sulod sa hunos.   

Gilamoy sa kangitngit ang singsing nga akong gilabay sa gawas.