Nag-empake mis among mga bagahe nianang miaging gabii aron dili maapikihan sa among lakaw sa sunod namong destinasyon sa South Korea. Bisan pa, naulahi mis among pagpamahaw. Alas 7:00sb-10:00sb ang pamahaw sa hotel. Aron daghang matilawan sa klase-klaseng pagkaon nga kapilian (cereals, soups, meat, eggs, condiments, pastries, fruits, juices, beverages, coffee)miabot mig usa ka oras sa kan-anan sa una namong pamahaw. Apeke sa oras, nagpili mig mga putahe nga daling makabusog.

Ang Naju (populasyon: 88,740) usa ka municipal city sa South Jeolla Province. Ang Naju nahimong kaulohan sa South Jeolla hangtod nga gibalhin ang kaulohan sa Jeolla sa Gwangju sa 1895. Naila ang Naju tungod sa dako ug lingin nga Naju pear (peras) nga maoy nahimong logo sa distrito. Naila sad ang Naju tungod sa Dongshin University nga nahimutang sa dakbayan. Hapit 300 ka kilometro ang gilay-on sa Naju gikan sa Seoul. Duha ka oras kining daganon sa tren sa Korea Train Express (KTX) ug lima oras sa bus.

Ang Seoul Station mao primaryang terminal sa KTX train ug ekspres nga sakyanan paingon sa Naju ug Busan. Nagserbisyo usab kini sa mga long-distance train sa Janglang Lines paingon sa Gwangju, Honam, Jeolla ug Mokso. Kadtong moadto sa Incheon Airport mosakay sa Arex Express.

KTX train ang among gisakyan gikan sa Seoul Station paingon sa Naju. Ang plete 48,899 Won (P2,147). Alas 10:25 sa buntag migikan ang tren sa Seoul Station ug miabot ni sa Naju Station sa alas 12:25 sa kaudtohon. Gitagbo mi sa estasyonan sa tren sa duha ka Pinay nga gipamalihog ni Marissa nga niadtong tungora didto pa sa eskuylahan nga iyang gitudloan. Si Joan ug Weng naminyo og Koreano ug nagpuyo sa Naju. Gisakay mi sa dala nilang sakyanan paingon sa Naju Bitgaram Hotel diin naka-bok mig lawak nga may usa ka single bed ug usa ka double bed. Ang bayad sa lawak 70,000 Won (P3,080) kada adlaw. Wala madugay didto sa among lawak, nanuktok si Marrisa. Mitulo ang iyang luha nga mihangop kanamo. Si Marrisa pag-umangkon ni Pat. Naminyo siyag Koreano ug 18 na katuig siyang nagpuyo sa Naju. Gani, sa iyang pag-abot sa Naju daghan pang kalibonan sa maong dapit nga karon gibarogan sa dagkong mga edepisyo ug habog nga mga apartments.

Listo ug kugihan, daghang trabaho ang iyang gisudlan apan karon, tungod sa nagkamenos nga oportunidad natingob ang iyang trabaho sa pagtudlog English sa mga batang Koreano. (Mao gihapon ang trabaho ni Jona ug Weng).

Kapin nas napulo ka tuig ang kataposan namong panagkita ni Marissa kuyog sa iyang bana ug anak dihang nakabisita sila among panimalay sa Valencia City, Bukidnon.

Gidala mi ni Marrisa sa usa katradisyonal nga kan-anan diin maghubo og sapatos ug maglingkod ang mangaon. Gamay ra ang nakaon ni Faith sa rice topping kay halang. Wala sad mahurot ni Pat ang sulod iyang panaksan kay gawas nga halang daghang mga side dishes ang gibayang. Kini ang akong natiman-an nga mga side dish sumala ni Marissa: Kimchi (gigamos nga repolyo) Kongnamul Munchim (gigamos nga turok nga utaw), Chickin Mu (atsarang labanos) ug Miyeoguk (sabaw nga lato.)

Human sa paniudto, namahulay mis among kuwarto sa hotel samtang nagpaabot kang Marissa.

Kilumkilom nasa paghibalik ni Marissa sa hotel. Wala na mi mosuroy sa Naju kay gidala mi ni Marissa sa Gwangju, usa ka metropolitan city nga duol ra sa Naju (28 kms.). Misakay mig bus paingon sa Gwangju. Human manihapon sa usa ka karenderya, misakay mig subway train paingon sa usa ka shopping center sa Gwangju. Wala magdugay ang among window shopping kay gabii na ug sayong manira ang mga tindahan. Lawon na ang kagabhion sa pagbalik namo sa hotel. Didto na matulog si Marissa.

Dali ra ming nahinanok tungod sa kakapoy sa among pagdangandagan didto sa Seoul Station. Didto sa estayonan sa tren, wala mi magkasinabot sa porter nga midala sa among bagahe. Makasabot siya sa pulong airport apan dili sa pulong nga “no” ug “not”. Iya ming gikanaog didto sa hulatanan sa tren paingon sa Incheon Airport. Sa among pagsulti kaniya nga “not airport” ang among adtoan, miinsister siya nga mao nato hulatanan sa tren paingon sa irport. Maayo na lang kay dihay Koreano nga makasabot og Iningles ug iyang gisultihan si Faith nga mosaka mi pagbalikug molukat og tiket paingon sa Naju. Dihang nabasa sa kargador ang tiket diha pa siya makasabot nga dili irport ang among destinasyon. Nanaog na usab mi ug dako ang pahiyom sa kargador sa pag-abot namo sa platform o hunonganan sa tren paingon sa Naju. Dili hinasa sa bili sa Won ug bayronon sa kargador, ako siyang gitunolan og 1,000 Won. Misenyas siya sa hustong kantidad ug ako siyang gitunolan og 10,000 Won (P440).