Ang Jeonju (populasyon: 652,392) usa ka dakbayan sa kasadpang bahin sa South Korea. Naila kini sa iyang Jeonju Hanok Heritage Village, usa ka lugar sa mga tradisyonal o Korean-style nga kabalayan, craft shops ug mga kan-anan. Ang Jeonju nga kaulohan sa North Jeolla Province, usa ka siyudadnon ug banikanhong dapit tungod sa kaduol niini sa Wanju County nga hapit nga maglikos niini.

Si Marissa ang nagsugyot nga moadto mis Jeonju Hanok Heritage Village sa Jeonju. Ang Hanok Heritage Village usa ka balangay nga diin makita ang tradisyonal nga mga balay sa Korea ug Hapon, calligraphy ug museyo sa sake.

May higala si Marissa nga Pinay nga naminyo og Koreano. Among giabangan ang ilang kotse (USD250 kada adlaw) nga ang banang Koreano ra usab ang nagmaneho.

Usa ka oras ug tunga among pagbiyahe, lakip na ang kalangan namo sa usa ka stop-over aron mangihi ug mamalit og kalo ug gagmayng mga butang. Mibiya sa Naju sa10:00sb, miabot mis Jeonju sa 11:50sb. Ang Jeonju may gilay-on nga 98 ka kilometro gikan sa Naju.

Sementado ang one-way nga dalan busa kusog ang dagan sa Hyundai grandeur nga among gisakyan (moabot og 140 kilometro kada oras). Nalingaw kog lantaw sa berdeng mga bukid ug bungtod nga among nalabyan ug sa mga umahan sa tiilan sa katag-katag nga mga bukid ug bungtod. Matag karon ug unya makita ang mga greenhouse sa mga utanon ug ubang tanom. Wala koy nakitang upaw nga kabukiran.

Miabang mig hanbok nga bisteda (15,000 Won kun P660 matag bisteda). Ang hanbok usa ka tradisyonal nga sinena sa Korea nga gigamit sa kakaraanan. Duha ang imong pilian kon ikaw moabang og hanbok. Ang usa, hatagan kag litrato nga nakasul-ob sa hanbok. Ang ikaduha, duha ka oras nga lakaw-lakaw sulod sa Hanok Village. Lakaw-lakaw ang akong gipili kay gusto kong magpahulagway atubangan sa mga tradisyonal nga kabalayan suot ang hanbok.

Among gisuroy ang pipila ka kalye ug lingawng nagpahulagway atubang sa mga tradisyonal nga mga balay gamit ang akong dala nga Sony kamera ug among dalang mga selpon.

Nangaon mis among naulahi nga paniudto sa usa ka tradisyonal nga kan-anan. Among gi-order ang bulgogi (karneng baka nga hinumolan) nga diha ra sugbahon sa lamesa nga kan-anan. Isud-an sa lutong humay ang hiniwa nga sinugbang baka nga puston sa dahon sa letsugas.

Human sa paniudto, mibaklay mi paingon Jeondong Church of Francis Xavier. Maanindot nga Romanesque-style nga katedral gitukod sa dapit diin gipangbitay ang mga marter sa panahon sa paglutos sa mga Kristianos sa katuigan sa Joseon Dynasty.

Sa among pagpamauli sa Naju mihapit mis Damyang County sa Lalawigan sa Jeollanam-do nga usa ka tourist destination tungod sa ilang mga productong lokal nga binuhat sa kawayan ug sa ilang strawberries. Mihapit mis Juknokwon (Bamboo Forest) ug nagpahulay sa mga lingkoranan nga hinimo sa kawayan atubangan sa usa ka water fountain. Mihapit usab mi sa usa ka dapit nga gitawag og French Village aron mangape ug magkuhag mga hulagway. Didto nako nakita ang kahoy nga gi-dextrose. Tungod tingali kay dili sayon ang pagtanon og kohoy sa South Korea itandi sa Pilipinas, maayong mogalam ang mga Koreano sa ilang mga kahoy. Sa daplin sa mga dalan, sa mga parke ug mga lulinghayawan, ordinaryong talan-awaon ang kahoy nga gitukhan aron dili matumba ug motanos pagtubo.

Ang kataposang dapit nga among gisuroyan sa among pagpamauli mao ang nabantog nga Rose Garden sa Chosan University sa Gwangju (ang dakbayan nga daklit namong nabisitahan sa una namong gabii sa Naju). Suwerte mi kay tingbulak sa rosas, busa nabusog ang among mga mata pagtan-aw sa klase-klaseng rosas nga sumala pa moabot sa 227 ka species sa tanang bulok ug hugis sulod sa kapin sa tunga ka ektaryang harden.

Ngitngit na sa among pag-abot sa Naju diin mihapit mis panimalay sa sakyanan nga among giabangan. Maabiabihon kaayo ang Pinay nga asawa nga taga Bohol nga nag-andam kanamo og panihapon didto sa ilang kan-anan ug tindahan nga morag sari-sari store sa Pilipinas ang mga baligya. Sumala pa ni Felisisima (Koreanong ngalan: Kim Hanstar), tigkan-anan sa ila ang mga Pinoy nga trabahante sa Naju kay Pinoy ang pagkaon. Matod niya nga nagustohan sa iyang banang Koreano ang Isla sa Bohol tungod sa mga baybayon ug mga kalubihan. Gani, gusto niini nga adto mopuyo sa Bohol sa iyang pagretiro.