Sa kalimutaw sa akong damgo
Nagbalikbalik ang panan-awon –
Barkong gikusokuso sa higanting mga balod
Gisalibwag sa masuka-anong kadagatan, ubos sa
Nagkusmod nga langit nga way kinutoban.
Sa kalimutaw sa akong damgo
Nagbalikbalik ang panan-awon –
Barkong nag-aginod sa hapsayng salog
Gilatag sa malinawong kadagatan, ubos sa
Nagpahiyom nga langit nga way kinutoban.
Sa kalimutaw sa akong damgo
Nagbalikbalik ang panan-awon –
Barkong naglawig sa dagat nga way utlanan
Ubos sa kawanangan nga way kinutoban.
Di ko makita ang tagolilong kapitan,
Ang tagolilong mga kamot nga nagkupot
Sa tagolilong timon. Way tatawng padulngan,
Way pantalan nga dunggoan. Apan ako,
Ang nag-inusarang pasahero,
Ang tino nga kapaingnan di kapugngan.
