If it weren’t for marriage, men and women
would have to fight with total strangers.
Anonymous
Nagbraws sa Facebook, akong naukayan kining sinulat: “Ang pag-aaway ay hindi ginawa para kayo’y maghiwalay. Minsan paraan yan ng tadhanan para masubok kong gaano kayo ka tibay.
Tinuod ni? Motuo ka ani?
Samtang naghunahuna sa tubag niining maong mga pangutana, nahinumdom ko niadtong mitambong kos ika-25 ka anibersaryo sa kaminyoon sa suod nga higala nga taudtaod na nga wala na mi magkita. Daghan ang namambong sa kasaulogan nga gipahigayon sa usa ka hotel. Apan pipila lang ang akong nailhan.
Gihimo ang mga pagpaambit sa wala pa ang panihapon. Usa kos gihangyo nga mosulti. Nakalitan ko kay wala ko makaandam kon unsay isulti. Ang pastor nga nauna kanako, naghisgot mahitungod sa kaminyoon sa tumang kasayon ug kahanas bunga sa kadaghan nas iyang mga homiliya mahitungod niini.
Samtang naminaw sa pastor, misamot ang akong kalibog kon unsay akong ipaambit. Mao nga naghimo kog estorya.
“Ang kaminyoon usa ka misteryo, usa ka tanghaga” panuko nakog sugod. “Hunahunaa kining magtiayon nga sugod sa unang adlaw sa ilang panag-ipon sige nag away. Abtag 24 ka tuig, nagpadayon pa silag away. Sa laing bahin, dunay magtiayon nga wala nako madunggi nga maglalis o mag-away. Abtag upat ka tuig, wala na sila igdungog kay nagbulag.
Akong namatikdan ang talagsaong kasibot nga gipakita sa mga naminaw, apan di ko siguro kon tungod lang kini sa ilang malumong kasingkasing o na-intriga sila sa akong pasiuna. Nadasig, akong gisaysay ang estorya sa edarang magtiayon nga akong nakaila. Walay semana nga dili sila maglalis. Gagmayng mga butang ug walay pulos ang hinungdan sa ilang away. Morag nahimo na nilang kalingawan ang paglalis ug pagsuknaay. Bisan pa, akong iposta ang akong duha ka itlog, nga mag-abot man ang imperno ug dakong balod, dili magbulag ang magtiayon. Kay kon mahitabo pa, hagbay ra.
Sa magtiayon nga nagsaulog sa ilang ika-25 ka tuig sulod sa salag sa kaminyon, akong gisaysay ang among kaagi sa nanglabayng panahon ug mipadayag sa akong pagdayeg sa malamposan nilang kaminyoon, ilabi na sa ilang hustong pagmatuto o pag-umol sa ilang mga anak.
Sa mga naminaw, ilabi nas pastor nga dako ang pahiyom, akong gisulayan pagpasupot og pagtulun-an ang akong estorya sa pagkutlo og usa ka berso sa Bibliya: “Busa, ang gihiusa sa Dios dili pagabulagon sa tawo.”
Basi sa masipang pakpak, pasado ang akong pagpaambit.
Nganong kadto ang akong nahunahunaan nga ipaambit. Nganong naangayan ang mga nanambong ang akong estorya? Tungod kay komon ang maong estorya.
Mobalik tas pangutana kon ang away sa matiayon lamas bas kaminyoon?
Alang kanako, matubag kini sa “Oo” ug “Dili”.
Ang lamas makahatag og kalami sa pagkaon. Apan, kon masobrahag timpla, dili maayo ang resulta. Pananglit: Kon asin, sobra kaparat; kon suka, sobra kaaslom; kon sili, sobra kahalang.
