NADUNGOG niya ang kasadya sa sala. Nagsugod na ang Christmas party. Ang labing gipaabot sa tinuig nga reyunyon sa pamilya. Sulod sa daghang mga katuigan magtapok ang tibuok banay sa panahon sa Pasko. Sadya sa balay kay ang tanan manungha, apil ang pamilya ni Emil nga didto nagpuyo sa laing nasod.
Nag-inusara siya sa gamayng lawak diin siya matulog sa panahon sa reyunyon. Ang lawak sa magtiayon katulgan ni Franklin ug Charlene uban ang ilang tulo ka anak nga sila si Clarisse, Camille ug Cian. Ang magtiayong Emil ug Ryden adto sa kasikbit nga lawak uban sa ilang anak nga sila si Cathy ug Caleb. Ang lawak sa silong gitagana sa magtiayong Emerson ug Nora ug sa ilang tulo ka anak nga sila si Carlo, Cesar ug Chad. Ang iyang asawa nga si Clara adto matulog sa lawak ni Fatima, ang kamagulangan nilang anak nga kaipon sa balay.
Mibakod siya ug nangandam. Apan sa pagtan-aw niya sa samin, pusturawo na siya sa iyang barong ug itom nga karsones. Sinaw ang itom niyang sapatos. Hapsay ang gisudlay niyang buhok. Miguwapo siya sa make-up sa iyang nawong.
Migawas siya sa kuwarto ug mipaigon sa sala. Hilom siyang nagtindog sa walang kilid sa piyano nga dip-ig sa dingding sa sala. Iyang naabtan ang iyang mga apo nga nagtindog sa atubangan ug tagsa-tagsang nagpaambit mahitungod sa Pasko. Gi-video kini ni Erwin, ang ilang kamagulagang lalaki.
Nahimuot siyas mga mensahe sa iyang mga apo.
“Christmas is the celebration of the birth of Papa Jesus.”
“Time to meet and play with cousins.”
“I like coming to the house of lolo ang lola.”
“What I like about Christmas party are the gifts.”
Human sa pagpaambit sa mga apo ug pagkanta sa We Wish You A Merry Christmas, gihimo ang pagpanghatag sa mga regalo nga gipahiluna sa tiilan sa Christmas tree. Nalipay ang tanan, ilabi na ang mga kabataan. Apan nasagmuyo siya kay nahurot na lang ang mga regalo wala gyod matawag ang iyang ngalan. Tungod sa dako niyang kahiubos, wala na siya moapil sa giandam nga paniudto. Mibalik siyas lawak ug mihigda.
NADUNGOG niya ang buto-buto sa kuwitis ug ribintador. Mibangon siya ug milingkod sa ngilit sa katre ug naminaw sa panghitabo sa gawas. Dihang nadungog niya nga gipaandar ang mga sakyanan sa ilang garahe, nasiguro niya nga miabot na ang Bag-ong Tuig.
“Erwin, itungtung pag-ayo ang fountains,” tingog ni Fatima didto sa gawas.
“Careful, Daddy, kay mayayay imo kamot,” tingog ni Cyd. Siya na lang ang nabiling apo kay ang ilang mga bata namauli na ug didto magsaulog sa bag-ong tuig sa ilang tagsa-tagsa ka dapit. Ang pamilya ni Charlene nga ilang tunga-tungang anak sa Iligan City. Sa Gensan ang pamilya sa ilang kamanghorang anak nga si Emerson. Mobisita ang pamilya ni Emil sa ginikanan ni Ryden sa Dipolog City sa dili pa sila mobalik sa Australia.
“Cyd, saka diris balkon. Ayaw diha sa gawas kay basig mahulogan kag bala kon may magpabuto og pusil,” tingog sa iyang asawa.
“Nindot kaayo ang fireworks sa plasa,” tingog ni Fatima.
Habog ang dapit nga nahimutangan sa ilang balay busa malantaw ang fireworks didto sa plasa ug ang nanulbong nga mga kuwitis sa kasilinganan. Nindot ug makalingaw. Apan karon, tungod sa nagpabiling kahiubos nga iyang gibati, wala siya mogawas sa kuwarto. Ilabi na nga way mipukaw kaniya ug mitimbaya og “Happy New Year”. Lanog ang tingog ni Cyd nga nalingaw sa mga pabuto. Mapinanggaon, maduladulaon ug manyahon si Cyd sa iyang lolo ug lola. Siya ang tigtunol sa boke sa mga bulak sa panahon sa kasaulogan sa ilang adlawng natawhan. Naandan sa bata nga sayo motungha sa ilang balay aron mohalog sa iyang lolo ug lola. Silingan nilag balay ang ginikanan ni Cyd. Nagdahom siya nga mahinumdoman sa iyang apo. Nagpaabot siya nga manuktok ang bata, mohalog kaniya ug mahupay ang iyang kahiubos. Apan nahuman na lang ang buto-buto wala gyoy nanuktok sa iyang lawak. Hinambin ang labihang kahiubos, mibalik siyag higda.
