Nag-ambahan ang kilat ug liti
Naggakos ang unos ug baha
Sa usa ka mabangis nga sayaw
Sa masuk-anong kinaiyahan nga way gipili.
Usa ka payag midaghong ug mikilog
Atop cogon nagkagidlay ug gipadpad
Bungbong amakan nakanlat ug gipalid
Didtos kawayanan pamilya namakwit.
Ang maisog nga kawayan naglubaylubay
Nunot sa haguros sa mabangis nga hangin
Sa silong sa iyang mahinangpong landong
Usa ka banay sa kainit sa lawas nag-ambitay.
Ang nag-inusarang kahoyng maas nag-ampo
Nga siya hatagan sa kaisog ug kusog
Samtang ang mga langgam nga midangop
Sa iyang salimbong nalisang ug nagkurog.
Sa basakan nga sa baha gilunopan
Ang yuko ug lusbog nga mga uhay
Sa buros nga humay
Sa hangin nangindahay
