Dako ang kausaban sa dula sa mga bata sa kaniadto ug karon. Sa akong panahon kanus-a wala pay television ang mga bata nagdula sa gawas sa balay kauban ang ubang mga bata. Tungod sa television ug mga gadget ang mga bata karon malingaw nga magdula sulod sa balay.
Daghan ang among mga dula (tarak-tarak, tago-tago, holen, lastiko, taksi, kasing, patintero, siyatong ug gera-gera gamit ang luthang) nga nagkinahanglan og pangusog. Malingaw sad mi sa pag-ambak sa pangpang ug pagkaligo sa suba. Sa laing bahin, ang mga bata karon naglingkora samtang nagtuplok-tuplok sa selpon o tablet. Sa among panahon kami ang maghimo sa tarak-tarak, kasing, tirador ug luthang samtang ang mga bata karon magpapalit lag dulaan sa toy section sa dagkong tindahan.
Usa sa hinungdan sa kausaban sa mga dula ug kalingawan sa mga bata mao ang urbanization. Sama sa mga ginikanan ang mga bata karon kulang og interaction sa mga silingang mga bata. Lahi sa banikanhong dapit diin suod ang panagdait sa mga silingan.
Apan sa akong paniid sa akong mga apo, kon hatagag higayon ang mga bata sa kaniadto ug karon pareha rag hilig kon dula ug kalingawan ang hisgotan. Malingaw sila sa pagkaligo ug paglangoylangoy sa dagat, suba o swimming pool. Malingaw sila sa pagdula og tago-tago sulod ug sa gawas sa balay. Kon ibalik ang patintero ug siyatong siguro kong malingaw ang akong mga apo sa maong mga dula. Kon kusog ang ulan, siguro ko nga malingaw sad silag kaligo sa ulan kon tugotan sa ilang ginikanan.
Si Cyd, ang akong siyam ka tuig nga apo nga sobra ka adik sa roblox ug minecraft, mohiklin sa iyang selpon kon agdahon siyas iyang amigo nga magdulag badminton. Ganahan sad siyang magsakay sa iyang biseklita kon dunay mga bata nga magbisiklita. Sa ato pa, ang mga bata ganahan magdula kon dunay kauban nga mga bata. Sa selpon, si Cyd malingaw kon kauban niyag dulag roblox ug minecraft ang iyang mga ig-agaw nga tua sa layong mga dapit. Si Cyd mahilig sa mga toy car. Dihay panahon nga iyang guyodguyoron ang iyang toy car (tarak-tarak sa among panahon).
Unsaon nga mogawas ang bata ug dili magyampungad sa balay? Importante nga dili batiog kalaay ang bata ug modangop sa selpon. Mahinungdanon usab nga i-regulate o kutoban ang paggamit sa selpon. Kay kon pasagdan ang bata, tibuok adlaw siyang magtutok sa selpon. Makatabang sa sosyal nga paglambo sa bata kon dasigon siyang makighugoyhugoy sa silingang nga bata.
Sa kinupsan, moingon ko nga ang mga bata sa kaniadto ug karon, susuma rag hilig kon dula ug kalingawan ang hisggotan. Apan tungod kausaban sa kahimtangan o palibot sa bata, lahi na ang dula ug kalingawan sa mga bata karon.
