Lahi sa Pilipinas, dili hilig og selfie ang mga tawo diris Sydney. Busa dili sayon magkuhag hulagway sa mga publikong lugar kay magbantay kang dili maapil ang ubang tawo (gawas kon nagtalikod kay dili man makabantay). Pero kon makit-an kang naglitrato sa imong kauban, mobuntaryo silag kuhag hulagway aron maapil kas imong grupo. Sa eskwelahan ni Casey, hugot nga gidili ang pagkuhag hulagway sa ubang bata.
Sulod sa usa ka tindahan duol sa among gipuy-an, giduol kos usa ka trabahante sa grocery nga nakabantay nga nagkuha kog litrato. Akong giingnan nga ang akong asawa ra nga namili og utanon ang akong gikuhaag hulagway. Nakasabot ra tingali kay iya man kong gilamano.
Mahal ang pliti sa tren ug taksi og nihit ang bus, busa ang unang prohekto sa mga lalin sa Sydney mao ang pagkuhag sakyanan. Dili ni lisod kay ang suhol sa ordinaryong empleyado sama sa nars, paigo man sa dugang badyet para sa car loan. Kinahanglan ang sakyanan sa trabaho ug sa pagsuroy-suroy (nga bagad sa ma tawo dinhi), ilabi na nga usa ka kontinente ang Australia og lagyo ang imong biyahian.
Tulo ra ka magtiayon ang barkada sa nila ni Yoyong dinhis Sydney. Silang tanan daang kaila sa didto pa sila magtrabaho sa Singapore. Sa birthday party (Abril 2) sa balay sa usa nila ka kauban among nahimamat ang magtiayong Lem ug Shing, ug Mayong ug Kathleen. Sa among pagsuroy sa Olympic Park (Abril 8) among nakaila ang magtiayong Jun ug Golby. Ang ilang anak nga si Voie maoy pinakasuod nga amiga ni Casey apan dihang namalhin ang magtiayon didto sa laing lugar sa Sydney talagsa na lang magkita ang duha ka bata. Dunay laing magtiayon nga bag-o lang milalin gikas Singapore ug kasamtangang miipon sa apartment nilang Yoyong. Duha lang sila ni Mark ug Aimee kay ang ilang anak atua sa Pilipinas. Sa ilang grupo, usa ang nagtrabaho sa banko (assistant bank manager), upat sa hospital (nurse, nursing aide) ug usa sa security networking (sa mga banko).
Buntag sa Abril 4, gipakuyog mis eskwelahan ni Casey aron magbantay samtang dili pa magsugod ang klase kay dunay one-on-one interview si Yoyong ug Ryedgee sa iyang maestra (gibuhat kini kon tingsera nas klase).
Duol ra ang eskwelahan sa among apo, apan klase-klase ang gagmayng mga tindahan nga maagian (kapehan, kan-anan, chemist store, bookstore, grocery). Gikan sa Mortdale Public School, mibaktas mi paingon sa Mordale Memorial Plaza agi sa pikas dalan diin nakalabay mig simbahan (Anglican), bangko ug ang Mortdale Fire Station.
Sa among pagpauli mihapit mis usa ka grocery aron pagpalit ug mga utanon. Mahal ang pagkaon sa Sydney itandi sa mga siyudad sa Amerika, gawas sa lokal nga produkto sama sa karning baka ug karnero ug full cream milk. Barato ang apple ug grapes ikompara sa Pilipinas, apan malibat imong mata sa presyo sa usa ka buok nga abokado (P150), manga (P190) ug pinya (P220).
Nagluto og pamahaw ang pagtiayong Yoyong ug Ryedgee ug kay walay rice ang ilang gipreparar, ako unang gisalindot ang akong naandang oat meal. Beef steak, vegetable salad ug yellow corn ang among gisalohan.
Sa among pagbaklay-baklay sa kasilinganan sa Mordatle, nanguha kog hulagway sa mga talan-awon nga komun sa usa ka suburb sa Sydney.
Ang local government areas (LGAs) mao ang primaryang panggamhanan sa Australia (barangay sa Pilipinas). Gitawag silag cities, shires, councils ug ubang ngalan. Ang Mortdale usa ka lugar gawas sa sentro sa siyudad (suburb) ug sakop sa Georges River Council. Ang Mortdale nailhan sad sa dagnay nga "Valley of the Dead" ("Bangawog sa Kamatayon”), tungod sa Latin mort (“kamatayon”) ug English dale (“bangawog”).
Sa 9,702 nga pumopuyo (2011 census) sa Mortdale, 36.5% ang nag-ingon nga natawo sila sa laing mga nasod nga ang nag-una mao ang China (7.25%), United Kingdom (3.0%) ug Macedonia (2.65). Sa mga tumotuo, nag-una ang Catholic (26.7%), Anglican (16%) ug Orthodox (4.1%).
