Sa among unang Dominggo sa Sydney (Marso 26), misimba mis St. Mary’s Cathedral didto sa Sydney central business district (Sydney CBD).
Puno sa tawo ang simbahan sa ikatulong misa (10:30am). Gani, didto na mi makalingkod sa likod kay nagsugod na ang misa sa among pagsulod.
Ang tugsoy nga St Mary’s Cathedral mao ang kinatas-an (107 ka metros) nga simbahang katoliko sa Sydney. Ang katedral nga ang foundation stone gipahiluna sa 1868, unang gimisahan sa 1882. Ang katedral mao ang seat sa Arsobispo sa Sydney.
Ang Sydney mao ang labing relihiyosong dapit sa Australia ug may kinadaghanag katoliko (28.3%).
Unang sakay namo ni Pat sa tren kining ikaduha namong pag-adto sa Sydney CBD. Wala mi magsakyanan kay buot ni Yoyong nga makasinati mig sakay sa Sydney Trains. Gawas pa, barato ang plete sa tren sa adlawng Dominggo. Gipalitan mi ni Yoyong og Opal card nga maoy gamiton pagsakay sa tren. I-tap ang kard sa reader matag sulod ug gawas sa estasyonan sa tren.
Nagsakyanan mis pag-adto sa Sydney CBD sa miaging Huwebes diin napornada ang among tuyo nga motam-aw sa Alladin Musical kay nahutdan og tiket ang Capitol Theater ug wala nay mapalit nga tiket hangtod sa kataposang pasundayag sa moabot nga Dominggo. Aron pagpuyok ni Casey nga namugos nga motan-aw sa myusikal, nanan-aw mis pelikulang “The Beauty and the Beast” sa Reading Cinema didto sa Rhodes pagka Biyernes.
Ang estasyonan sa tren Mortdale duol ra baktason gikan sa among gipuy-an. Dili puno sa pasahero ang double-decker nga tren ug dili siot sa pasahero ang mga estayonan nga among naagian. Didto mi manaog sa Town Hall Railway Station nga kasikbit sa Queen Victoria Building, Town Hall Square, Pavilion Plaza, The Galleries ug Woolworths Supermarket. Baktasan ra ang St Mary’s Cathedral.
Didto mi naniudto sa Westfield Foodcourt diin ang mangaon ang modala sa gipalit nga pagkaon sa ilang lamesa. Human sa paniudto nag window shopping mis Queen Victoria Building (QVB).
Ang QVB dakong edipisyo nga nag-ukopar sa tibuok bloke sa Sydney’s George Street. Gitukod kini niadto pang tuig 1890 isip Municipal Market. Gipanindot ug gibuksan pagbalik niadtong 1986, ang QVB nahimong pinakapopular ug pinakaprestihiyoso nga shopping center sa Sydney.
Sakay sa tren miadto mis Bennelong Point diin nahimutang ang Sydney Opera House ug malantaw ang Sydney Harbour Bridge. Daghang tawo sa dapit kay tapokanan sa mga taga-Sydney ug mga bisita. Kadaghanan sa mga babaye lakip na ang mga edaran nagsuot og short (sobra ka pinapuok ang sa mga batan-on). Bisan sa kainit sa palis, ang mga putiong Awstralyano nangaon ug nag-inom sa mga lamesa nga maigo sa silaw sa Adlaw. Sayo pa magsuroy ug magkuhag hulagway busa misulod mis Opera Kitchen aron makalingkod samtang nagpalabayg oras. Nag-order mig makaon, kape ug serbesa.
Ang Sydney Opera House nga usa sa pinakailado nga atraksyon sa Australia, gidagsa sa kapin sa walo ka milyones ka tawo matag tuig. Sulod sa upat ka parte o hawanan niini (ang Concert Hall ang kinadak-an og may 2,679 ka lingkoranan) gibuhat ug gipasundayag ang nagkalainlaing mga arte.
Sa among nahimutangan malantaw ang Sydney Harbour Bridge. Ang nag-arkong tulay (gitas-on: 1,149 ka metros ug gihabogon: 134 ka metros) labanganan sa tren, sakyanan ug tawo gikan sa CBD paingon sa North Shore (usa ka residential area sa habagatang bahin sa kaulohan sa Sydney).
Human magpahulagway atubangan sa Opera House, sa atbang nga Harbour Bridge ug sa laktanan sa circular quay, misakay mig ferry paingon sa Darling Harbour. Pagkahuman og piktur-piktyor sa paseo sa pantalan, mibaktas mi paingon sa Town Hall ug misakayg tren pauli sa Mortdale. Pipila lang ang pasahero sa upper deck sa tren diin kami nanglingkod. Alas-siyete na sa pag-abot namo sa balay.
