Niining bahina sa akong biyahe akong hisgotan ang mahitungod sa mga malls o shopping centers ug sa mga pagkaon sa Sydney.
Ang giilang napulo ka labing hawod nga shopping centers sa Sydney mao ang Westfield Sydney, Queen Victoria Building, World Square Shopping Centre, Forever New, Harbourside, Broadway Shopping Centre, The Galleries, Strand Arcade, Skygarden ug Central Park.
Sa daghang shopping centres sa Australia, ang labing himalitan mao ang Westfield. Gikan sa ubos nga kagikan sa Blacktown, Sydney, ang Westfield adunay kasamtangang 103 ka tindahan sa Australia, United States, United Kingdom. New Zealand, Italy, Croatia ug Brazil. Sa 37 ka tindahan sa Australia, 15 niini ang nahimutang sa Sydney. Ang upat nga akong nasudlan mao ang Westfield Sydney, Westfield Hurstville, Westfield Miranda ug Westfield Parramatta. Ang Westfield Sydney nga nahimutang ubos sa Sydney Tower usa ka world class shopping center. Ang Westfield Hurstville maoy kinadul-an sa Mortdale busa didto mi tigpalitan og pagkaon (bugas, karne, isda, utanon, prutas, fresh milk, panakot, ubp.). Dali tultolon ang Westfield Miranda ug Westfield Parramatta kay kanait ra sa estasyonan sa tren.
Ang mga chain stores sulod sa Westfiled shopping centres naglakip sa Woolworths (Australian supermarket), Target (American mid-price department store), Coles (Australian supermarket), BigW (Australian discount department store), JB HI-FI (Australian and New Zealand consumer goods retailer), Aldi (German global discount supermarket) ug K-mart (Australian discount supermarket).
Makaingon ko nga mahiligon og kaon sa gawas ang mga tawo sa Sydney tungod sa kadaghan sa mga kan-anan sulod sa mga malls ug tindahan sa kadalanan. Klase-klase ang mga tradisyonal nga pagkaon sa mga restawran ug food halls o hawker centres. Apan ang akong dila nga naanad sa tinola, inun-onan, law-oy, humba, kinilaw ug sinugba nabag-ohan sa wala maanding mga menu sama sa Indian chilli beef, Lebanese shawarma, Thailand chicken curry, Malaysian nasi lemak, Vietnamese chicken curry, Greek chicken pasta, Italian lasagna, French ratatouille roasted vegetables, Australian lamp stew ug Japanese shusi. Apan nakaangay dayon kos American beef steak, Peking duck ug Greek vegetable salad. Nahinangop kos pinabukalang kasag ug pansat sa Sydney Fish Market.
Kusog moinom og kape ang taga dinhi. Bisan si Yoyong ug Ryedgee naungo nas kape sa mga coffee shops. Apan sa kadaghan sa kape nga kapilian (latte, espresso, cappuccino, Americano, macchiato, mocha) ang akong dila nagpangita sa tam-is ug minos sa pait nga kape. Maayo gani kay nakatultol mig gamayng tindahan sa Pinoy nga namaligya og San Mig Original 3- in-1. (Didto sad mi tigpalitan og Magic Sarap, Suka Pinakurat (produkto sa Iligan City), Silver Swan soy sauce ug bulad.
Self-service sa mga food halls. Ang kustomer ang mobitbit sa gipalit nga pagkaon (kadaghanan walay food tray) ug mohipos sa basura (pagkaon, disposable nga plato/baso/kutsara, lata, botelya) nga isulod sa mga rubbish containers.
Si Yoyong nga kanhi dili mahibalo maglutog law-oy, nakat-on na pag-amdam og pagkaon sa balay. Ang mga resipi sa pagluto og karne, isda ug utanon iyang natun-an sa TV. Mao usab si Ryedgee. Apan sa mga putaheng Pinoy ako ang ilang palutoon sa inun-onan ug tinolang isda ug si Pat sa adobong baboy ug pansit.
