May malamatong kalidad ang autumn kanus-a ang mga dahon magsugod pag-usab og kolor, gikan sa berde ngadtos dalag, kahil ug lain-laing bulok sa pula. Aron makasaksi ning talagsaong kabag-ohan, mihapit mis Mt. Wilson sa among pag-adto sa Echo Point, Katoomba, New South Wales. Sa Mt. Wilson among naabtan ang daghang mga turistang lokal ug langyaw nga nalingawg tan-aw ug kuhag hulagway sa mga maple trees nga nagpasundayag sa kaanindot sa ilang mga dahon isip pagpanamilit sa dili pa mangadagdag. May mga kahoyng patay na tan-awon, pasensiyosong nagtindog ug nagpaabot sa spring kanus-a mosubol ang bag-ong mga dahon sa ilang mga sanga ug galaw.
Alas onse nas buntag sa among pagbiya sa Mortdale agi sa Southwestern Motorway. Kapin sa duha ka oras gidagan sa among sakyanan ang Mt. Wilson, usa ka balangay sulod sa rehiyon sa Blue Mountains, New South Wales. Didto mi naniudto sa among balong pagkaon. Lapas nas alas-kuwatro sa hapon sa among pag-abot sa Echo Point Lookout. Ang lantawanan nagguk-ong ngilit sa habog nga pangpang sulod sa tradisyonal nga yuta sa mga lumad nga Gundungurra ug Darug. Didto madung-aw ang Three Sisters sandstone rock formation ug ang Jamison Valley sa tiilan niini ug malantaw ang pangpang sa Greater Blue Mountains.
Ang Echo Point maoy lutsanan kanaog sa Jamison Valley agi sa Giant Stairway nga may gitas-on nga 540 metros. Ang Giant Stairway adunay 911 ang-ang nga gikulit sa pangpang ug 32 ka eskalira nga hinimo sa asero. Sayang nga wala maapil sa among pamagdoy ang pagkanaog sa dakong hagdanan. Ug sa pagsuroy sa Blue Mountains aron masinati ang gibantog niining mga atraksiyon – titip nga mga pangpang, kakahoyan sa yukaliptus, mga busay ug ang mga kalingawan sa Katomba Scenic World. Sa iyang pagbakasypn sa Australia sa miaging tuig, si Faith, kauban ang pamilya ni Yoyong nakasakay sa railway ug cableway sa Katoomba Scenic World.
Kining raged nga rehiyon sa kasadpang Sydney gitawag og Blue Mountains tungod sa talagsaong blue haze nga mohabol sa dapit. Tungod sa dasok sa lanahon nga yukaliptus, ang atmospera sa Bule Mountains puno sa pinong lagdo sa lana, nga sa kombinasyon sa mga abog, inalisbong tubig ug salibwag sa mubong-bawod (short-wave) nga silaw sa adlaw maoy hinungdan sa blue haze o asul nga bulok sa kalikopan niini.
Miadto mis Lincoln’s Rock nga duol ra sa Echo Point aron pagsud-ong sa pagsalop sa Adlaw, apan kadyot ra mi didto kay gilamoy na ang Adlaw sa talay sa kabukiran didto sa kasadpan ug gisanaw si Pat sa naglagitom nga bung-aw ubos sa nagsiwil nga pangpang.
Ang Parramatta usa ka suburb sa Sydney ug 25 kilometros ang gilay-on sa Mortdale. Natapos ang among pamagdoy niadtong Mayo 13 sa panihapon didto PapaRich (Malaysian restaurant) sa Parramatta Westfield.
