Ang Canberra nga kaulohan sa Australia, ilaya gikan sa baybay sa habagatang-silangan. Tungod sa kalasangan, umahan ug kinaiyanhong kabtangan nga naglikop sa Canberra, nakabaton kini sa dagnay nga “Bush Capital”. Ang nag-unang makakabig sa panan-aw sa mga dumuluong sa Canberra mao ang Lake Burley Griffin, usa ka artipisyal o binuhat nga lanaw nga puno sa daghang sailboats ug kayaks. Sa baybay sa lanaw nagpaantaw ang National Gallery nga naila sa iyang kapin sa 166,00 nga koleksyon sa lumadnong mga alampat.
Kapin sa tulo ka oras nga gidagan sa among sakyanan ang hapit 300 ka kilometrong gilay-on sa Canberra gikan sa Sydney. Sa dakong dalan, nalingaw kog lantaw sa mga karnero nga nanabsab sa hanayhay nga mga pastohan. Didto na mi mangaon sa among balong paniudto sa Pacific Suites Canberra diin mi motsik-in.
Sa duha ka adlaw namong suroy sa Canberra, nakasulod mis National Dinosaur Museam (May 27) ug Australian War Memorial (May 28). Nakabisita sad mis Parliament House ug Cockington Green Gardens. Wala na mi kahigayon pagsulod sa National Gallery. Gitapos ang unang adlaw namong laag sa Canberra sa panihapon sa TUSONG Firewood BBQ (Korean restaurant).
Ang National Dinosuar Museum ang pinakadakong museyo sa Australia sa mga espesimen sa prehistoric dinosuar ug nahimong suki sa kapin sa 100,000 ka dumuduaw matag tuig. Nabantog ang museyo sa kompletong bukog sa napulo ka dinosuar, walo ka insaktong gidak-on nga modelo (adunay molihok ug mongulob kong hikapon) ug mga eksibit sa mga bukog, ulo, ngipon, kuko ug gatosan ka mga fossils sa mga mananap (isda, amphibians, reptiles, langgam ug mammals) nga nabuhi 700 milyones ka tuig kanhiay. Sa gift shop, mapalit ang natural history books, dinosaur replicas, toys, fossils, crystals, minerals and meteorites. Kompleto sa morag-buhi nga fiberglass models sa lain-laing matang sa dinosaur sa landscaped garden sa tugkaran sa museyo.
