TODAY'S SCRIPTURES

ANG GASA SA KINABUHI

“Mohatag ako og mga pasalamat kanimo, tungod kay kahibudngan ug katingalahan uyamot ang pagbuhat kanako: Kahibulongan man ang imong mga buhat; ug kini nahibaloan kaayo sa akong kalag.” – Psalmo 139:14

Ang gitas-on sa kinabuhi (life expectancy as of 2022) sa Pilipino nga lalaki 70.22 anyos (sa babaye, 74.17 anyos). Ang akong amahan namatay sa stroke sa edad nga 65 anyos. Busa dako ang akong pagpasalamat sa Labawng Makagagahom sa gasa sa kinabuhi kay miabot na ang akong edad og 80 anyos.

Ang atong kinabuhi iya sa Ginoo. Wa ta masayod kon kanus-a bawion sa Dios ang hinulaman tang kinabuhi. Wa ta masayod kon kanus-a, asa ug ang hinungdan sa atong kamatayon. Busa andam o mangandam kita sa oras nga moatubang kita sa atong magbubuhat.

Sa edad nga 80 anyos dili nako kalikayan ang paghunahuna ni Kamatayon (Grim Reaper) nga morag anino nga nagsunodsunod kanako.  Busa natagik nako kining balak nga nag-ulohag “Ang Pagpaabot”:

Andam na ang lote 

Nabayran na ang memorial plan

Naapod-apod na ang mga kabtangan

Mabuhi na ang kabataan

Gibasolan ko na ang mga kasal-anan

Gipasaylo ko na ang akong mga kaaway  

Mahimo mo na akong kuhaon Ginoo

Apan

May mga sugilanon pang sulaton

May mga balak pang tagikon

May mga pagsubang pang sud-ongon

May mga apo-sa-tuhod pang paaboton

Busa

Nag-ampo ko nga unya pa ug dili karon na.