Talan-awon mahinangpong misugat
Mga kahoyng mahogany –
Tag-as, tigson ug dikit
Mga higanting sundalong naglinya
Sa matag kilid sa dalan
Halapad nga tanom-lasang
Nag-ayag sa kasulaw sa adlaw
Nagbugtaw sa kainit sa hangin
Nagsuyop sa abog gisalibwag
Sa mga nanglabayng sakyanan.
Gihangop ko ang lasang
Misimhot sa iyang kahumot
Mihumol sa piskay nga palibot
Mipauraray sa iyang kahayahay
Hinikalimtan sa makadiyot
Ang kabaligtaran –
Hubong yuta
Abogon ug init nga kadalanan
Mga basura ug kanal
Sa dautang baho nangalisbo
Ug ubang ngil-ad nga talan-awon
Sa siyudadnong mga dapit.
