Ang aligato ug materya gihimo Niya
Sinugdan sa mga butang may kinabuhi
Apan hangtod nga ang tawo naumol
Sa kaugalingon dili makapadayag Siya
Sa kagaw man o sa dinosor ba . . .
Sa mga pasumbingay Siya nakigsulti
Pinulongan nga masabtan sa tawo
Sama sa Hardin sa Eden
Sa ginadiling prutas nga dili prutas
Nga labaw pang dili mansanas . . .
Sama sa pito ka adlaw sa pagmugna
Nahitabo sulod sa bilyones ka tuig
Butang nga halawom ug tulukibon
Sa pagsabot di matugkad dayon . . .
Pasagdan Niya ang tawo
Pagpamalandong sa misteryo sa universo
Siya ang kaniadto ang karon ang ugma
Pagkalinga sa tawo dili ihikaw niya . . .
