PAMAGDOY SA SINGAPORE, BATAM UG KUALA LUMPUR (B2)
Walay kalainan ang oras sa Singapore ug sa Pilipinas. Hapit na tungang gabii sa among pag-abot sa Singapore Changi Airport o Changi Airport. Samtang paspas naglakaw paingon sa arrival area, wa ko kapugong pagkuhag pipila ka hulagway. Tinuod nga layo ra kaayo ang atong NAIA itandi sa Changi – sa kalimpyo, kaanindot ug pagka-passenger-friendly. Karpeted ang salog, limpyo ug humot ang comport rooms ug nindot ang mural o pinintal sa mga dingding. Istrikto apan hapsay ug dali ang pagproseso sa passports ug disembarkation cards (DC).
Apan ako ug si Fr. Nonoy nalangan sa immigration counters. Wala masulatig tubag ang pangutana sa DC kon asa ko mopuyo sa Singapore. Ang DC gipanghatag sa mga pasahero didto sa eroplano ug ang akong asawa ang akong gipa-fill up sa akong DC kay maglisod kog sulat tungod kay bag-o lang naalim ang akong samad sa kamot. Si Fr. Nonoy gisukit-sukit mahitungod sa iyang pasaporte nga wala mabag-o ug gitatakan lang sa DFA og “extended for six months” aron lang siya makauban sa among panaw.
Sa arrival area gitagbo ko sa usa ka batan-on nga miila kanako pinaagi sa desinyo ug kolor sa akong suot nga tisirt. Gipamalihog siya sa akong anak nga si Yoyong nga maoy motunol sa SND500 nga ikadugang sa among dalang USD500. Si Yoyong nga akong tokayo nagtrabaho sa Singapore sa wala pa siya mobalhin sa Australia kauban sa iyang asawa ug usa ka anak. Dako ang iyang sweldo isip Senior Software Developer sa EDMI Ltd apan matud pa niya mas “family-friendly” ang Australia, busa nakahukom ang magtiayon nga adto magpuyo. Gawas pa mas dako ang oportunidad ug kitaon sa iyang asawa nga usa ka nars.
Gitagbo mis among tourist guide, gipasakay sa tourist bus ug gihatod sa Frangrance Hotel-Pearl nga maoy among katulgan sa duha ka gabii.
Buntag, Hunyo 15. Way libreng pamahaw sa Fragrance Hotel-Pearl, busa didto mi nangaon sa usa ka kan-anan sa kanto duol sa hotel. Kadaghanan kanamo nanaog na sa lawak hulatanan sa pag-abot ni James Sing, ang among tigtultol nga usa ka Bombay nga lungsoranon na sa Singapore. Sulod sa nagdagan nga sakyanan, iyang gihinganlan sa mga dapit nga among suroyan. Mihatag siyag mubong asoy sa kasaysayan ug kasamtangang kahimtang sa Singapore. Gikablit kog talagsaong kaikag dihang iyang gihisgotan ang mga balaod ug palisiya sa Singapore mahitungod sa death penalty, illegal drugs, smoking in public places, littering ug vandalism, kay tukma kini sa gisaad ni Rodrigo Duterte nga kon siya modaog pagka-presidente iyang ibalik ang silot sa kamatayon ug sugpoon sa droga ug krimen sulod sa tulo ngadto sa unom ka bulan. Iyang sang ipatoman sa tibuok nasod ang iyang gihimo sa Davao City: pagdili sa pagpanigarilyo sa mga publikong lugar, pagdili sa paglabay og basura sa kadalanan ug pagpatoman sa kurpyo sa mga maynor. Dihang nalakbitan ni James nga dihay panahon nga gidili ang welga sa mga trabahante, nahinumdom sad kos kontrobersyal nga pasidaan ni Duterte ngadtos mga labor unions sa dili magpasulabi paghimog mga welga aron kahatagag kahigayonan ang mga kapitalista nga palamboon ang patigayon sa nasod.
Naka-hinuktok ko kadyot dihang nalakbitan ni James ang mahitungod sa pagpahamtang sa silot nga caning o paglatigo aron pagpatunhay sa disciplina ug sa pagsumpo sa krimen. Naintriga ko niini kay hugot nga gidili sa Pilipinas ang corporeal punishment sa mga magtutudlo ngadto sa ilang estudyante ug bisan gani sa mga ginikanan ngadto sa ilang anak.
Gikan sa Fragrance Hotel-Pearl nga nahimutang sa Geylang District, gisuroy mi sa Civic District agi sa Padang, sa Cricket Club, sa Parliament House, sa Supreme Court ug City Hall. Apan igo sa mis paglantaw-lantaw sa among naagian kay wala man mi manaog sa sakyanan. Makalingaw tan-awon ang habog nga mga edipisyo. Makapadani ang nag-alinupong nga mga tanom nga makita bisan asa nga dapit sa dakbayan nga gidagnayan og Garden City. Bisan sa kagamay ug kahagip-ot duna gyoy luna para sa tanom: mga kahoy nga gitaliwad-an sa tag-as nga kondominyum, mga tanom pangdayan ug mga bulak sa daplin sa dalan, sa taas ug ilawon sa tulay ug mga pribadong lote. Hapsay ang kadalanan ug walay makitang basura ug mga sinalibay. Subwaytrain ang gisakyan sa mga tawo sa ilang pag-ngadto-nganhi, busa dili huot nga trapik sama sa Manila. Walay estambay nga imong makita sa mga kanto.
