Nahitabo ang wala damhang pagbiyahi sa mga sakop sa Governance Team sa Banay sa Dios (BSD) sa Valencia City tungod sa maayong kabubot-on sa magtiayong Rene ug Pepang Regidor. Ug didto kini sa Singapore, Batam ug Kuala Lumpur. Duna kanamo ang walay sarang nga ikagasto sa pagbiyahi sa laing nasod, busa dako ang among kakurat dihang gipangayo ni Rene ang dapit ug petsa sa among pagkatawo kay gikinahanglan sa travel agent sa gipahiluna nga group tour sa among pundok. Kadtong walay passport iyang giingnan nga mokuha nag pasaporte. Among gituhoan nga tabangan kami ni Rene sa galastohon sa biyahi. Tuod man, sa usa ka namo ka business meeting niadtong bulan sa Abril, gipahibalo ni Rene nga siya ang moabaga sa kantidad nga P18,500 sa matag tawo nga ibayad sa Dream Fun Travel & Tours (DFTT).
Lakip sa tour package ang pagsakay sa eroplano (Cebu Pacific Air.com) gikan sa Ninoy Aquino International Airport (NAIA) paingon sa Singapore Changi Airport o Changi Airport (CA) ug gikan sa Kuala Lumpur International Airport (KLIA2) paingon sa NAIA; lima ka gabii nga hotel accommodation; sakyanan gikan sa Changi paingon sa hotel, gikan sa Singapore ngadto sa Kuala Lumpur, Malaysia ug gikan sa hotel paingon sa KLIA2 ug ang tour buses sa pagsuroy-suroy sa Singapore, Batam ug Kuala Lumpur.
Ang among group tour gitakda sa Hunyo 14-20, 2016. Si Sony Garcia ang miboluntaryo nga mangitag promo sa ayroplano nga among sakyan paingon sa Manila ug sa pagbalik. Balor og P4,000 ang round trip sa Cebu Pacific ang iyang nalukat. Ang uban kanamo nangayog tabang sa mga anak ug mangutang alang sa plete sa eroplano ug ubang gasto nga gawas sa kontrata sa tour package sama sa pagkaon, tips sa tigtultol, drayber, bayad sa bagahe ug uban pa.
Tungod sa plantar fasciitis, magsakit ang akong tikod kon magdugayg tindog ug lakaw, busa mipalit kos sapatos nga Sketchers nga gisugyot sa akong umagad. Tuod, tungod sa kagaan ug kahumok mora kog nagtiil og lakaw sa karpet. Mipalit sad kog Sony Digital Camera kay akong plano nga sulaton ang among biyahi ug ipadala sa Bisaya Magasin.
Bayente ming tanan nga kauban sa panaw. Pito ka sakop sa governance team (Bernie Amata, Rudy Asparo, Toto Caina, Sony Garcia, Rene Regidor, Eme Sumagang ug Pet Taganahan) ug walo ka asawa (Dodong Amata, Lory Asparo, Linda Caina, Albeth Garcia; Ginging Jumawid, Pepang Regidor, Pat Sumagang ug Tessie Taganahan). Gikuyog ni Rene ug Pepang ang ilang anak ug apo (Bryan Regidor, Airene Regidor ug Amyra Regidor) ug duha ka pari (Arnold Ranque ug Nonoy Suarez).
Si Fr. Arnold ug Fr. Nonoy kanhi kura paroko sa San Agustin Parish Church sa Valencia City. Klasmeyt ni Pepang si Fr. Arnold ug Fr. Nonoy sa San Isidro College sa Malaybalay City.
Nagdungan mis among pagpanganaog sa Cagayan de Oro sakay sa usa ka van ug sa tourist mini bus sa Regidor Family Resort. Way mi tulog kay alas-dos sa kaadlawon ming mihawa sa Valencia City. Naglikay nga malangan sa dalan kon may mahitabo nga pagdahili sa yuta dapit sa Maluko diin dunay gihimong pagbuldos ug pagtiptip sa mga bakilid. Alas onse pa ang among lupad paingon sa Manila apan alas siyete pa didto na mi sa Laguindingan Airport. Human sa ayom-ayom nga pamahaw sa usa ka karenderiya, misulod mis balay sa tugpahanan ug nagpaabot sa oras sa tsik-in. Gawas sa pamilyang Regidor, ang among tagsa-tagsa ka maleta nga may ligid wala molabaw sa pito ka kilo ang timbang kay libreng bitbiton sulod sa eroplano. Duha ka oras ming nag-estambay sa departure lounge sa pagpaabot sa among lupad paingon sa Manila.
Miabot mis Ninoy Aquino International Airport (NAIA) mga usa ka oras ug tunga gikan sa among pagbiya sa Laguindingan. Pito pa ka oras ang among paglupad paingon sa Singapore busa bisan unsa na lang ang among gihimo sa pagpalabay sa oras ug sa kalaay. Si Sony nga sakit ang hawak tungod sa sciatica, mihigda sa bugnaw ug gahi nga salog. Nangatulog sad sila si Rody ug Toto ug silang tulo ang gibinlan sa mga bagahe nga among gitapok abay sa nagpahulay.
Ako ug si Gingging mikuyog kang Tessie nga miboluntaryo nga maoy moduso sa among bayad sa travel tax ug terminal fee (P1,650) didto sa counter o puwesto sa erlayn. Ang uban nagtan-awg mga baligya sa duty-free shops.
Sa pagpangonay gihapon ni Tessie, among gihiusa ang among pagpasulod sa among mga bagahe aron pagseguro nga walay extra baggage nga mabayran. Sa immigration counters, among gipakita ug gipatatakan ang among pasaporte. Human moagi sa X-ray scanners (tawo ug bagahe), misulod mis departure area ug nagpadayon sa among pagpaabot sa among 8:20 sa hapon nga lupad paingon sa Singapore, sakay gihapon sa Cebu Pacific.
