MASAHE

Willing or not, we are all hostages of 

the joy of which we deprive ourselves.

Odysseus Elytis 

Nalingaw silag tabi samtang nagpaabot sa ilang gi-order nga pagkaon sa Bigby’s Café & Restaurant sulod sa SM. Ug nagpadayon ang ilang nagbalik-balik na nga estorya hangtod nahuman silag panihapon. 

“Magpamasahe ta,” agda ni Lenlen sa wala pa sila mobiya sa ilang lamesa.  

“Wa pa ko kasulay magpamasahe.”

“Sulayi. Stimulating ug relaxing.”

Gibati niya ang kahapo sa tibuok hapon nilang suroy-suroy sa mga shopping mall sa dakbayan. Iyang sulayan ang pagpamasahe.

Gikan sa SM mipauli silas two-bedroom townhouse ni Lenlen sa Pueblo de Oro ug nag-ilis. Parehas silang naka-shorts sa ilang paggawas. Maalaan silang magsoon sa ilang kulongon nga buhok ug taliwtiwon nga ilong. Tambok lang ang iyang ig-agaw. Igsoon ang ilang amahan. Nangahingkod sa usa ka sudlonong lungsod sa Bukidnon, katalirongan sila sa iyang edad nga 33 anyos ug ni Lenlen nga magulang kaniyag usa ka tuig. Nagtrabaho si Lenlen sa usa ka bangko sa Dakbayan sa Cagayan de Oro, samtang siya nagtudlo sa publikong eskwelahan sa ilang dapit.

 Giparking ni Lenlen ang gimanehong Hyundai Eon ug misulod silas usa ka massage clinic. 

“Duha ka Swedish Massage,” ni Lenlen ngadtos nag-inusarang receptionist-cashier diha sa gamayng reception room.

“Sori kaayo, Ma’m. Fully booked na sa taas, naa nay nakalinya.  

Pasado alas-nuybe na. Alas-onse magsira ang massage clinic.

“Sa ubos?”

“Naay bakante, Ma’m.”

“Ok kas foot massage, Grace?” 

“No problem. Uban-uban ra man kos imo.”

“Duha ka foot massage.”

“Yes, Ma’m.”

Daginoton ang kahayag sulod sa lawak masahian. Milingkod silas taas nga bangko pidpid sa dingding ug duol sa hagdanan paingon sa ikaduhang andana, diin matod pa ni Lenlen, gihimo ang full-body massage sulod sa gagmayng nga lawak nga giutlanan og kurtina. Maghubo ang gimasahian didto ug maghigda sa kutson nga gilatag sa salog. Magpungko ang masahista. Gawas sa Swedish Massage nga ampay sa iyang ig-agaw, naay Body Thai Massage ug BackMassage. Ang parokyano ang magpili kon babaye o lalake ang gustong massage therapist.

“Ma’m, pwede na mo mobalhin sa massage chair,” agni sa usa ka naka-unipormeng masahista.  

Gitagsaan nila ang duha ka bakanteng silyon nga giulang sa duha ka silyon nga okupado.  

Humok ang lingkoranan ug taas nga sandiganan.  Iyang gihumol ang iyang mga tiil sa gamayng banyera nga gibutang sa iyang tiilan. Nahinangop ang iyang lapa-lapa sa init-init nga tubig ug ang iyang ilong sa nangalisngawng alimyon sa hirbabuyna gikan sa banyera.  

“Excuse me, Ma’m,” matod sa iyang masahista nga mipahilona sa hot compress sa iyang hawak ug liog. Nindot ang iyang pamati sa kainit gikan sa hot compress nga inaynayng nanuhotsuhot sa ugat ug kaunaran sa iyang hawak ug liog.     

Hilom sulod sa lawak gawas sa mananoyng musika gikan sa di makitang mga espeker. Ang tukar kombinasyon sa klasikal nga huni sa piyano ug bakgrawng tunog sa dasmag sa mga balod.

Nagtihaya siyas handag nga sandiganan sa silyon samtang gihimo ang foot massage. Gihabolan sa  toalya ang ubos nga bahin sa iyang lawas. Gikuha sa masahista ang banyera ug gipahiluna ang iyang mga tiil sa tungtonganan nga may hapin nga mga gagmayng toalya. Gitrapohan sa toalya ang iyang mga tiil. Unang gihilot ang iyang walang tiil.  Sa wala pa niya piyonga ang iyang mga mata, iyang daklit gianinaw ang iyang masahista. Batan-on kini. Mga bayente-singko anyos. May katas-on ug hindik ang panagway.

“Sulti lang Ma’m kon bug-at ra ang akong paghilot kay akong paga-anan.”

“Sakto ra, Dong.” 

Mao pa kadto siya mahilot og lalaki busa sa sinugdan gibati niya ang kagil-as sa imbasyon sa iyang lawas.  Ug sa di kapugngang kagilok. Apan sa kadugayan naanad ang iyang panit sa himas ug hilot sa hinating mga kamot. Giganoy siyas katulogon samtang gihilot ang ibabaw sa tiil, lapalapa, tikod ug bukongbukong ug gipiso, gihaplos ug gipatakla ang mga tudlo sa iyang tiil.   Ang herbal nga lana ug lusyon naghatag og igong kadanlog sa iyang panit. 

Napukaw siya sa iyang tagpilaw dihang gihilot ang iyang batiis. Gisunod ang iyang bagtak, tuhod, tuwaytuway, lukonlukon ug paa.  Dili sad mabiyaan ang iyang kaseksi ug sa tinan-awan sa mga lalake wala malilong kaniya nga nadani sila sa iyang paa ug ubang bahin sa iyang lawas. Kinsay magdahom nga kining estranyong masahista ang makauna paghimas sa iyang paa? 

Human sa paa, gihilot ang iyang bukobuko ug liog. Dili sayon ang iyang gibati kay gigkanon siya sa liog. Maingon nga ang iyang liog ang hinungdan nganong nagkabulag silas iyang uyab. Nagdako siya ubos sa pagtulon-an ug pahimangno nga kinahanglang batonan ang kaulay hangtod sa kaminyoon. Busa taman ra sa kapot-kapot sa kamot, dip-ig-dig-ig ug halok sa aping ang iyang gitugot sa iyang uyab. Nagdumili siyang hagkan sa liog kay basin dili siya kapugong sa kaugalingon ug mahinayak sa pagbuhat sa butang nga iyang gilikayan. Gibulagan siyas iyang hinigugma kay dili siya mosugot sa sagad nga gibuhat sa manag-uyab ning panahon sa kabag-ohan.  

Migimok ang iyang kaunoran sa matagbawong sensasyon. Sa mga palad ug tudlo sa batan-ong masahista, napukaw ang lawasnong pagbati nga dugay nang natulog o gipugngan. Mitim-aw sa iyang hunahuna ang kahimatngon nga may dakong haw-ang sa iyang kinabuhi. Sayang ang katuigan kanus-a iyang gihikawan ang kaugalingon sa pagtagamtam sa lawasnong katagbawan. Sayang ang katuigan nga iyang giusikan sa pagpuyo sa desyerto nga uga sa gugma ug pagpangga sa usa ka lalake. Nahinumdom siya sa nabasang gumalaysay nga napatik sa magasing Bisaya mahitungod sa lima ka sentido sa tawo:

“Biologically ug psychologically, ang tawo gidisenyo sa pagsinati o pagtagamtam sa mga lawasnong sensasyon. Tungod niini, gikinahanglan kong masud-ong ang kaanindot sa buhagay sa busay, mapaminaw ang mananoyng awit sa kalanggaman, matilawan ang katamis sa dugos, mabati ang mahigalaong dagpi sa huyuhoy, masimhot ang kahumot sa bulak ug uban pa.”

Human sa kadyot nga paghilot iyang ulo, natapos ang usa ka oras foot massage.

“Unsay imong imnon, Ma’m? Hot water o tea.” 

“Tea.”

Dungan silang Lenlen paggawas sa massage room. Sa reception room, gibayran sa iyang ig-agaw ang tag P250 nga foot massage. 

“Imong tea, Ma’m,” sangpit sa iyang masahista nga mipahiluna sa platito nga may tasa sa tsa diha sa counter sa receptionist-cashier.

“Salamat. Tabi, unsay imong ngalan, Dong?”

“Bernabe Prantilla. Kayong ang tawag sa ako dinhi.”

“Salamat. You’re good.”  

“Thank you, Ma’m.” 

Samtang nag-inom sa tsa, mitungha sa iyang handurawan ang Swedish Massage nga gihulagway ni Lenlen kaniya. Sa dili pa siya mopauli human sa duha ka semana niyang pagduaw sa iyang ig-agaw, mobalik siya dinhis massage clinic nga naandan ni Lenlen.

Nianang gabhiona nagdamgo siyang gihilot sa usa ka lalakeng may katas-on ug hindik ang panagway. Nagpuk-ong ang batan-on nga naghilot sa iyang paa, bat-ang, hawak, likod, bukobuko ug liog samtang nagkulob siyang hubo sa kutson nga gilatag sa salog.  Hilom ang palibot gawas sa mananoyng musika gikan sa di makitang mga espeker.  Ang tukar kombinasyon sa klasikal nga huni sa piyano ug bakgrawng tunog sa dasmag sa mga balod. Iyang nasimhot ang alimyon sa hirbabuyna nga gipadpad sa hangin.