Ang South Korea, usa ka nasod sa silangang Asya sa katungang habagatan sa Korean Peninsula, nakaambit sa utlanan sa North Korea nga gibantayan og daghang sundalo. Naila ang South Korea sa iyang berde, katag-katag nga mga bukid ug bungtod, kahoyng cherry ug kasiglohan ka tuig nga mga templo sa Buddhist. Ug dugang niini, mao ang iyang pangisdaan nga kabaryohan sa kabaybayonan, sub-tropical nga mga isla ug high-tech nga mga dakbayan sama sa Seoul. Ang Seoul maoy kaulohan sa South Korea.

Alang sa mga Pinoy sama kanako, naila ang South Korea tungod sa Samsung selpon, Samsung TV ug sakyanang Hyundai.

Niadtong Mayo 20-26, 2019, ako, si Pat nga akong asawa ug si Faith nga akong anak nahimong turista sa South Korea. PAL Airbus ang among connecting flight gikan sa Laguindingan Airport (6:25sb) paingon sa Incheon International Airport (gidugayon: upat ug tunga sa oras).

Si Jenny, iyaan sa pag-umangkon ni Pat nga si Marissa, mitagbo kanamo sa departure area sa Incheon International Airport ug mihatod kanamo dapit sa Seoul Station (49 kilometro ang gilay-on) sakay sa Incheon Airport Bus. Gikan sa among gihunongan sa bus, misakay mig taksi paingon sa among gi-bok nga hotel (Premier Best Western Hotel). Duha ka adlaw ang among reservation sa hotel nga US$230 (P12,000) ang bayronon. Gabii na sa among pag-tsek-in sa hotel busa nag-ayom-ayom lang mig panihapon og lugaw ug nodol sa usa ka convenience store sa unang andana sa hotel. Human sa timo-timo misaka mis among hotel room sa ika-17 ka andana. Si Jenny ug kaubang anak mipauli sa ilang pinuy-anan sa Seoul.

Human sa among buffet nga pamahaw sa hotel, nagpatabang mis receptionist sa hotal sa pagkuhag usa ka adlaw nga tour sa Seoul. Untop alas nuwebe sa buntag, miabot ang “I Love Seoul Tour” van. Ang bayad sa usa ka adlaw nga guided tour 129,000 Won (P5,676) matag tawo. Kauban namo ang usa ka Amerikana nga may duha ka anak ug pipila ka laing mga dayo. Koreana ang among tour guide. Naglisod kog sabot sa iyang Iningles (ilabi na nga bungol-bungol na), busa wala ko moapil sa mga turista (lakip ang akong asawa ug anak) nga naminaw sa iyang pamahayag. Kay mas dali makuha ang iyang mga inpormasyon sa internet, akong gigamit ang panahon sa pagkuhag hulagway sa mga dapit nga among gisuroyan.

Una ming gisuroy sa Changdeokgung Palace sulod sa dakong parke sa Jongno-gu, Seoul. Ang Changdeokgung Palace usa sa lima ka "Five Grand Palaces" nga gitukod sa mga hari sa Joseon Dynasty. Nadugay mis dapit tungod sa daghang mga edipisyo ug talan-awon nga among gisuroyan – Donhwamun Gate nga natukod sa 1412, Geumcheongyo Bridge nga natukod sa 1411, Injeongjeon Hall (National Treasure) nga natukod pagbalik human masunog sa panahon sa 1592 nga pagsulong sa Hapon, Seonjeongjeon Hall (opisina sa nagmando nga mga opisyales), Huijeongdang Hall (balay-katulganan sa hari), Daejojeon Hall (pinuy-anan sa rayna), Juhamnu Pavilion (librarya sa mga harianon) ug Yeon-gyeongdang Residence (audience hall).

Gisunod mig suroy sa Bukchon Hanok Village, usa ka Korean tradisyonal nga balangay nga may hataas nga kaagi. Ang hanok unang gidisenyo sa ika-14 ka siglo sa panahon sa Joseon Dynasty. Ang arkitektura nagmatngon sa pagkaangay sa mga balay ug sa palibot. Gipasuroy mis pipila ka eskinita, nga sa matag kilid nagpungko ang mga mga tradisyonal nga mga balay nga gitawag og hanok. Ang balangay nagmostrador sa 600- ka- tuig nga hulagway sa siyudadnon nga kahimtangan.

Gikan sa Butchon Hanok Village, gisuroy mis Ihwa Mural Village duol sa Naksan Park nga gipanindot sa Ministry of Culture, Sports and Tourism. Gidugokan kini sa mga lokal ug dayo nga mga turista tungod sa mga pamintal sa mga bungbong ug sa mabistahon o makadani nga palibot.

Gidala mis Gwangjang Market, kanhi Dongdaemun Market, usa ka tradisyonal nga merkado sa dalan sa Jongno-gu. Ang merkado usa sa pinakakaraan ug kinadak-ang tradisyonal nga merkado sa South Korea, nga matod pa may kapin sa 5000 nga tindahan ug mga 20,000 ka mga trabahante sulod sa 42,000 kuwadrado metro nga erya. Didto mi naniudto og pagkaon sa dalan (street food).

Human sa paniudto, gidala mis Han River Cruise. Kami na lang tulo nabilin kay tunga ra sa adlaw ang tour sa among mga kauban.

Ang Han River o Hangang usa sa pinakadako nga suba sa South Korea. Ang tunga sa oras nga paglawig sa Han River nakapahinumdom kanako sa Loboc River Cruise sa Bohol.

Gitapos ang among usa ka adlaw nga tour didto sa YTN Seoul Tower nga kasagarang nailhan sa ngalan nga Nansam Tower o Seoul Tower. Ang Seoul Tower, usa ka communication and observation tower nga nahimutang sa Namsan Mountain sa kauyokan sa Seoul. Sa gitas-on nga 236 metros, nahimo kining ikaduhang kinahabogan nga punta sa dakbayan. Sakay sa elebitor, gisaka namo kinatumyan sa tore.

Alas singko na sa hapon sa pagbalik namo sa hotel. Igo lang ming nag-ilis og suweter pangontra sa katugnaw sa gawas (13 degrees C). Mabaklay ra gikan sa hotel ang Myeong-dong, usa ka sikaw nga palitanang dapit sa daghang international fashion brands, luxury department stores ug homegrown cosmetics shops. Nagkadaiya ang mga baligyang mga kosmetik o pagpahindik nga hinimo sa nagkalainlaing prutas ug huwerbas. Didto akong nakita ang usa ka skin care lotion nga hinimo gikan sa hila-hila o suso nga makita sa Pilipinas. Ang hilig sa mga Koreano sa paggamit og skin care lotion makita diha sa ilang puti ug hamis nga pamanit.

Nangita kog tindahan sa selpon kay gustong kong itandi ang presyo sa Samsung dinhis Korea sa Pilipinas. Apan wa koy nakitang baligya nga mga selpon kay mga tindahan sa kosmetik ang among nakita sa mga kalye nga among gisuyoran.

Nanihapon mis Meong-dong sa wala pa mobalik sa hotel. Nag-order mig Bulgogi (hinuloman nga hiwa sa karneng baka) nga kami ra ang nagsugba diha sa among lamesa-kan-anan.