IKAUPAT NGA ADLAW (Marso 8)
Ang ikaupat nga adlaw among gigahin sa pagbisita sa Macao. Gikan sa hotel, among gibaktas ang kinadul-ang bus stop. Mao gihapong mga backpack ang among gisanglay o gibitbit. Didto ra mi namahaw sa among lawak sa hotel kay among giapas ang HZMB shuttle bus nga molabay sa alas 8:30 s.b. Daling napuno ang bus sa naagiang mga bus stop tungod sa mga pasahero nga nag-apas sa ilang mga flight sa HIA. Abtag mga usa ka oras, miabot ang bus sa Airport Terminal 1 ug human manaog ang mga pasahero didto, mipadayon ang bus paingon sa HZMB passenger clearance diin didto among gipasota ang among mga pasaporte sa Hong Kong immigration counter. Alas 10:20 s.b. nakalarga ang among gisakyang bus gikan sa Hong Kong Port paingon sa Macao Port agi sa Hong Kong-Zhuhai-Macau bridge (HZMB). Ang 55-kilometro nga tulay dunay gidugtong nga tulo ka mga cable-stayed bridge, usa ka undersea tunnel ug upat ka mga artificial island. Ang pamasahe sa bus HK$65 (P478). Ang senior citizen, HK$33 (P242).
Usa kanhi ka teritoryo sa Portugal, ang Macau (Macao) nahimong usa ka special administrative region (SAR) sa China. Ang Macao may populasyon nga 710,000 ka tawo sulod sa erya nga 32.9 km2. Gianggaan ang Macao nga “Las Vegas of Asia” tungod sa dagko niining mga casino.
Human natataki ang among mga pasaporte sa Macao immigration counter, misakay mis libreng bus paingon sa Venetian Macao. Dunay libreng mga bus ang mga hotel-casino sa Macao.
Ang Venetian Macao usa ka hotel ug casino resort mga gipanag-iya ug gidumala sa American Las Vegas Sands Corporation. Among gisuroy ang nagkalinlaing mga table game (blackjack, craps, roulette, baccarat) ug mga gaming machine (pachinko, slot machine, video lottery terminal ug video poker). Di ko mahilig og sugal ug mao to ang una nakong pagsulod og kasino.
Human maniudto sulod sa Venetian, nagsuroy ug nagpahugway mi sa mga talagsaong dapit sa hotel sama sa romantikong gondola ride along the Grand Canal (replika sa Venice). Nalingaw sad mig hangad-hangad sa alkoba sa hotel kay mora kag naglantaw sa langit.
Gikan sa Venetian, mitabok mi sa dapit sa Parisian Hotel ug sa Londoner Macao. Human namog suroy didto, misakay mig taksi paingon sa San Antonio diin nahimutang ang “The Ruins of St. Pauls” o ang mga nabilin (remnants) sa 17th-century Catholic religious complex. Sa pagkakaron, ang kagubaan (ruins) usa sa labing naila nga mga landmark sa Macao ug naapil sa listahan sa UNESCO World Heritage Site.
Ang ruins naglakip sa nagpabiling batong portada (façade) ug grande nga hagdanan sa 17th-century Church of St. Paul (Mater Dei). Makita sa luyo sa portada ang kagubaan sa St. Paul's College nga nasunog niadtong 1835.
Bagang duot sa mga tawo nga among nakaabay ug nakatagbo sa dalan paingon sa ruins. Nagpahulagway mi sa tiilan sa ruins. Kami ra ni Emem ang mipadayon sa itaas kay giubanan ni Yong si Pat nga nagpabilin sa ubos. Giabayan ko ni Emem sa taas nga ang-ang paingon sa nabiling portada sa simbahan. Sa luyo sa portada, among gitan-aw ang gipreserba nga mga kagubaan sa St Paul’s College.
Daghang tindahan sa ubos sa ruins. Nangita si Pat og mga make-up apan wala siyay napalit kay Ininsik ang mga ngalan ug detalyeng kasayoran. Misulay sad kog tan-aw-tan-aw sa mga Chinese medicine apan wa koy nasabtan.
Gikan sa San Antonio, misakay mig taksi paingon sa Macao Port. Pagka 5:00 pm mibiya ang among gisakyang HZMB bus balik sa Hong Kong.
Hulagway 1. Gikan sa HZMB passenger clearance paspas among lakaw paingon sa Hong Kong Port
Hulagway 2. Yong, Pat, Eme ug Emem sa Macao Port
Hulagway 3. Eme ug Pat sa entrada sa Venetian Hotel.
Hulagway 4. Among paniudto sa Food Court sa Venetian Hotel
Hulagway 5. Yong, Emem, Pat ug Eme sa Grand Canal sulod sa Venetian Hotel
Hulagway 6. Morag langit ang alkoba sa Venetian Hotel
Hulagway 7. Si Emem, Pat ug Eme sa Londoner Hotel.
Hulagway 8. Si Emem ug Pat nagbaktas sa siot nga dalan paingon sa The Ruins of St. Pauls'
Hulagway 9. Si Emem, Yong, Pat ug Eme sa The Ruins of St. Pauls'
Hulagway 10. Si Pat nagpabilin sa ubos sa The Ruins of St Pauls'
Hulagway 11. Gi-selfie mi ni Yong sa Macao Port
Hulagway 12. Si Yong, Eme, Pat ug Emem sulod sa bus paingon sa Kong Kong Port.
