KAUBAN namo si Marissa sa among pagbalik sa Seoul, busa wala na mi maglisod sa among biyahe ug suroy-suroy. Gawas pa, nalibre ko sa pagbitbit ug pagguyod sa dakong trolly bag kay naluoy si Marissa sa iyang uyoan nga usa ka senior citizen (74 anyos na ko).
Kauban namo ang bugtong anak ni Marrissa nga si Hambi (edad:18 anyos) sa among pamahaw sa hotel apan wala siya mokuyog sa among biyahi kay duna siyay klase (3rdyear high school siya). Sahi sa among hotel sa Seoul nga continental o western ang menu, Koryano ang pagkaon sa Naju Bitgaram Hotel.
Among gibaklay ang Naju Station gikan sa Naju Bitgaram Hotel ug nagpaabot sa among 6:30sb nga biyahe paingon sa Seoul sakay sa KTX Train.
Maluho ug kusog modagan (moabot og 300 kilometro matag oras) ang KTX Train. Sa pag-abot namo sa Seoul Station (8:30 sb), among gibilin sa locker sa estasyonan sa tren ang among bagahe ug nagsuroysuroy sa Seoul sa wala pa mi mo tsek-in sa Golden Tulip Incheon Airport Hotel sa Paradise City.
Gitagbo mi ni Jenny sa gawas sa estasyonan. Sakay sa duha ka taksi, miadto mis War Memorial of Korea nga nahimutang sa Yongsan-dong, Yongsan-gu. Ang war memorial gibuksan sa 1994 aron paghandom sa kaagi sa gera sa Korea. Kauban namo ni Pat si Marissa sa taksi busa among nasayron nga 84 anyos na ang drayber sa among gisakyan. Sama sa Singapore, kadaghanan sa mga taksi driver sa Seoul mga senior citizen.
Among gisuroy ang pipila sa kapin sa usa ka gatos nga mga dagkong kagamiton sa gera sama sa tangke, barko ug eroplano. Misulod kos Statue of Brothers nga simbolo sa tulo ka tuig nga Gera sa Korea. Sa salog niini gilatag ang bronse nga mga lapida sa mga nasod nga mitabang sa South Korea sa gera batok sa North Korea. Usa ang Pilipinas sa 16 ka nasod nga giila ug gipasidunggan sa South Korea.
Gikan sa War Memorial misakay mig subway train paingon sa Meongdong nga amo nang nataak sa una namong pagsuroysuroy sa Seoul. Ang Meongdong mao ang shopping mecca sa Seoul ug sentro sa komersiyo sa kaulohang dakbayan sa South Korea. Dinhi makita ug masinati sa mga turista ang nagkasagol nga tindahan sa tunga dalan nga kadaghanan nagbaligyag street food ug dagkong tindahan sa matag kilid nga namaligya og mahalon nga mga sinina ug mga pahindik sa nawong ug panit nga hinimo sa Korea. Didto ko kakitag losyon sa panit nga hinimo gikan sa suso o hilahila nga nahimong peste sa mga tanom sa Pilipinas.
Mipalit kog pasalubong nga mga nail cutter ug memo holder (ref magnet). Mipalit sad kog usa ka Jansport backpack bag nga akong handomanan sa akong pagbisita sa Seoul. Si Pat ug Faith namalit og mga skin care product.
Among gibalikan ang among bagahe sa Seoul Station ug misakay og taksi paingon sa among hotel sa Paradise City. Kauban si Marissa, didto mi natulog kay duol sa Incheon International Airport. Pagkaugma ang among biyahe pauli sa Pilipinas.
Human mapahiluna ang among mga bagahe sa among lawak, nanaog mi aron manihapon. Sa usa ka kan-anan sa palibot sa hotel, ang “alive pork” ang among giorder. Samtang nagsugba sa hiniwang karneng baboy wala mi kapugong sa pinugngang katawa sa pulong “alive pork” sa menu. Nahinumdom hinuon kos gisulti ni Erap nga ang English ang hinungdan nga pobre ang Pilipinas. Morag tinuod kay mauswagon o dato man ang Korea.
