ANG Yeosu (populasyon:295,538) usa ka dakbayan nga nahimutang sa habagatang kabaybayonan sa Korean Peninsula sa habagatang lalawigan sa Jeolla ug naglangkob sa Old Yeosu City (natukod sa 1949), Yeocheon City (natukod sa 1986) ug Yeochon County nga gihiusa sa niadtong 1998. Ang Yeosu may gilay-on nga 91 kilometro gikan sa Naju.

Alas 9:45sb mibiya mi Naju paingon sa Yeosu diin nahimutang ang Media Sculpture Park & 3D Trick Museum. Hapsay ang one-way nga dalan nga moagi og daghang tanel lusot sa mga bukid ug mga bungtod (24 ka tanel sa akong ihap).

Ang topograpiya sa kayutaan sa South Korea susama sa Japan ug kini akong napanid-an sa among biyahe sa Jeonju ug Yeosu. Nasarap sa akong mga mata ang katag-katag nga kabukiran ug ang umahan sa tiilan sa mga bukid ug bungtod. Sama sa Japan, puno sa kahoy ang mga bukid ug gilikayan nga matandog ang kalasangan sa pagkonstrak og kadalanan. Sa kinatibuk-ang erya sa South Korea 64% ang lasang.

Miabot mi sa Media Sculpture Park & 3D Trick Museum pagka alas onse sa buntag. Milukat mig ticket nga tag 12,000 Won (P528) matag tawo sa 3D Trick Museum ug 10,000 Won (P440) sa Media Sculpture Park.

Una ming misulod sa 3D Trick Museum ug nalingaw mig kuhag hulagway ug bedyo sa talagsaong mga talan-awon ug lipat-lipat sa mata (Avatar, Sphinx, pagsagubang sa tsunami, pag-ikyas sa naguho nga yuta, latas ibabaw sa lava, sulod sa dakong taklobo ilawon sa dagat, sakay sa kamelyo, sakay sa dolphin, sakay sa bangka, sakay sa bisikleta uban si ET, sakay sa lobo, levitation, katkat sa pangpang, katkat bungbong sa balay ug daghan pa nga naglisod kog panghingalan kay pulos Koreano ang sinulatan sa mga marka ug patin-aw. Bag-o lang natukod ang 3D Trick Museum ug Media Sculpture Park busa dili pa makita sa dagitpukot kun internet. Apan grabe ang among kahimuot sa among pagpahulagway sa mga talan-awon ug lipat-lipat sa mata.

Gikan sa 3D Trick Museum misulod mis Media Sculpture Park ug nagpahulagway sa mga talagsanong mga obra ug nindot nga talan-awon sulod sa parke, lakip na ang dakong kamot nga nag-umbaw sa dagat nga ako ug ang akong asawa wala mosaka kay mogimok ang among mga lapa-lapa sa kasanaw; ang mga dagkong Romanong kinulit sa gawas ug sa baba sa tanel diin dunay mga esnakan sa sulod; ang laktanan sa ngilit sa parke nga nagdung-aw sa dagat nga si Marissa ra ang nangahas paglukat og ticket.

Dunay pipila ka kan-anan sa ikaduhang andam sa museyo. Didto mi nangaon sa naulahi namong paniudto.

Sa wala pa mi mobalik sa Naju, midalikyat mig suroy sa International Pavilion, Expo 2012 Yeosu Korea Memorial Hall (diin ang akong asawa nagpahulagway atubangan sa dakong kinulit ni Pinochio) ug Big O & Water Feature nga dili ra layo sa Media Sculpture Park.

Nahibalik mi sa Naju sa alas 7:00 sa gabii apan landag pa ang palibot kay ulahi mosalop ang adlaw sa Korea.