LIMA KA ADLAW NGA PANAW SA SOUTH KOREA (pagpauli)
Alas 7:25sb (6:25sb sa Pilipinas) ang among biyahe gikan sa Incheon International Airport paingon sa NAIA busa igo ra ming nangape sulod sa among lawak sa hotel ug mingsakay og taksi paingon sa irport. Giubanan mi ni Marissa hangtod sa pre-departure area. Nagtimotimo mig pre-cooked meals sulod sa departure area samtang nagpaabot sa among flight sakay sa eroplano sa Philippine Air Lines. Adto na mis kawanangan maniudto kay ang PAL nagdalit og libre nga pagkaon sa mga pasahero.
Mitugpa ang among eroplano sa NAIA human sa upat ka oras nga paglupad sa kawanangan. Mas estrikto ang NAIA kay sa Incheon International Airport, busa walay baggage through check-in sa among pagpauli. Imong kuhaon ang imong bagahe sa baggage carousel ug human sa inspeksiyon sa customs imong itsek-in sa imong connecting flight. Alas 3:20 sa hapon ang among connecting flight paingon sa Laguindingan Airport apan nalangan ang among biyahe og kapin sa oras busa mikabat og unom ka oras ang among pagliningkora sa departure area. Kilumkilom na sa among pag-abot sa Laguindingan Airport.
Gitagbo mi sa among sakyanan nga gimaneho ni Emem (among kamanghorang anak). Nanihapon mi pag-abot namo sa Cagayan de Oro City. Nahinangop ang among mga dila sa among giorder nga chopsuey, tinolang malasugue ug sinugbang tiyan sa tuna. Natulog mi sa condo ni Faith sa The Courtyards sa Upper Carmen, Cagayan de Oro City.
Matod pa ni Mosli Eddin Saadi, "A traveler without observation is a bird without wings.” Busa kinahanglang maigmat ang mata ug dunggan sa usa ka turista.
Kini ang akong mga obserbasyon ug panabot sa among tour sa Korea:
Una, sa pipila ka malamboong nasod nga akong nataak (Japan, Singapore, Australia, Korea) akong nakita ang disiplina sa mga tawo ug ang estrikto nga pagpatuman sa gobyerno sa mga balaod. Kini makita sa hapsay ug limpyo nga kadalanan ug palibot, pagsunod sa regla sa trapiko ug paggamit sa seatbelt (dunay balaod sa paggamit of seatbelt sa Pilipinas apan kalagmitan gamiton lang kini kon dunay manakopay). Usab, ang malamboong nasod nagmahal sa ilang kaugalingong pinulongan ug kultura.
Ikaduha, mahal ang mga palaliton ug serbisyo sa South Korea. Maong hayahay ang mga dayong turista sa Pilipinas kay barato ang mga hotel, serbisyo, resort, taksi, pagkaon ug palaliton sa Pilipinas.
Ikatulo, ang pagkaon sa South Korea puno sa sustansiya kay daghang sagol nga utanon, hilba, panakot, liso ug prutas. Apan alang sa wala maanad sa spicy nga pagkaon, dili niya matagamtam ang daghang tradisyonal nga mga pagkaon sa South Korea.
Daghang klase sa mga side dish nga kauban sa imong gi-order nga pagkaon. Kini ang akong natilawan nga mga banchan (side dishes): kimchi (gigamos nga repolyo ug ubang utanon) Kongnamul Munchim (gipaturok nga utaw). Algamja-jorim (sinabawan nga patatas), Japchae (ginisa nga patatas nga nodol nga may sagol nga utanon), eomuk bokkeum (keyk nga isda), gyeran-jjim (linung-ag nga itlog), chickin mu (binuro nga labanos ), oi sobagi (halang gigamos nga pipino).
Ako usab nga natilawan kining mosunod nga tradisyonal nga mga sabaw: miyeok guk (guso nga may sabaw sa baka), dak gomtang (tinulang manok), galbitang (linat-ang gusok sa baka), bukeoguk (sabaw sa gibulad nga isda) pollock), gamjaguk (sabaw nga patatas), Samgyetang (tinulang manok nga may sagol nga ginseng) Tteokguk (sabaw nga keyk nga humay), Mugok (sabaw sa piniritong labanos), seolleongtang (linat-ang bukog sa baka) ug gulguk (sabaw nga talaba).
Ang tradisyonal nga pagkaon nga among na-order sa mga restawran mao kining mosunod: bulgogi (hinumolan nga hiniwa nga karne), samgyeopsal (sinugbang tiyan sa baboy), Japchae (sabaw nga nodol nga hinimo sa patatas), seolleongtang (sabaw nga bukog sa baka).
Kini ang mga tradisyonal nga street food sa Korea nga akong nakita apan pipila lang ang akong natilawan: teokbokki (halang nga keyk nga humay) twigim (Korean-style nga tempura), gimbap (Koryano nga sushi), mandu (dumplings), myeon (nodol), pajeon (bitsukoy o hatkeyk), odeng (fishcake), hotteok (bunwelos o donat) and gyeranppang (egg muffins). gamjado (longganisa nga may matekilya) ug dakkochi (sinugbang manok nga gituhog uban sa sibuyas).
Ikaupat, lisod ang pagsuroy-suroy sa South Korea kon wala kay kauban nga makabasa sa ilang alpabeto ug makasulti sa ilang pinulongan. Gisugyot ang pag-download sa selpon sa “Google Translate” alang sa libreng serbisyo sa diha-dihang paghubad sa mga pulong ug pulongan (phrase). Maayong mokuha og guided tour. Iningles ang sinultihan sa mga tour guide alang sa mga turistang dayo ug daghang mga tour package nga kapilian.
