Alas 6:30 sa buntag ang among flight sa akong asawa ngadtos Manila. Giubanan mis among kamagulangang anak sa pag check in sa Laguindingan Airport. Gitugotan ang iyang hangyo nga mosulod sa boarding area kay mga tigulang ang iyang giubanang pasahero. Gawas sa iyang pagpa check in sa among duha ka bagahe (nga idiritso nas Sydney) ug pagkuha sa among boarding pass, duna pa siyay gihangyo sa tig-alagad sa boardingcounter, hinungdan nga gitagsaan mis akong asawa og sticker nga dayag ipapikit sa among sinina.
Nagkaon pa mis departure area dihang gitawag ang among ngalan para sa boarding. Wala na namo tiwasa ang pamahaw sa Kenny Rogers. Guyod ang akong maleta dali ming mipaingon sa boarding gate ug human ipakita ang among boarding pass sa duha ka mapahiyomong empleyada sa PAL, mibaktas mi sa chute pasulod sa ayroplano. Kami ang unang pasahero sulod sa dakong tiyan sa abyon. Bisan sa eroplano naa diay express lane sa mga senior citizen, nakaingon kos kaugalingon.
Miabot mis NAIA sa alas-otso sa buntag. Alas-onse ang among connecting flight paingon sa Sydney. Duna miy tulo ka oras sa pagbalhin gikan sa Terminal 3 ngadto sa Terminal 2 (sakay sa service bus sa PAL), sa pagpresenta sa among pasaporte ug bisa sa Immigration Counter ug pag check in.
Kapoy ug laay ang walo ka oras nga biyahe gikan sa Manila paingon sa Sydney (gilay-on: 8,620 kilometro). Ilabi na nga bisan giunsa nakog piyong ang akong mga mata wa ko makatulog bisag usa ka pamilok. Misulay kog basa sa akong dalang libro apan wala molahutay ang akong mga mata kay kulang ang kahayag sa reading lamp sa ulohan sa pasahero.
Hinuon, nahulipan sa kalipay ang among kalaay dihang gitagbo mis arrival area sa Sydney Airport sa magtiayong Yoyong ug Ryedgee uban sa ilang anak nga si Casey Emery (lima ka tuig ang edad). Tataw ang kahinangop sa among apo nga mitunol kanamo sa bulak ug welcome balloon ug migakos sa iyang Lolo ug Lola.
Lima ka bulan nga gibilin sa amo sa Bukidnon si Casey dihang gitapos ni Ryedgee ang tulo ka bulan nga bridging course sa Australia (gikinahanglan aron makatrabaho isip nars) samtang nagpabilin si Yoyong sa Singapore ug nagpadayon sa iyang trabaho didto. Gikuha si Casey ug giuban sa magtiayon sa ilang paglalin sa Australia isip permanent resident niadtong Enero, 2016. Permanent resident ang status si Yoyong sa Singapore apan nakahukom siyang mobalhin sa Australia kay mas family friendly tungod sa kaluag ug kanindot sa lugar ug iyang maayong polisiya ug programa sa edukasyon ug panglawas (health care).
“Excited si Casey nga makita mo,” matod ni Ryedgee. “Wa gyod makatulog sa dugay namong paabot sa airport.”
“Kamusta inyong biyahe, Pa, Ma?” Ni Yoyong pa samtang nagpaingon mi sa parkingan sa irport.
“Kapoy ang walo ka oras nga lupad sa eroplano,” nako pa. “Apan way hasol sa among paggawas sa inyong irport. Igo lang gitan-aw sa customs ang among passport ug visa. Wa nay pangutana.”
Ang Sydney (Kingsford Smith) Airport o Sydney Airport usa ka internasyonal landiganan nga nahimutang sa suburb sa Mascot, walo ka kilometros habig sa habagatan sa sentro sa Sydney. Ang Sydney Airport nga maoy primaryang irport sa Sydney ang labing karaang commercial international airport sa kalibotan.
Kinse minutos ang among biyahe gikan sa irport paingon gipuy-an sa magtiayon sa Mortdale sakay sa Santa Fe SUV nga gimaneho sa among anak. Hapit na alas-dose sa among pag-abot sa gipuy-an nila ni Yoyong. Human sa naatrasawong panihapon, misulod mi ni Pat sa lawak ni Casey nga maoy among katulganan samtang ania mis Sydney. Dali ra kong nahinanok.
Trayentay siyete ka adlaw ang among bakasyon sa Australia (Marso 19 – Abril 27) apan 70 ka adlaw ang among gikuhang travel insurance (Marso 19 – Mayo 27) kay basin og makahukom mig lugway sa among pagpuyo sa Sydney. Ang among bakasyon gasa ni Faith (among kamagulangang anak) nga maoy miabaga sa P80,000 round-trip ticket sa PAL ug sa among pocket money. Si Charity (among ikatulong anak) maoy nagbayad sa travel insurance. Sagubangon sa magtiayong Yoyong (ikaupat sa lima namo ka anak) ug Ryedgee ang among pagpuyo sa Sydney ug sa pagsuroy-suroy sa Australia.
Ania ang hamubong deskripsiyon sa Sydney ug Australia nga akong nakuha sa Google search:
Ang Sydney (populasyon: 5.5 milyones), capital sa New South Wales ug usa sa kinadak-ang dakbayan sa Australia, mas naila sa iyang Sydney Opera House nga may daw layag nga desinyo, sa dakong Darling Harbour ug sa mas gamay nga Circular Quay port nga nahimong sentro sa dagatnong kinabuhi sa lugar, sa nag-arko nga Harbour Bridge ug sa gidayeg nga Royal Botanical Garden duol niini. Nabantog sad ang Sydney Tower Skywalk, nga naghatag og 360-degree nga panan-awon sa sentro sa dakbayan ug sa mga suburb niini.
Sa laing bahin ang Australia (populasyon nga 24.5 milyones) usa ka nasod ug kontinente nga gilibotan sa lawod sa Indian ug Pacific nga may gidak-on nga 7,688,287 square kilometers. Ang iyang medyor nga mga dakbayan – Sydney, Brisbane, Melbourne, Perth, Adelaide – daplin sa dagat. Ang iyang capital, Canberra, naa sa ilaya. Ang nasod naila sa iyang Sydney Opera House, sa Great Barrier Reef, sa haluag nga interyor nga disyerto ug kaminagawan nga gitawag og Outback, ug sa talagsaon o yunik nga klase sa mga mananap sama sa kangaroos ug duck-billed platypuses. Ang Australia naila usab sa dagnay nga Oz, pinaambihas nga pag-ila nga gipasikad sa tinumotumo nga Yuta sa Oz sa pelikulang The Wizard of Oz. Nailhan sad ang Australia nga “the Land Down Under”, tungod kay nahimutang kini sa Southern Hemisphere.
