ANG AKONG PAMAGDOY SA YUTA SA OZ (Ikapitong Bahin)
Pagkaalas-otso sa buntag sa Easter Sunday, mibiyahe mi paingon sa Brisbane (gilay-on: 79 km). Human magarahe ang sakyanan sa usa ka mall among gibaktas ang Cathedral of St Stephen subay sa mga eskinita ubos sa habog nga mga edipisyo. Puno ang gamayng katedral sa misa sa alas-diyes sa buntag. Ang misa mayor gipangunahan sa arsobispo sa Brisbane nga si Most Rev Mark Coleridge.
Ang Cathedral of St Stephen nga natukod niadtong tuig 1850 mao ang unang Simbahan Katoliko ug ang pinakakararang simbahan sa Queensland. Talagsoan ang katedral tungod sa nagbitay nga bronseng krusipiho ubos sa santuwaryo ug sa iyang Jubilee Pipe Organ. Kadto pa ko makakita sa maong tulunggon ug nahimuot kong naminaw sa talagsaong huni niini nga miduyog sa mga awit sa kwayir.
Human maniudto sa among gibalong pagkaon didto sa Brisbane Botanical Garden (nga among gitultol pinaagi sa Googgle Maps), milahos mig biyahe ngadto sa Sunshine Coast (gilay-on: 105 km). Igo ra mi nagtan-aw-tan-aw (sulod sa nagdangan nga sakyanan) sa sentro sa dakbayan kay nag-apas mis oras. Sa wala pa mi mobalik sa Gold Coast, mitilaw mig meryenda og bhurros (nga isawsaw sa Spanish Chocolate) sa San Churro nga kasikbit sa boardwalk Sunshine Plaza Mall.
Nalangan mis dalan paingon sa Brisbane kay nagsumpot ang daghang sakyanan (awto, wagon, pik-ap, ban, caravan, campervan) sa namauling namagdoy sa adlawng Sabado ug Dominggo ug sa Semana Santa. Alas-otso pasado nas gabii sa among pag-abot sa among hotel sa Gold Coast.
Pagka Lunes (Abril 17 ug birtdey ni Casey), misuroy mis Currumbin Wildlife Sanctuary nga 25 ang gilay-on sa baybay sa Surfers Paradise diin nahimutang ang Breakfree Beachpoint.
Giablihan sa tuig 1947, ang parke santuwaryo may pinakadaghang koleksiyon sa lumad nga mga hayop sa Australia. Usa na ang nabantog nga koala nga sumala sa lapida nga akong nabasa nagkinahanglag 1000 ka eucalyptus nga kakuhaan og pagkaon sulod sa usa ka tuig. Apan tungod kay ang dahon sa yukaliptus gamay rag nutrina, ang koala dili aktibo ug matulog hangtod sa 20 ka oras matag adlaw.
Nanakit ang akong bagtak sa lima ka oras namong suroy-suroy sulod sa parke apan may tumpang nga balos kay sa unang higayon nakakita ug nakahikap kog kangaroo. Nalingaw sad kos Australian Sheep Shearing Show. Ang pasundayag unsaon pag-alot og karnero naghatag kanakog mas lawon nga kahulogan nganong si Kristo gitawag og “malumong karnero”.
Dili matupngan ang mga agila sulod sa Philippine Eagle Center sa Davao City busa wala ko madani sa ilang gipasundayag nga mga langgam. Gagmay sad ang mga buaya nga akong nakita. Apan nahingangha kos Wildlife Hospital kay kompleto sa himaan (x-rays, ultrasounds, endoscopes, ubp.) Matod pa, kapin sa 8000 ka lumad nga mga hayop ang gitambalan sa Wildlife Hospital matag tuig, lakip na ang sobra sa 250 ka koala.
Atol sa ika-lima nga kasaulogan sa adlawng natawhan ni Casey, buot sa iyang mommy ug daddy nga adto manihapon sa Skypoint Observation Deck sa ibabaw sa Q1 Building Gold Coast (usa sa pinakataas nga residential building sa kalibotan) apan milapas na mis oras nga makalukat og tiket busa didto ang among ulahing panihapon sa Gold Coast sa Hurricane’s Grill Surfer’s Paradise.
Lahi sa Pilipinas, walay mosubay sa hotel room sa dili pa makagawas ang guest. Busa, human manghipos sa kagamitan sa kosina balik sa mga hunos ug malabay ang basura sa rubbish chute tapad sa pultahan sa elebitor, nanaog mis basement ug human mapahiluna ang among mga dala sa likod sa sakyanan ug mapalingkod si Casey sa iyang car child seat, migawas mis parkingan. Giuli ni Ryedgee ang ang electronic key sa nag-inusarang receptionist sa check-in counter. Self-service ang Breakfree Beachpoint ug ang electronic key gamiton sa pagsulod sa basement, pagsakay sa elevator ug pagkaligo sa heated indoor pool ug sauna. Ordinaryong yawe ang gigamit pagsulod sa apartment.
Mibiya mis Gold Coast sa ika-limang adlaw sa among pamagdoy. Apan tungod sa kalayo sa Sydney mihapit mis Macquarie Port (533 kms. gikan sa Gold Coast) aron pagpalabay sa kagabhion. Alas-sayes sa gabii sa among pagsik-in sa usa ka cabin sa Colonial Holiday Park. Sa kabin mi nagluto sa among panihapon.
Pagka Miyerkoles (Abril 19) among gibiyahe ang nabiling 384 kilometros nga gilay-on pauli sa Sydney. Mihapit mi kadyot sa The Entrance, NSW Central Coast aron pagtan-aw sa pagbahog sa mga Pelican. Kining maong tourist attraction gihimo sa 3:30 sa hapon matag adlaw, ulan man o init.
Sa akong pagbalik-lantaw sa among bihaye sa Pacific Highway, mipasulabi ang panan-awon sa kanindot sa dakong dalan ug sa palibot niini. Berde ang kalikopan nga gihabolan sa eucaplytus ug ubang kahoy ug tanom. Lapad ang mga ranso ug tambok ang mga baka nga nanibsib sa kasagbotan. Way koral ang luag nga tugkaran sa lagyong mga kabalayan. Walay upaw nga yuta nga akong nakita gikan sa Sydney paingon sa Gold Coast. Patag ang kayutaan gawas sa pipila ka hanayhayng dapit ug gagmayng bukid nga akong nalantaw.
Tungod kay one-way ang sementado ug aspaltado nga haywey, sayon ug hapsay kini daganon ug mas luwas sa disgrasya. May mga road signs nga nagpahibalo sa umaabot o kinadul-an nga rest stop, stopping bay ug gas station. Gawas sa mga kamera daplin sa dalan naay mabinantayong mga traffic officers busa kinahanglang abtik ang mata sa drayber sa mga karatula o pahimangno sa speed limit, overtaking ug no overtaking lanes ug uban pa. Kay dili makahunong sa kalsada, dunay mga rest stops. Walay nagbantay sa libreng toilet apan limpyo ang unidoro, ihianan ug hinawan ug dili mawad-ag tubig ug toilet paper.
