ANG AKONG PAMAGDOY SA YUTA SA OZ (Ikaduhang Bahin)

Bisan walay madungog nga naandang tuktugaok sa manok ug kasikas sa kaadlawon, nakamata ko pagka-alas-siyete sa buntag (alas-kuwatro sa buntag sa Pilipinas, nga maoy akong naandang tigmata). Nanaog kos kosina, nag-init og tubig ug nagtimplag kape. 

Samtang nag-inom og kape didto sa beranda, akong gisugdan pagsulat ang artikulo mahitungod sa bakasyon namo ni Pat sa Australia nga akong ipadala sa Bisaya Magasin.  

Ang Mortdale usa ka suburb sa habagatang bahin sa Sydney ug may 20 kilometro ang gilay-on sa Sydney central business district (CBD).  

Ang Ankara House nga nahimutang sa Macquire Place, Mordale may unom ka yunit. Ang apartment o yunit nilang Yoyong nga giabangan og $580 o P22,040 matag semana, adunay tulo ka lawak-katulganan sa ikatulong andana. May tulo ka comport room, duha sa ikatulong andana ug usa sa ikaduhang andana diin nahimutang ang sala ug kosina. Ang car park ug utility room anaa sa ground floor.  Walay irkon ang apartment kay tugnaw ang Sydney gawas sa panahon sa berano (Disyembre - Pebrero) nga ang temperatora molapas sa 28 degrees celsus. May init nga tubig sa mga gripo sa mga kaligoanan ug hilam-osan sa CR ug hugasanan sa kosina. Bisan ang tubig sa utilty room diin nahimutang ang automatic washing machine ug water heater dunay bugnaw ug init nga tubig. May beranda sa ikaduhang andana habig sa kasadpan. 

Mikuyog mis Pat sa pagmerkado ni Ryedgee ug Yoyong didto sa Westfield, Hurstville. Namalit silag kasag, kinhason, isda, utanon ug panakot. Maoy among unang pamahaw sa akong asawa ang kasag ug kinhason nga gisagol pagluto og tuno ni Ryedgee.

Sa alas-dos sa hapon, gikuyog ko ni Yoyong sa pagkuha ni Casey didto sa Mortdale Public School diin ang akong apo nagtungha sa kindergarten. Naglakaw ra mi kay duol ra. Matod pas akong sangay, maayo nga mouban kos paghatod ug pagkuha ni Casey aron makapaugnat.

Dili uso ang katabang ug yaya sa Australia busa daghan sa mga inahan ug amahan nga naghatod sa nagtungha sa kindergarten nagdala og puya ug gamayng bata (sakay sa estroler o gikugos). Mao nga wa una magtrabaho si Yoyong kay way magbantay ni Casey. Tighatod ug tigkuha usab siya ni Ryedgee sa mga hospital na gitrabahoan (St George Hospital & Community Health Service ug Royal Rehab). Si Yoyong nga kaniadto dili mahibalo magluto bisag law-oy, nakat-on sa paghikay og pagkaon.

Nahimo ang among unang suroy pagkasunod adlaw (Marso 21) didto sa Coogee beach sa Randwick City.  

Samtang nagdagan ang sakyanan, nangaplag kog mga talan-awon nga lahi sa kasagarang makita sa mga dakbayan sa Pilipinas. Tuod, may nasikop ang akong igmat nga mga mata. Nakabig ko sa mga kahoy nga naglumbay sa matag kilid sa dalan, sa hapsay nga mga kalsada, sa luag nga trapik ug sa limpyo nga palibot. 

“Wa koy nakitang eyesores,” nako pa nga nalingaw paglantaw sa naglinyang mga brick houses nga ang atop pulang tisa. 

“Walay slum area dinhi,” matod ni Yoyong. 

“Susama ang desinyo sa mga puluy-anan nga atong naagian.” 

“Gidili dinhi ang pag-usab sa natukod nga balay. Dili sama sa ato nga mahimong padak-an ug patas-an.” 

“Nakaparking ang mga sakyanan daplin sa dalan.”

“Kay kasagaran usa ray sulod ang parkingan sa balay. Ang uban gibilin kay nagsakayg tren sa gitrabahoan.”

Tunga sa oras ang among pagbiyahe paingon sa Cooogee beach. Sayon ang pagmaneho ni Yoyong kay may navigation system ang iyang sakyanan na motultol sa agianan.

Ang pulong Coogee gikan sa lumadnong pulong “koojah” nga nagkahulugag “baho nga lugar” tungod sa kadaghan sa mga guso nga idagsa sa baybayon. Apan tungod sa matag adlaw nga paglimpiyo sa baybayon, daghan ang modagsa ug mangaligo sa Coogee beach. Ang Coogee beach gisalipdan sa batoong Wedding Cake Island, busa mas linaw ang dagat didto kay sa kasikbit nga baybayon.

Didto mi unang misuroy sa batoong pangpang habig sa amihan.  Nalingaw ko paglantaw sa asul nga dagat samtang nagsubay sa dalan-dalan ngilit sa pangpang ug sa paglantaw sa panon sa kanaway didto tabonon nga baybay. Ug siyempre sa pagpakuhag among hulagway.

Sayo ming mipauli kay kuhaon si Casey sa iyang eskwelahan sa pagka-alas-dos sa hapon.