Ang Australia nga usa ka gamayng kontinente, ang pinakadakong nasod sa kalibotan. Naglangkob kini sa unom ka estado (states) ug duha ka teritoryo (territories). Ang mga estado mao ang New South Wales, Northern Territory, Queensland, South Australia, Tasmania, Victoria ug Western Australia.
Ang unang lugar nga among gibiyahian gawas sa New South Wales mao ang Gold Coast, Queensland (855 kilometros habig sa amihanan sa Sydney) agi sa Pacific Highway nga nagsubay sa katimogang baybayon sa Australia.
Nihit ug dug-ol ra ang biyahe sa bus ug daghang lugar nga dili maabot sa tren, busa kaugalingon sakyanan ang sagad gigamit sa pagbiyahe.
Bisan unsa ka layo ang biyahe dili ka mawala sa imong adtoan o destinasyon kon mogamit sa navigator sa sakyanan o sa GPS sa selpon. Mabasa sa navigator kon asa ka na dapit, ang gilay-on sa imong destinasyon ug ang oras nga daganon. Gigamit sad ni Yoyong ang Waze sa iyang iPhone sa mga dalan nga way update ang car navigator tungod temporaryong detour, bag-ong dalan ug uban pa. Ang navigator motultol sa imong adtoan (hotel, tindahan, parke, simbahan, ubp.) ug mosugyot og haliling mga rota aron makalikay sa piot nga trapiko ug toll roads. Makita sad sa navigator ang speed limit sa dalan ug kon asa ang kinadalian nga rota.
Alas-siyete sa buntag sa Abril 13 (Huwebes Santo) mibiya mis Sydney. Ang una namong hunong mao ang Nelson Bay, NSW (200 kms.) diin sa unang higayon nakasakay ming Pat og kamel didto sa sand dunes daplin sa dagat. Misakay sad mig toboggan sa Toboggan Hill Park sa wala pa mi mopadayon sa among biyahe pagka-alas-dos sa hapon. Ikaduha namong hunong ang Coffs Harbour, NSW diin nagpalabay mis kagabhion sa usa katulganan daplin sa dalan (Chelsea Motor Inn).
Pagka-alas-otso sa buntag sa Biyernes Santo among gibiyahe ang nahabiling 318 kilometros paingon sa Gold Coast. Mihapit mis Bayron Bay kay gusto ni Casey nga maligo apan pag-abot namo didto wala siya tugoti nga moadtos dagat kay kusog ang balod. Kilumkilom na sa among pag-abot sa Gold Coast ug midiretso mig check-in sa Breakfree Beachpoint Resort diin may nakareserba ming apartment sa ika-9 nga andana.
Ideyal ang holiday apartment sa among upat ka adlaw nga pagpuyo sa dakbayan kay may kosina nga kompleto sa kagamitan. Dunay 2-door refrigerator nga kasudlan sa among gipalit nga lutoonon (karne, isda, prawn), utanon para salad, fresh milk, serbesa ug red wine. Ang utility room kompleto sa kagamitan sa panglaba (automatic washing machine, dryer), plansa ug plansahan ug dishwasher. Luag ang sala nga kanait sa kosina. May lawak sa magtiayon ug laing lawak alang sa duha ka tawo. Ang baybayon duol ras tiilan sa hotel ug malantaw ang Pacific Ocean sa beranda ug bentana.
Self-service ang Breakfree Beachpoint ug ang electronic key nga kuhaon sa front desk gigamit sa pagsulod sa parkingan, pagsakay sa elebitor ug pagkaligo sa heated indoor pool ug sauna. Ordinaryong yawe ang gigamit pagsulod sa apartment.
Didto mis dagat nianang pagkasabado. Wala ko matental sa agda ni Yoyong nga maligo sa dagat kay bugnaw itandi sa dagat sa tropikong dapit sa kalibotan. Igo lang ming Pat sa paglakaw-lakaw sa pinong balas sa baybayon sa Surfers Paradise ug sa pagpakuhag hulagway.
